​ЗҮРЭНҮҮД АСАРАГДАА

Улаан-Үдымнай Дээдэ Онгостойдо оршодог Этнографиин музейдэ Новосибирск хотоһоо хоёр гүрөөһэн асарагдаа. Эдэ туруута амитад жэлтэй юм байна.

- Иимэ һайхан амитадые абахадаа, баярлаһан гээшэмнай аргагүй. Теэд эдэмнай хоюулаа эмэнүүд - зүрэнүүд байшоо. Тиимэһээ гурануудые олохо ажал эрхилхэмнай, - гэжэ эндэхи ажалшад һанаагаа табижа байһанаа мэдүүлнэ.

Урданай сагһаа хойшо буряад- монголшууд аба хайдаг хэжэ, ан гүрөөл агнадаг байһан. Тиихэдээ туруута амитадые гамнадаг байһан гэжэ мэдээжэ.

Эндэһээ удхалжа хэлэхэдэ, иимэ юм. Бурхан багшын түрүүшын һургаалые буга һогоон хоёр (үнэн дээрээ гуран зүрэн хоёр) соносожо, бүмбэрсэг дэлхэйн бүхы амитадта тарааһан габьяатай. Тиимэһээ дасан дуган бүхэнэй оройдо дүрбэн зүг, найман хизаарта Бурхан багшын һургаалай дэлгэрхые тэмдэглэһэн Хорлын хоёр хажууда гуран зүрэн хоёр байдаг.

Тиимэһээ эндэ асарагдаһан гүрөө- һэдые һайн харгалзалгатайгаар байлгахые музейн ажалшад оролдоно.

— Эдэ амитадые манай ветеринарнууд болон зоотехнигүүд ажаллажа, элүүр энхэ байхынь түлөө оролдоно. Тэдэнэй заабаряар манай ажалшад тэдээндэ хэдыдэ ямар эдеэ үгэхэб, хэдыдэ ундалуулхаб гэжэ бүхы гуримаарнь ажаллана, - гэжэ экскурсовод Наталья Антипина хөөрэхэдөө, - эдэ хөөрхэнүүдые бүхы ёһоорнь харууһалнабди, - гэжэ үнэн үгэеэ үгөө.