2019 оной түрүүшын хахад жэлэй туршада улас дотор һүнэй үйлэдбэри шалгагдажа, 654 һүнэй туршалганууд абтаһан байна. Тиихэдэ эрилтэнүүдтэ таараагүй һү үйлэдбэриин хэмжээн 2018 онтой жэшэхэдэ, 7,5 хубяар дээшэлһэн байна. Тэрэшэлэн шалгалтануудайшье тоо дээшэлээ гээд тэмдэглэлтэй. Энээн тухай Буряад уласай Роспотребнадзорой хүтэлбэриин мэдээгээр, Буряад Үнэн Хэблэлэй байшан дуулгана.
Шалгалтын дүнгүүдээр, һү болон һүнэй үйлэдбэри хадагалха талаар дүрим эбдэхэ ушар элирүүлэгдэһэн байна. Эдэ ушарнуудаар захиргаанай хэһээлтэ хараалагдаа.
Ородой Холбоото Уласай Засагай газарай 2019 оной июлиин 1-дэ абтаһан тогтоолой ёһоор, һү болон һүнэй эдеэ хоол дэлгүүрнүүдтэ наймаалагдахадаа, бусад эдеэ хоолһоо илгаруулхаар байжа, заатагүй «Һүнэй тоһо һэлгэһэн зүйлгүй» гэжэ бэшэгдэхэ ёһотой. Тиихэдэ наймаашад худалдажа байһан эдеэ хоол тухайгаа дүүрэн мэдээсэл харуулха ёһотой.
Эд хэрэглэгшэдэй эрхэ хазагайруулһан ушартай дайралдабал, Буряад уласай Роспотребнадзорой хүтэлбэриин эд хэрэглэгшэдэй эрхэ хамгаалха таһагта 8 (3012) 37 15 30 гэһэн утаһаар хонходожо болоно.
Һү болон һүнэй үйлэдбэри шалгаха талаар ажал үргэлжэлүүлэгдэһээр.