969
Үнгэрһэн долоон хоногто Буряад Уласай Үйлэдбэриин болон худалдаа наймаанай яаманай, мүн «Минии бизнес» гэһэн түбэй, Улаан-Үдэ хотын Олзын хэрэг эрхилэлгэ хүгжөөлгын жасын түлөөлэгшэд Аха аймагай Захиргаанай мэргэжэлтэдтэй уулзаба.
Тэрэнэй хэмжээндэ «Минии бизнес» түб болон Олзын хэрэг эрхилэлгэ хүгжөөлгын жаса арад зондо дурадхадаг үйлэшэлгэ тухайгаа хөөрэжэ үгэхэдэнь, ахынхид өөһэдынгөө үйлэдбэрилһэн эд бараа хайшан гэжэ дэлгүүртэ гаргажа наймаалхаб, худалдаанай сахим талмайнуудта яагаад бүридхэгдэхэб гэхэһээ эхилээд, татабари түлэхэ, урьһаламжа абаха, фермернүүдые дэмжэхэ болон бусад асуудалнуудаар зүбшэл үгэхыень Улаан-Үдэһөө ерэһэн мэргэжэлтэдые гуйгаа.
Уулзалгын түгэсхэлдэ Буряад Уласай Үйлэдбэриин болон худалдаа наймаанай орлогшо сайд – Олзын хэрэг эрхилэлгэ болон шэнэ үеын технологи нэбтэрүүлгын хорооной дарга Екатерина Кочетова Аха аймагай Захиргаанай мэргэжэлтэдтэ Бага болон дунда хэмжээнэй олзын хэрэг эрхилэлгэ дэмжэхэ талаар Үндэһэн түсэлэй хэр зэргэ бэелүүлэгдэжэ байһан тухай хөөрэхэһөө гадна, уласай дэбисхэр дээрэ мэргэжэлэй олзо оршоһоо татабари түлэгдэдэг болохоор түсэблэгдэнэ гэжэ мэдээсээ.
Нүүдэл зүблөөндэ хабаадагшад аймагай худалдаа наймаанай газарнуудаар ябаа, «Аха» гэһэн айлшадай бууха гэрэй, һоёд угсаатанай соёлой түбэй, хүдөөгэй алим жэмэс, эм домто ургамал суглуулжа буйлуулдаг хизаарлагдамал харюусалгатай «Саяны» бүлгэмэй болон һэеыгээр элдэб зүйлнүүдые урлан бүтээдэг үйлэдбэриин ажал ябуулгатай танилсаа.
Тиигэжэ «Саяны» бүлгэм байгша онһоо ангай болон һарлагай мяхаар тушёнко үйлэдбэрилжэ эхилээ. Энэ хэрэг эхилхэдэнь, «БайкалЭкоПродукт» гэһэн эмхи бүхы түсэлыень бэлдэхэһээ гадна, мяха буйлуулха тоног түхеэрэмжыень бүтээжэ үгөө. Үйлэдбэриинь хэмжээн мүнөө дээрээ тиимэ ехэ бэшэшье һаа, арад зоной дунда яһала эрилтэтэй. Улас дотороо наймаалагдахаһаа гадна, хүршэ можо нютагууд руушье гаргагдана.
Буряад Уласай Үйлэдбэриин болон худалдаа наймаанай яаманай мэдээсэлэй албанай гэрэл зураг
