1941-1945 онууд. Дайнай хатуу шэрүүн жэлнүүд. Олон зоной ами наһа таһалһан, олон хүүгэдые үншэрүүлһэн, хооһо нойтоор ябуулһан, уйдхар гашуудалаар халиһан саг…
Эсэгэ ороноо хамгаалгын Агууехэ дайнай эхилхэдэ, Захаамин аймагай Шара-Азарга нютагһаа олон хүбүүд фронтдо мордоһон юм. Тэдэнэй тоодо аха дүүнэр - Нима Занаевич ба Чойжинима Занаевич Жалсановууд, Гарма Николаевич ба Очир Николаевич Никифоровүүд, мүн Жугдур Зинаидович Очиров гэгшэд ябалсаа.
Хүн бүхэнэйнь хуби заяан адли бэшэ. Зариманиинь харата дайсаниие даралсаад, тоонто нютагаа бусажа ерэһэн хубитай. Зариманиинь байлдаанай талмайнууд дээрэ эрэлхэг баатараар алдалан унаа. Минии хүгшэн нагасанар - Чойжинима Занаевич ба Нима Занаевич Жалсановууд амиды мэндэ бусаха заяатай байгаа.
Чойжинима Жалсанов
Чойжинима Занаевич Улаан Одоной, Эсэгэ ороноо хамгаалгын дайнай 2-дохи шатын орденуудаар, «Шэн зоригой түлөө» болон бусад олон медальнуудаар шагнагдаһан. Бүхы наһаараа үнэн сэхээр ажаллажа, Буряадай габьяата багшын нэрэ зэргэдэ хүртэһэн, гэгээрэлэй отличник болоһон юм. Хүгшэн нагасымни оролдолгоор шара-азаргаархин тамирай зүйлнүүдтэ, илангаяа волейболдо дүршэһэн байна.
Нима Занаевич ууган ахынгаа жэшээгээр эрдэм гэгээрэлэй хүндэшье, хүндэтэйшье ажалда өөрыгөө зорюулаа. Тэрэ Нуртын, Сагаан-Мориной һургуулинуудта багшалаа. Мүн баһа волейбол наададаг байһан.
Нима Жалсанов
Байгша оной майн 9-дэ бидэ Агууехэ Илалтын 74 жэлэй ой угтаабди. Энэ үдэр бүхы гүрэн соомнай хаа-хаанагүй, тэрэ тоодо Буряад орондошье дайнай ветерануудые хүндэлэн ёһолдог гээшэ. Уласаймнай нютаг бүхэндэ элдэб янзын хэмжээ ябуулганууд эмхидхэгдэдэг.
Манай Шара-Азаргадашье дээрэ нэрлэгдэһэн ветерануудай хүндэлэлдэ волейболоор уласай мүрысөөн үнгэргэгдэдэг заншалтай юм. Мүнөө жэл аяар 30 команда хабаадаһан байна.
Илагша командануудта болон онсо шалгарһан тамиршадта ветерануудай түрэлэй болон дүтынь зон кубогуудые, дипломуудые үнэтэ бэлэгүүдтэйгээр барюулаа юм. Амгалан байдал, эрхэ сүлөө, ами наһыемнай аршалжа абарһан Илалтын сэрэгшэдэй үри һадаһад дайнай ветерануудай гэрэлтэ дурасхаалые иимэ һайханаар мүнхэлнэ.
Гэр бүлын архивһаа гэрэл зурагууд абтаба