692
Улаан-Үдын Железнодорожно хороогой хүүгэд шэнэ поликлиникэдэ эмнэлгэ гараха. Буряад Уласай Толгойлогшо Алексей Цыденов хэгдэжэ байһан һэльбэн шэнэдхэлгын ажал хаража, эмнэлгын хэрэгсэлнүүдые худалдажа абалгада 14 сая түхэриг һомолхо тухай шиидхэбэри абаба.
Мүнөө Гагаринай гудамжада оршодог хотын хүүгэдэй 6-дахи поликлиникэдэ уйтан, хабшуу, талмайн хэмжээн бага. Хоёр дабхартай шэнэ поликлиникэ Пушкинай гудамжада оршоно. Энэ байшан хотын мэдэлэй байһанаа, 2017 ондо уласта дамжуулагдаа. 740 дүрбэлжэн метрэй байшанай заһабарилгын ажалнуудта уласай бюджетһээ 20,9 сая түхэриг дамжуулагдаа.
- Байшанай заһабарилга август һарада дүүрэхэ, тиихэдэ эмнэлгын хэрэгсэлнүүдые худалдан абалгада мүнгэн хараалагдаагүй байгаа. Хотын захиргаан энэ асуудалаар хандажа, элүүрые хамгаалгын яамантай 14 сая түхэриг һомолхо тухай шиидхэбэри абаһан байнабди, - гэжэ уласай хүтэлбэрилэгшэ хэлэбэ.
Санитарна эрилтэнүүдтэ тааруу эмнэлгын байшанда хүүгэдтэ һайн шанартай амбулаторно туһа хүргэхэ таһаг нээгдэхэ. Тиихэдэ эрэмдэг бэетэйшүүл болон һаадгүй оршондо эмшэдтэ хандаха аргатай байха юм. Хиналтын албануудһаа бүхы дансануудаа абаһанай удаа таһаг ажалаа эхилхэ.
