Тус асуудал Буряад Уласай Толгойлогшын зүблөөндэ хэлсэгдээ. Хүүгэдэй сэсэрлигүүдтэ ээлжээнэй усадхагдаагүй байһанһаа боложо, улас доторнай һургуулиин урда тээхи болбосоролой ажал ябуулга эрхилхэ талаар элдэб түхэлнүүд хараалагдана гээд ойлгосотой. Үмсын сэсэрлигүүдтэ 1 үхибүүе харууһалалгада гэжэ үгтэдэг мүнгэ 3000 түхэригһөө 6000 болотор дээшэлүүлээ һаа, үшөө 1500 нэмэлтэ һуури байгуулха арга боломжо бии юм ха.
Буряадай Болбосоролой болон эрдэм ухаанай сайд Баир Жалсановай мэдээсэһээр, улас дотор 25 үмсын сэсэрлиг ажалаа ябуулна, тэндэнь 2400 үхибүүн хүмүүжүүлэгдэнэ. Һургуулиин урда тээхи болбосорол хангадаг аралжаанай бэшэ эмхинүүдтэ болон үмсын хэрэг эрхилэгшэдтэ мүнөө дээрээ дүн хамтадаа 128 сая түхэригэй дэмжэлгэ үзүүлэгдэнэ. Тиигэжэ тэдэнэй урда гүрэнэй сэсэрлигэй түлбэриһөө 200 хубиһаа дээшэ мүнгэ гэртэхинһээ абахагүй гэһэн эрилтэ табигдана. Гадна 2017 оной октябриин 6-да абтаһан Буряад Уласай 486-дахи Тогтоолдо оруулагдаһан хубилалтануудай хүсэндөө ороходонь, үмсын болон гүрэнэй сэсэрлигүүдэй түлбэри тэнсүү болгогдожо, үмсын сэсэрлигүүдтэ ябадаг үхибүүдэй тоо улам дээшэлхээр хараалагдана.
Урдань үмсын сэсэрлигтэ ябаха хүсэлтэй хүнүүд гүрэнэй ээлжээнһээ гараха эрилтэ табигдадаг байһан һаань, мүнөө энээнииень болигохо үүсхэл мүн лэ яаманай зүгһөө гараба. Тиигэхын тула Улаан-Үдэ хотын тусхай Тогтоолдо хубилалтанууд оруулагдаха зэргэтэй.
- Үмсын сэсэрлигүүдтэ нэмэлтэ һууринуудай байгуулагдахада, хоёр шухала эрилтэ табиха хэрэгтэй. Нэгэдэхинь - түлбэриин асуудал, нүгөөдэнь – болбосоролой шанар гүрэнэй эмхи зургаанһаа дутуугүй байха ёһотой, - гэжэ Буряадай Толгойлогшо Алексей Цыденов тэмдэглэнэ.
Гэхэ зуура, Буряад орондо һургуулиин урда тээхи болбосоролой һалбари улам хүгжөөхэ талаар ажал үргэлжэлһөөр. «Хүн зоной тоо бүридэл» гэһэн үндэһэн түсэл бэелүүлгын хэмжээндэ 2021 он болотор 12 хүүгэдэй сэсэрлиг баригдахаар түсэблэгдэнэ. Ородой Холбоото Уласай Засагай газарай Зарлигаар 2 һаратайһаа 3 наһатай болтор үхибүүдтэ нэмэлтэ һууринуудые байгуулха талаар арга хэмжээнүүдые абахын тула манай уласта 755 сая түхэригэй туһаламжа (1140 һуури нээхын түлөө) хараалагданхай. Энээнэйнь ашаар Улаан-Үдэ хотодо 5 сэсэрлиг худалдан абтаха ёһотой.
Тиигэжэ 2018 оной декабрь соо Улаан-Үдэ хотын 104-дэхи кварталда 240 һууритай 2 сэсэрлиг абтаа, тэрээндэ 454 сая түхэриг гаргашалагдаа. Харин 2019 ондо үшөө 3 сэсэрлиг абтахаар түсэблэгдэнэ.