Целиннын сомон дарга Зоригто Дашидоржиев шагнал абана
“Ариг сэбэр һуурин” гэһэн мүрысөөнэй дүнгүүд согсологдобо. Апрелиин 1-һээ июниин 30 болотор үргэлжэлһэн тус мүрысөө Буряад Уласай Арадай Хуралай һунгамалнууд Аркадий Цыбиков, Дмитрий Дружинин гэгшэд дэмжээ гэжэ тэмдэглэлтэй.
Тиигэжэ аймаг дотороо тон болбосон түхэлтэй, ариг сэбэр гэжэ Целиннэ тосхон элирүүлэгдэжэ, 250 мянган түхэригэй шанда хүртөө. Шиирингэ болон Комсомольско һууринууд мүн лэ шалгаржа, 150 мянган түхэригөөр урмашуулагдаа. Гадна шангай III һуурида Үльдэргэ, Улхасаа, Эгэтын Адаг нютагууд хүртэжэ, 100 мянган түхэриг абаа.
Һуурин тосхонуудтаа заһабарилгын, һэльбэн шэнэлэлгын болон ариг сэбэрые сахилгын ажал эдэбхитэйгээр ябуулһан зондо баярай бэшэгүүд барюулагдаа.
vk.com/Яруунын аймаг сайтын гэрэл зураг