«Нюдэ руум хара»
Элеэ – Буряад ороной һүлдэ тэмдэгүүдэй нэгэн. Би энэ шубуу һайшаадагби, гэрэл зурагыень нэгэтэ бэшэ буулгаһамби. Гэрэл зурагуудай нэрэ хүндэтэй конкурснуудай нэгэндэ шалгарһаншье байхаб.
Энэ гэрэл зураг “Нюдэ руум хара” гэжэ нэрлэгдээд, үнгэрһэн жэлдэ National Geographic сэтгүүлэй һанамжаар Ородой байгаалиин эрхим арбан гэрэл зурагшадай тоодо орожо, ехэ үзэсхэлэндэ хабаадаха арга намда олгоо.
Мухар-Шэбэр аймагта буулгаа һэм. Тиишээ зорюута элеэгэй хойноһоо ошооб. Хурса нюдэтэй энэ мяхаша шубуунһаа хорохо хубсаһа үмдөөд, аяар 8 сагай туршада хүлеэһэнэйхиие тэрэниие нэгэл дахин буулгажа шадааб.
Элеэ хадаа харсагын түрэлэй ехэ шубуун юм. Бэеэрээ тахяаһаа халта ехэ, нарин далинуудтай (далайсань – метр хахад), асатаһан һүүлээрээ бусад мяхаша шубуудһаа онсо илгардаг. Хүрибтэр зүһэтэй, гүзээн талань һаруулшаг үнгэтэй, тархиинь орой баһа һаруул. Һүүлынь хара-хүрин (залуу шубуудайхи сайбар боро), хүндэлэн зуруудтай.
Элеэ далинуудаа халта нугыд гээд, ехэ жэгдээр элин ниидэдэг. Абяаниинь унаганай инсагаалһан шэнги гү, али радио урагша хойшонь мушхахада гарадаг абяан мэтэ “тюю-хьииии” гэһэншүү байдаг. Энэ шубуун уһанда дүтэ үндэр модотой газарта байрладаг.
Юушье эдижэрхидэг: хорхой шумуул, загаһа, баха, могой, багахан шубуу болон амитадые, үхэһэн амита. Хабартаа хун шубууд тухай репортаж хэхэдээ, элеэгэй нугаһадые агнахыень удаан адаглаа һэм. Гадна обоо тахихада гү, али ехэ-ехэ уншалгануудые болон үндэһэн найр наада үнгэргэхэдэ, элеэнүүд олоор ниидэжэ ерэдэг юм.
Александр ГАРМАЕВАЙ гэрэл зураг