676
Улаан-Үдэдэ «Гэр байра болон хотын оршон» гэһэн үндэһэтэнэй түсэлэй хэмжээндэ «Болбосон түхэлтэй хотын оршон» гэһэн түсэлөөр Алдар солын талмайда һэльбэн шэнэдхэлгэ ябуулагдана. Бүхыдөө улас дотор 2019 ондо 120 олониитын болон 112 гэр шадарха талмайнууд болбосон түхэлтэй болгогдохо юм. Заһабарилгын ажалнуудта 306 сая түхэриг хараалагданхай.
Стеклозаводой сэсэрлиг заһабарилгада 35 сая түхэриг һомологдоо. Эндэ ябаган харгынууд, олон зоной хабаадалгатай үнгэргэгдэхэ соёлой тайлманууд, тайзан, автомашина табиха газар, велосипедээр ябаха харгынууд, сэсэрлигүүд, зунай сагай уһанай һужаанууд хэгдэхэ юм. Ажаһуугшадай дурадхалаар «Сердце Стеклозавода» гэһэн архитектурын бүтээл гэрэлтүүлэгдэжэ табигдаха. Тиихэдэ баскетбол, волейбол, хоккей наадаха талмайнууд баригдаха. Заатагүй бургааһан, модон, ногоон таригдаха. Тиигэжэ заһабарилгын ажалнуудай һүүлээр сэсэрлигэй талмай 1,2 гектарһаа 3,1 га хүрэтэр ехэ болохо. Хотын үдэр болотор заһабарилга хэгдэхэ гэжэ түсэблэгдэнэ.
Буряад Уласай Толгойлогшо эндэ хэгдэжэ байһан ажалнуудтай танилсажа, ажаһуугшадай һаналаар ажал ябуулагдана гэжэ тэмдэглэбэ.
- Үнгэрһэн жэлдэ ажаһуугшадай дунда һанал хуряалга үнгэргэгдэжэ, хүнүүд хаана, ямар ажал хэгдэхэб гэжэ шэлэһэн байна. Үнгэрһэн жэлдэ гурбан түсэлөөр ажал хэгдээ. Стеклозаводой сэсэрлиг һанал хуряалгада дүрбэдэхи һуури эзэлһэн байна. Сэсэрлигэй талмай хоёр дахин шахуу хэ болгогдохо, - гэжэ Алексей Цыденов онсолбо.
Стеклозаводой ТОС-ой түрүүлэгшэ Антонина Дашеевагай хэлэһээр, сэсэрлиг һуурин шэмэглэхэ, тиихэдэ ажаһуугшад өөһэдөө барилгын ажалнуудые хинаха юм. Сэсэрлигэй нээгдэһэнэй удаа видеохиналтын «Умный город» гэһэн 16 камера тохогдохо.
