Алас Дурнын туһаламжа мүнгөөр Аха аймагта мүнөө жэл социальна һалбариин эмхинүүдэй дүрбэн байшан баригдаха, заһабарилагдаха. Энээн тухай аймагай захиргаанай мэдээсэлэй албан һаяхана дуулгаһан байха юм.
Сорог тосхоной хүүгэдэй “Улыбка” сэсэрлиг болон соёлой байшанай барилга дүүргэгдэхэ түсэбтэй. Мүн тиихэдэ Хара Хужарай болон Богсооной эхин һургуули-хүүгэдэй сэсэрлигүүдэй байшанууд һэльбэн шэнэлэгдэхэ. Барилга, заһабарилгада дүн хамта 33 сая түхэриг һомологдонхой.
Хэгдэжэ эхилээд байһан ажалнууд тухай Аха аймагай нютагай засагай байгууламжын захиргаанай Болбосоролой хүтэлбэриин дарга Баясхалан Цыбденов аймагай зүблөөн дээрэ хөөрэжэ үгөө гээд, хэблэлэй албан мэдээсэнэ.
Тэрэнэй хэлэһээр, Богсооной һургуулиин байшанай дулаасуулгын соргонуудые заһабарилха, мүн тиихэдэ ханануудыень досоо талаһаань дулаалха, үһээ, оёор шалыень шэнэлхэ талаар бэлэдхэл хэгдэнхэй.
Харин Хара Хужарай һургуулиин шаланууд, хана, үһээнь тэгшэлэгдэнхэй. Гадна, үхибүүдтэ халуун эдеэ хоол бэлдэхэ газарынь шэнэлүүлэгдээд байна. Сорогой хүүгэдэй сэсэрлигэй байшанай сонхонууд тодхогдонхой, шалань дэлгэгдээ. Мүнөө досоо талын ажалнууд хэгдэжэ байнхай гээд, аймагай болбосоролой хүтэлбэриин дарга мэдээсээ.
Алас Дурнын федеральна тойрогто Буряад Уласаймнай ороһоной ашаар Аха аймагай Һоёдой сомоной түб болохо Сорог тосхондо соёлой шэнэ байшан мүнөө жэлдэ баригдажа дүүргэгдэхэнь. Тэрэниие ашаглалгада тушаахын түлөө 8,33 сая тухэриг һомологдонхой гэнэ. 240 дүрбэлжэн метр дэбисхэртэй соёлой энэ гуламтада 80 харагшын багтажа һуухаар тоглолтын томо танхим, номой сан, зүжэгшэ, бүжэгшэ зоной хубсаһаа һэлгэхэ таһалганууд байха юм.
Сорогой соёлой байшан хоёрдохиёо шэнээр баригдажа байна гэжэ тэмдэглэхэ хэрэгтэй. Үсөөн тоото үндэһэн арадуудта үзүүлэгдэдэг мүнгэн туһаламжаар урид баригдаһан байшаниинь 2015 ондо түймэртэ дууһан шатаһан юм. Тэрэ гэһэнһээ хойшо сорогойхид һургуулиингаа спортын багахан танхимда сугларжа, хамаг найраа үнгэргэдэг юм. Нютагай номой сан сомоной захиргаанай байшанда багахан таһалга соо байрланхай.
Буряад Уласай Толгойлогшо Алексей Цыденов уласайнгаа арад зондо болон Арадай Хуралда үнгэрэгшэ хабар хэһэн хандалга дотороо Сорогой соёлой байшанай барилга тухайшье дурдаһан байха юм.
“Хамтаржа ажал хэхэ, ямаршье хэрэг бүтээхэ гээшэ тон шухала. Хүн зон өөһэдөө гаража, хүсэ шадалаа элсүүлхэдэ һайн. Сорог тосхондо хүнүүд өөһэдөө арадай аргаар соёлой байшан барижа эхилээ. Хахадынь бүтээгээ, тиимэһээ бидэ тэдэндэ арсаха аргамнай үгы байгаа – барилгаяа дүүргэхэ ажалдань, мүн доторынь хэрэгтэй юумэ абаха мүнгэ һомолоо һэмди”, - гээд уласай дарга тэмдэглээ.