​Һунгалтын үмэнэ

«Хэн нэгэнэй дали доро заатагүй орохоб. Мүрыень дахажа, мүнгыень һаажа үрдихэ хэрэгтэй. Тиихэдээ уладай шэхэн дээрэ һуужа, үгөөрөө үльгэрэй орон байгуулжа мэдэхэб”.

Зарим сэтгүүлшэдэй иимэ хүсэд һанаатай байтар, һунгалтын урда тээхи хүлгөөтэ үе хүлеэлтэгүй хүрэжэ ерэбэ. Сентябриин 8-да түгэсэхэ энэ түүхэтэ үйлэ хэрэгэй үмэнэ «тоглолтонууд» тоогүй олон байха аабза. Аяар арбан нэгэн хүн Улаан-Үдын мэрэй тушаал эзэлхын тулада һунгалтада оролсохо тухай мэдүүлгэ бэшээд байна. Тэдэнэй үнэмшэлгэ гартаа баритар, үшөөшье юу-хээн боложо магад.

Түрүүшын «тоглолто»

Улаан-Үдын Захиргаанай бузарыень арюудхахамни гэжэ буһалгаа үүсхэжэ ябатараа, Батодалай Багдаев ажалгүй үлэшэбэ. «Нохойтой үһэрилсэхэ - хормойгүй, ноёнтой үһэрилсэхэ – толгойгүй» гэдэг буряад арадай сэсэн мэргэн үгэ Батодалай мэдээгүй гээшэ гү? Мэдэхын ехээр мэдээ ааб даа! Теэдшье зоной урда зоргоороо «тоглолто» харуулжа ябадаг Батодалайн мүнгэ олохо мүрөөдэлтэ сагынь буунхай бшуу. «Урид хуу хэлсээтэй. Табан сая мүнгэ абаа гэлсээ һэмнай. Олоной анхарал татажа, олоо болоһон мүнгөөрөө халуун орон руу дахинаа ошоод, наран доро бэеэ шаруулжа жаргахань гээбы», - гэжэ хөөрүү хоёрой шэбэнэлдэхыень дуулаа һэм. Нээрээ гү, али худал гү? Һунгалтын үмэнэ хэндэшье этигэмээр бэшэ. Теэдшье Батодалайн олондо һонирхолтойень тэмдэглэхэ хэрэгтэй. Үгы һаань, үдэрнүүднай бороор үнгэрхэ һэн. Зүб гү?

Ори ганса эхэнэр оролдохол бэзэ

Арбан эрэшүүлтэй ана-мана тулалдахаар бэлэн байһанаа Евгения Балтатарова мэдүүлээ. Баһал сэтгүүлшэн. Мүн лэ мүнгэндэ хэрэгтэй гэжэ уладай хэлсэхыень дууланаб. Батодалайдал халуун ороноор ябаха дуратай ха юм.

Сэхыень хэлэхэдэ, арбан эрэшүүлые түлхеэд, түрүүлжэ гарахань мэдэгдэнэгүй. Партиин шугамаар бэеэ мэдүүлээ бэшэ хадаа, өөрынгөө түлөө олоной гар табюулжа үрдихэ гү? Үнэмшэлгэ гартаа барижархёо һаань, бүри гүнзэгыгөөр хараалаад туршуужамди.

Улаан тугаа үргөөд

Дээрэ дурдаһан хоёр нэрэнүүдһээ гадна Алексей Карнаухов, Евгений Меньшиков, Алексей Хандархаев, Мункожап Бадмаев, Николай Красиков, Геннадий Бадмаев, Вячеслав Мархаев, Николай Чимитов, Игорь Шутенков гээд уншанабди. Эдэ олон нэрэнүүд соо одоол төөришэхөөр. Гэбэшье Вячеслав Мархаев Игорь Шутенков хоёр бодотоор мэр болохо адли шадалтай.

Засаг баригшадта олонхи зон этигэхэеэ болижо байна. Найдал түрүүлээд, үнэн дээрээ хэһэн хэрэгүүдынь харагданагүй гэхэ мэтын шүүмжэлгэ тараажа, Вячеслав Мархаев улаан тугаа үргөөд, урагшаа дабшаха байха. Өөрөөшье ехээр шүүмжэлүүлнэ. Наһатай болоо, нарбаа сайгаа, хүсөө буураа гэхэһээ эхилээд, Буряадай улаантаниие ударигша тухай һураг суу тарана. Теэдшье хүсэ шадалай байгаал хада һунгалта руу шуумайн орожо ябаа аабза.

Засаг баряад

Мүнөө Игорь Шутенков мэрэй уялга даагаад ябана. Хотын бэрхэшээлнүүдые нюдөөрөө хаража байна. Яагаад шиидхэхэ тухай ойлгохо болонхой. Теэдшье тиимэ бэлээр илажа шадахагүй байха гээд һанагдана. Хараял даа, юун бологшо ааб?

Олоной хүсэл

Улаан-Үдэ хотомнай үзэсхэлэнтэ һайхан боложо, ажабайдалнай һайжарһай гээд, хүн бүхэмнай хүсэнэ гүб даа. Уншагшад, танайл ашаар энэ хүсэлнай хүсэлдүүлэгдэжэ болохо. Зүбөөр һунгажа, хүгжэлтын зүг руу зориё!