834
Буряад Уласай Хүдөө ажахын яаман, уласай мэдээсэлэй-методологическа түб болон Тарбагатай аймагай захиргаантай хамта «Куналей-Агро» бүлгэмдэ августын 2-то можо хоорондын «Полиин үдэр» гэһэн хэмжээ ябуулга үнгэргэхэ.
«Полиин үдэр» хадаа уласаймнай хүдөө ажахын һалбариин шухала хэмжээ ябуулгануудай нэгэн болоно. Тиимэһээ тарилгын ажал дэмжэхэ, ногоо, таряа ургуулгын, хүдөө ажахын машинануудай үйлэдбэриин, агрохимиин һалбариин дүй дүршэлтэй хубаалдаха зорилготой хэмжээ ябуулга эмхидхэгдэнэ.
Можо хоорондын хүдөө ажахын үзэсхэлэндэ үрэһэ, талха таряа аршалха зүйлнүүд, үтэгжүүлгэ, наранай элшын батарей, хүдөө ажахын техникэ (тракторнууд, комбайнууд, борона, анзаһа болон бусад) үйлэдбэрилэгшэд болон дилер-компанинуудай түлөөлэгшэд хабаадаха.
Хэмжээ ябуулгада «Агрозащита», «БурятАгроСнаб»,«Тимбермаш Байкал» бүлгэмүүд хабаадаха гэжэ уригданхай.
«Полиин үдэр» гэһэн үзэсхэлэнэй хэмжээндэ таряа, ногоо ургуулгын түрүү дүршэл харуулагдаха, техникын тусхай харалган үнгэргэгдэхэ юм.
Тиихэжэ «Эрхим газар хахалагша» гэһэн урилдаан эмхидхэгдэхэ. Энэ хэмжээ ябуулгада ехэ һургуулинуудай болон дунда мэргэжэлэй һургуулинуудай оюутад болон трактористнууд хабаадаха. Урилдаанда илагшадта мүнгэн шан барюулагдаха.
Буряад Уласта «Полиин үдэр» гэһэн хэмжээ ябуулга арбаад жэл шахуу үнгэргэгдөөгүй. 2018 ондо Мухар-Шэбэр аймагта эмхидхэгдэжэ, жэл бүри үнгэргэхэ тухай шиидхэбэри абтаһан юм. Мухар-Шэбэр аймагта хүдөө ажахын хэмжээ ябуулгада 200-гаад хабаадагшад байгаа һэн.
Буряад Уласай Хүдөө ажахын болон эдеэ хоолой яаманай хэблэлэй албанай гэрэл зураг
