Хилганын сомоной дарга Жаргал Будаев һургуулиин захирал Жаргал Раднаевтай шэнэ стадион дээрэ
Байгша оной апрелиин 29-дэ Баргажан аймагай Хилганын сомоной даргаар Жаргал Будаев һунгагдаһан юм. Мүнөө сагта залуушуулай хүдөөгөө бусажа, тоонто нютагаа һэргээхэеэ оролдожо байхада, ехэ һайшаалтай. Жаргал Бадмаевич хэдыхэн жэлэй туршада хүдөө ажахын үмсын хэрэг эрхилжэ туршаа, теэд гүрэнэй ба нютагай засагай дэмжэлтэгүйгөөр иимэ ажал ябуулхань хэсүү ха юм. Залуу хүн авто-унаагай ехэ байра баряа, мяха хүргэдэг томо түхеэрэлгэшье тодхоо. Тэрэниие ажалша бэрхэ, эрмэлзэл ехэтэй, ударидаха ба эмхидхэхэ бэлигтэй гэжэ ойлгоходоо, нютагаархидынь табан жэлэй саана сомоной дарга болохыень дурадхаа бэлэй. Теэд Жаргал Будаев арайл залууб, дүршэлни үшөөл бага гэжэ шэбшээд, арсаһан байна. Харин мүнөө одоол энэ харюусалгатай үүргэ бэелүүлхээр болбосорооб гэжэ бодоод, хабар үнгэрһэн һунгалтада хабаадахадань, нютагайнь зон баяртайгаар тэрэнэй түлөө дуугаа үгөө бшуу.
- Жаргал Бадмаевич, нютагайнгаа ажабайдал тухай хөөрэжэ үгыт даа.
- Манай сомондо Хилгана ба Боргол нютагууд ородог. Эндэмнай хамта дээрээ мянгаад хүн ажаһуудаг. Зомнай ехэнхидээ адуу, хони, үхэр малаа барижа, хоолойгоо тэжээнэ. Хүдөө нютагта үйлэдбэри байха бэшэ. Нютагтамнай залуушуул яһала бии. 4-5 хүбүүд нэгэдэжэ, таряан ажал эрхилхэ хүсэлтэй. Гүрэнэй түсэлдэ орожо шадаагүйшье һаа, мүнөө зунай хаһада 100 гектар талмайда зелёнко тариха түсэбтэйбди. Саашадаа ажалаа хэһээр байтарнай, хэрэг бүтэнэл ааб даа. Хамтын ажахы үни хада үгы хэгдэһэн. Нэгэ хэды фермернүүд лэ үмсын ажахытай байдаг. Һургуулидамнай һуралсалай шэнэ жэлдэ 60-аад үхибүүд ерэхээр хараалагдана. Хүүгэдэй сэсэрлиг хаагдаһаар үнинэй. Гэбэшье һургуулида бэлэдхэлэй ажал ябуулагдадаг. Эмнэлгын шэнэ түб баригдажа байна.
- Нютагтатнай Баргажан аймагай зунай наадан үнгэржэ байна. Энэ томо стадион һаяхан баригдаа хэбэртэй.
- Тиимэ даа. Байгша оной июниин 1-һээ барилга эхилээбди. Анхан эндэ колхозой таряалангай талмай байһан. Нютагтамнай 7 ТОС бии, тэдэ ехэ ажал ябуулаа. Ажаһуугшаднай, нютагаймнай ба аймагай олзын хэрэг эрхилэгшэд, Москва хотодо ажаһуудаг нютагаархиднай мүнгэ зөөри суглуулаа. Северобайкальскын ойн ажахынхид хубитаяа оруулаа. Тиигэжэ олоной хүсөөр стадионтой болообди. Барилгада бүхыдөө 700 мянгаад түхэриг гаргашалагдаа. Ерэхэ жэлэй Сурхарбаан болотор, энэ газараа улам болбосоруулхабди. Хожом эндэмнай уласхоорондыншье хэмжээнэй элдэб янзын харалган, фестиваль, хуралдаанууд үнгэргэгдэдэг болохо бшуу.
- ТОС-ууд ямар ажал ябуулна гээшэб?
- Булта нютагаа һайжаруулха хэрэгтэ эдэбхитэй оролсодог. Элдэб янзын харалгануудта хабаадалсаад, мүнгэшье оложо, ажал ябуулна. Һаяшаг Баргажанай ой модоной ажахытай хэлсэжэ, 500 модохонуудые миинтээр асараабди. ТОС-ууднай тэдэниие нютагайнгаа үйлсэнүүдээр һуулгаа. Хэхэ ажалынь олдоод лэ байдаг.
- Һаяын сагай түсэбүүд тухай хөөрэжэ үгыт даа.
- Баргажан дасанай шэрээтэ Цыдып ламхайтай хөөрэлдэжэ, обоо тахидаг Антоновко гэжэ газартаа субарга бодхоохоёо байнабди. Мүн нютаг дээрээ дуган бариха һанамжыемнай Цыдып лама дэмжээ. Ушар юуб гэхэдэ, нютагаймнай 3 лама Буддын шажанай дээдэ һургуули дүүргэжэ, Баргажанайнгаа дасанда бусанхай. Тэдэмнай нютагайнгаа дуган ерэжэ, ээлжээгээр хурал үнгэргэдэг болохо. Наһатай зомнай аяар Яаригта ошожо, уншалгануудта хабаадана ха юм. Харин эндээ Буддын шажанай номнол табихада, аха захатандашье амар болохо, мүн залуушуул буян үйлэдэжэ байхал. Бүхыдөө ажал хэрэгнай урагшатай болохо, нютагаймнай байдал һайжарха.
- Һайнта даа, Жаргал Бадмаевич. Холын бодолтой залуу хүтэлбэрилэгшэтэй хөөрэлдэхэдэ, ехэ зохид байна. Ажал хэрэгүүдтнай урагшатай байг лэ даа!
Цырегма Сампиловагай гэрэл зураг