​Буряад Уласай Хори аймагта таряалангаа зайн галаар хамгаална

Баир Борбоевой гэрэл зураг

Нуга сабшалангаа, таряа талхаяа бэлшээриин адуу малһаа, хони ямаанһаа яагаад хамгаалха тухай олониитэ үнинэй бодолгото болодог. Теэд мүнөө болотор энэ шухала, хүндүүлхэй асуудал хүсэдөөр шиидхэгдээгүй байһаар гэхэдэ, нэгэ һайн мэдээсэл дуулдаба.

Хори аймагай Ааланай мэдээжэ олзын хэрэг эрхилэгшэ Василий Хамируев таряалангай газарнуудые зайн галаар хамгаалдаг болобо.

Василий Георгиевич Хамируев нютагайнгаа Дамдин Цыбиков, Степан Корытов, Мунко Мухужаев, Григорий Галкин, Евгений Батурин, Александр Эпов гэгшэдтэй хубиингаа газар тойруулан, баханануудые зоогоод, гурбан дабхар утаһануудые татажа, наранай гэрэлээр хүдэлдэг зайн галай хэрэгсэлдэ холбоо. Тэрэ иимэ “Электропастух” арга Эрхүү можодо хэрэглэнэ гэжэ танилсаа юм байна.

-Энэ арга саг соонь хэрэглэжэ, хорёолжо шадаа һаа, хабтагайгааршье, һургаагааршье хорёолхоһоо аша үрэтэй байна, - гэжэ Василий Георгиевич тоолоно. - Зайн галаар бага сага сохюулһан ямаршье амитан дахинаа дүтэлхэеэ болино. “Электропастух” гээшэ амитаниие алангүй, харин хүнгэхэнөөр хүрэжэ, айлгадаг юм байна. Дүхэһэн мал аһан ехээр сохюулбал, үбдэглэхэл юм байна. Урданай суранзатай сасуулжа боломоор: машина тракторайнгаа зайн галые үхибүүдтэ шалгуулхадаа, хэр дээрэ собхорноб гэжэ шалгаха арга байһан! Эжынэрэйнь сухалдахада, үри үхибүүдээ хатуужуулжа байнабди гэжэ харюусадаг һэн.

Баир Борбоевой гэрэл зураг

Василий Георгиевич Хамируев 60 гектарта обёос болон олон жэлэй суданска ногоо таряа. Зунай эхеэр ороһон бороондо тэдэнь яһала ургаба. Урмашаһан Василий Георгиевич сабшаланайнгаа болон тарилгынгаа газарнуудые үргэдхэхэ гэжэ шиидэнхэй. Юундэб гэхэдэ, тэрэнэй үдхэдэг эбэртэ бодо мал симментал үүлтэрэй аад, илангаяа Мухар-Шэбэрһээ асарһан үнеэдынь тала нугаар бэлшэхэһээ байтагай, бэлдээтэй бэлэн янза бүриин үбһэ ногоо эдидэггүй. Тиимэһээ тэрэ һайн шанартай хоол бэлдэхэ гэжэ ехэ оролдолго гаргана.

Тиихэдэ Василий Хамируевта болон хүдөөгэй ажахынуудта онсолон тэмдэглэхэдэ, Хориин Чингис Базардараевай Хубиин эрхилэгшэдтэ туһаламжа үзүүлдэг сан жаса ехэ туһа хүргөө гэжэ тэдэ баяртайнууд.

-Ааланай Василий Хамируевай үүсхэлые дэмжэмээр хэрэг, - гэжэ аймагай хүдөө ажахын таһагай дарга Виктор Хабитуев мэдүүлнэ. – Энэ шэнэ аргые шэнжэлжэ үзөөд, бултанда нэбтэрүүлхэ һанаатайбди, ашаг үрэнь ехэ байха ёһотой.

Урдандаа зайн галай ашаар амитадһаа байха хулгайшадые зайсуулха гэжэ хэрэглэһэн ушарнууд амитадайшье, хүнүүдэйшье гээлтэ хороолтоор дүүрэжэ, иимэ аргануудые хэрэглэһэн зон хууляар хэһээгдэһэн юм. Тиимэһээ энэ аргые нарибшалан шэнжэлээд, хоёр хүлтэ хүндэ, дүрбэн хүлтэ малда хохидол үзүүлхэгүй гэжэ тордорхойлоод лэ, хэрэглэхэ юм ааб даа.