814
Улаан-Үдын шубуунай фабрика 2021 ондо 20 хубяар хэрэгсэлнүүдэйнгээ ашаглалгануудые шэнэдхэжэ, 75 сая үндэгэ абахаяа хараална.
Июлиин 11-эй Пүрбэ гарагта Буряад Уласай Толгойлогшо Алексей Цыденов энэ үйлэдбэри ошожо, ажалшадаар уулзажа, ажал хэрэгынь сэгнээ. Улаан-Үдын шубуунай фабрика Буряад Уласай Засагай газарай туһаламжа дэмжэлгээр үйлэдбэриеэ үргэдхэжэ, ажал хэрэгээ дээшэлүүлнэ гэжэ уласай Толгойлогшо бодото дээрэнь сэгнээ.
Тэдэ 2021 он болотор 156 сая түхэриг үйлэдбэриингөө үргэдхэлгэдэ шэглүүлжэ, мүнөө 60 сая үндэгэ абадаг һаа, 75 сая үндэгэ абажа байхаар түсэблэнэ.
Мүнөө табин мянган дальбараануудые гаргаха цех һэльбэн шэнэлэгдээ. Сентябриин 1 болотор табин мянган эхэ тахяа байлгаха цех шэнэлэгдэн һайжаруулагдаха юм.
- Шэнэ үеын хэрэгсэлнүүдые ашаглаһанай ашаар аяар 50 мянган эхэ тахяа оройдоол хоёр хүн ажаллана. Иигэжэ гаргашанууд болон үндэгэнэйшье сэн доошолно, - гэжэ уласай Толгойлогшо урматайгаар тэмдэглээд, үйлэдбэриеэ хүгжөөжэ байһан ажалшадта баяр хүргэбэ. Тэдэнэр түрэл Буряадаа хангахаһаа гадна, хүршэ Монгол орониие үндэгөөр хангаха дүүрэн аргатай болоо ха юм.
2018 ондо 60 сая 2 мянган үндэгэ наймаанда гаргаа, тэрэ тоодо Монгол руу нэгэ сая үндэгэн ябуулагдаа һэн. Харин 2024 ондо 20 сая үндэгэн болон 15 тонно үндэгэнэй порошок Монгол орондо эльгээгдэхээр хараалагдана. Мүн баһа Үбэр Байгалай хизаарта өөрын дэлгүүртэй болохобди. Мүнөө ондоо можо хизаарнуудһаа асарагдаһан хямда үндэгэн элбэгээр наймаанда табигдана. Харин манай үйлэдбэриин үндэгэн элдэбын холисогүй, һайн шанартай гэжэ зон ойлгобол, үргэнөөр худалдан абаха гэжэ фабрикын захирал Виктор Дондоков мэдүүлээ.
Үшөө нэгэ шэнэ нэбтэрүүлгэ гэхэдэ, тахяагай аргал үтэгжүүлгэ болгохо арга нэбтэрүүлхэ. Энэ талаар шэнэ хэрэгсэлнүүд абтаха.
- Фабрикын эрхилэгшэд ганса олзо олохын түлөө эрмэлзэнгүй, баһал байгаалияа сахин хамгаалхые оролдонод. Гурбан котельни шулуун нүүрһэ хэрэглэхэеэ болижо, тахяагай аргалаар болон модо тайраһанай, түлеэ залһанай үлэгдэлнүүдээр түлигдэхэ. Энэл аргаар хүдэлхэ гурбан шэнэ котельни баригдаха. Тиигэжэ оршон тойронхи байгаалимнай ехээр бузарлагдахаяа болихо, - гэжэ Улаан-Үдын захиргаанай засаг даргын уялга дүүргэгшэ Игорь Шутенков мэдүүлээ.
- Шэнэ котельнинүүдые энэл жэлдэ хүдэлгэхэ һанаатайбди. Энэмнай ганса Буряадта бэшэ, бүхы гүрэн доторнай шэнэ нэбтэрүүлгэ гээшэ. Фабрикамнай хотын тэгэн дунда оршоно. Бидэ өөһэдөө эндэ ажаһуунабди, эндээл үри хүүгэднай өөдөө болохо. Тиимэһээ оршон тойроноо, агаараа сэбэр байлгаха гэһэн манай нангин уялга, - гэжэ Виктор Дондоков онсолон тэмдэглээ.
Үшөө тиихэдэ Улаан-Үдын шубуунай фабрика 2021 он болотор үндэгэ илгадаг шэнэ хэрэгсэл худалдан абаха, 300 мянган дальбараа дараха инкубатор байгуулха, өөһэдын комбикорм буйлуулха завод бариха, үндэгэнэй порошок үйлэдбэрилдэг цех шэнэлхэ.
Эдэ бүгэдэ ажалнууд Буряад Уласай Засагай газарай хүсэл дэмжэлгээр, Буряад Уласай Хүдөө ажахын яаманай туһаламжаар бэелүүлэгдэхэ.
Автор: Сэнгэ РИНЧИНОВ
