​​Эдиршүүлэй тэдхэмжэ эрид дээшэлхэ

50 түхэригэй орондо – 10 мянга

Мүнөө болотор үхибүүдтэ түлэгдэдэг байһан 50 түхэригэй тэдхэмжын хэмжээ эрид нэмэхэ шиидхэбэри тухай Ородой Холбоото Уласай Засагай газарай Түрүүлэгшэ Дмитрий Медведев дуулгаба. Урда һарын 20-до Россиин Юрэнхылэгшэ Владимир Путинай үнгэргэһэн “сэхэ утаһанай” үедэ энэ асуудал табигдаһан байгаа гээд һануулая.

Ородой Холбоото Уласай хүгжэлтын хүн зоной тоо бүридэлэй (демографиин) талаар табигдаһан үндэһэн зорилгонуудта зорюулагдаһан суглаан дээрэ гүрэнэймнай юрэнхы сайд Дмитрий Медведев иигэжэ мэдээсээ. Энээн тухай Бүхэроссиин “Ниитэ нэгэн Росси” намай албан ёһоной сайт дээрэ бэшэгдэнхэй.

“Жэл хахадһаа гурбан наһатай хүрэтэр үхибүүдтэй, тэдхэмжээр бага бүлэнүүдтэ үгтэдэг туһаламжа нэмэхэ шиидхэбэри абтаа. Урид түлэгдэжэ байһан 50 түхэригэй орондо тэдэнэр һара бүри нэгэ үхибүүндээ 10 мянган түхэригһөө дээшэ тэдхэмжэ абадаг болохо”, - гэжэ Засагай газарай Түрүүлэгшын хэлэһые мэдээсэлэй “Интерфaкс” албан тунхаглаа.

Гүрэнэй энэ туһаламжада олон зоной хүртэхын тула тусхай хуулиин түсэл бэлдэгдэнхэй. Яагаад энэ хэрэг бүтэхэ ёһотой юм гэһэн асуудал гарана. Хүнэй ажамидаралда һарын туршада хэрэгтэй эгээл бага хэмжээн (прожиточный минимум) орон доторнай албан ёһоной тогтоол, шиидхэбэринүүдээр тогтоогдодог гээшэ. Мүнөө энэ хэмжээнэй нэгэ хахадһаа бага олзотой бүлэнүүд туһаламжа абаха эрхэтэй. Харин шэнэ хуулиин түсэлэй ёһоор эгээл бага нэгэ хахад хэмжээниинь хоёрто хүрэхэ. Тиихэдэнь түрүүшын болон хоёрдохи үхибүүндээ иимэ туһаламжа абадаг бүлэнүүдэй тоо олошороодхихо зэргэтэй. Энээн тухай мүн лэ Медведев дарга тэрэ суглаан дээрэ хэлэһэн байха юм.

Зоноо олошоруулха зорилго

Хүдэлхэ наһандаа ябаһан аад, эрэмдэг бэетэй үхибүүдээ харууһалдагһаа боложо, ажалгүй зондо үгтэдэг түлбэриин хэмжээн хоёр дахин ехэ болгогдоод, энэ һараһаа эхилжэ түлэгдэдэг болобо.

Алас Дурна зүгтэ ажаһуудаг бүлэнүүдтэ түрүүшын үхибүүнэй түрэхэдэ тусхай туһаламжа нэгэ удаа үзүүлэгдэхэ болобо. Тэрэнь региондо тогтоогдоһон хүнэй ажамидаралда хэрэгтэй эгээл бага хоёр хэмжээнэй туһаламжа байха. Гадна, хоёрдохи үхибүүнэй түрэхэдэ, гүрэнэй бюджедһээ түлэгдэдэг эхэ, эсэгын капитал дээрэ нютаг можын иимэл туһаламжа бии болгогдонхой.

Гэхэтэй хамта, гүрэн дотор үхибүү түрэлгые дээшэлүүлхын тула абтаһан бүхы хэмжээнүүд хүсэд дүүрэн бэелүүлэгдэнэгүй гэжэ Дмитрий Медведев һанамжалаа. Жэл хахадай саада тээ хүн зоноо олон болгохо талаар олон хуули, хэмжээнүүд батлагдаа һэн гэжэ тэрэ һануулба. “Түрүүшын үхибүү түрэхэдэ, үргэжэ абахада һара бүри үзүүлэгдэдэг туһаламжа, эхэ, эсэгын капиталһаа мүнгэ үгэлгын болзор 2021 он болотор һунгаагаа бэлэйбди. Мүн тиихэдэ гурбадахи, дүрбэдэхи үхибүүдэй түрэхэдэ үзүүлэгдэдэг туһаламжа түлэжэ байхыень регионуудаа мүнгөөр ханганабди”.

Буряад Уластамнай хэды гэр бүлэ гүрэнэй иимэ туһаламжада хүртэхөөр байнаб гэһэн асуудал хүн зониие социальна хамгаалгын яаманда дамжуулаад, харюу хүлеэжэ байнабди. Тоо баримтануудаараа хубаалдахадань, мэдээсэхэбди.

Дмитрий АСТАХОВАЙ гэрэл зураг

(Мэдээсэлэй “Новости” албан)