​​Үертэ хохидоһон үхибүүд Улаан-Үдэ ерээ

Эдир айлшад Улаан-Үдэ ерэбэ

Эрхүүгэй ехэ үертэ хохидоһон бүлэнүүдэй 160 үхибүүн үнгэрһэн амаралтада Буряадтамнай буужа, Загарай аймагта оршодог “Дружба” лагерьта байрлаба.

Уласай даргын урилгаар

Урда һарын эсэстэ хүршэ Эрхүү можымнай хэдэн аймагта, эгээл һүрөөтэйгөөр Тулун хотодо туйлай ехэ үер боложо, хэдэн мянган зон хохидоһон байгаа. Буряад Уласай Толгойлогшо Алексей Цыденов үерэй уһанай үшөө буугаагүйдэ үхибүүдые наашань уриһан юм.

Үнгэрэгшэ гарагай долоондо түмэр замаар томошуулайнгаа харууһан доро айлшалжа ерэһэн 160 хүүгэдые Улаан-Үдын вокзал дээрэ Буряад Уласай Болбосоролой болон эрдэм ухаанай сайдай нэгэдэхи орлогшо Галина Фомицкая, Спортын болон залуушуулай бодолгын сайдай орлогшо Татьяна Парпаева, багшанарай колледжын коллектив, Илалтын волонтёрнууд, Россиин залуушуулай холбооной түлөөлэгшэд угтажа абаа. Энээн тухай Болбосоролой болон эрдэм ухаанай яаманай хэблэлэй албан тэрэ үдэртөө шууд мэдээсээ.

Үертэ хохидоһон бүлэнүүдэй 2 мянга гаран үхибүүд элүүржүүлгын лагерьнуудта эльгээгдэхэ гээд гүрэн түрын Засагай газарай Түрүүлэгшын орлогшо Виталий Мутко дуулгаа һэн. Аймшагтай аюулай һүүлээр хохидоһон айл бүхэн хүшэр байдалда оронхой. Гэр байра, эд зөөриеэ нэгэ үдэрөөр алдаһан зоной саашанхи ажабайдалаа хайшан гэжэ зохёохоёо ойлгожо ядаад байхада, үхибүүдэйнь зунай амаралтые зохёохо уялга Сибириин болон Алас Дурнын олон нютаг можонууд, тэрэ тоодо манай улас, даажа абаа.

Зохид оршон зохёогдоо

Эдир айлшаднай Буряад Уласай багшанарай колледжын “Дружба” лагерьта 21 үдэр амарха. Тэрэ эмхи зургаанай багшанар, оюутад болон волонтёрнууд үхибүүдтэ зохид тааруу оршон байдал зохёохо гэжэ ехэтэ оролдоо. Сэдьхэлэйнь байдалые баһал тэниилгэхэ талаар багшанарай колледжын психологууд ажал ябуулха юм.

– Эрхүү можоһоо ерэһэн 6-һаа 16 хүрэтэр наһатай 160 үхибүүдые угтабабди. Тэдэнтэй хамта 16 томошуул ерэлсээ. 21 хоногой туршада байрлаха лагерьтань Артегтэ бэлэдхэл гараһан хүмүүжүүлэгшэд айлшадтаймнай ажал ябуулха, - гэжэ Галина Фомицкая хөөрөө.

Буряад Уласай Болбосоролой болон эрдэм ухаанай яаманай мэдээсэлэй албанай гэрэл зураг

Хүршэ можын хүүгэд “Дружба” лагерьта байхадаа, сэбэр агаарта үдэр бүри сэнгэн наадаха, элдэб хэмжээ ябуулгануудта хабаадаха. Болбосоролой болон эрдэм ухаанай яаманай мэдэлдэ байһан хүүгэдэй түбүүд һонирхолтой уулзалгануудые бэлдэнхэй. Гарагай 1-дэ лагерьта шэнэ халаанай нээлтын баяр боложо, айлшан ерэһэн үхибүүд сэнгээ, манай эндэхи мэдээжэ дуушадай тоглолтодо хамта дуулалдажа, хатаржа хүхеэ.

Уһанһаа ушарһан хохидол усадхаха

Хэдэн үдэрэй туршада хүнэгөөр адхаһандал хура бороон орожо, хүршэ можодомнай хүндэхэн байдал тогтоо һэн. Хэдэн аймаг, тосхон сэлеэнгүүд, бага хотонууд уһанда абтаа. Эгээл ехээр Тулун хото хохидоо бшуу. Ияа мүрэнэй уһан аюултай хэмжээнһээ хоёр дахин ехээр нэмэжэ, 7-ной орондо 14 метр боложо, эрьеһээ халяад, тодхор асараа. Ухта тосхоной хажуугаар урдадаг Аха мүрэн эрьеһээнь 10 метр үндэрэй зайда хүрөө һэн. Нижнеудинск хото худар Үдэ гол, Мишелёвка тосхон шадар Белая мүрэн үерлэжэ, аюул асардаг хэмжээнһээ тус тустаа 2,5 – 3 метрээр булюу болоо гэнэ. Үертэ абтаһан газарнуудһаа 2600 гаран хүниие нүүлгэһэн байха юм. Энэ һарын тэнгэй мэдээгээр, дүн хамта 25 хүн уһанда орожо, наһа бараа.

Эрхүү можын Амбан захирагша Сергей Левченкын хэлэһээр, гушаад миллиард шахуу түхэригэй хохидол хүршэ нютаг можодомнай үзүүлэгдээ бшуу.

Ородой Холбоото Уласай Юрэнхылэгшэ Владимир Путин хоёр удаа ерэжэ, онсо байдалда ороһон эрхүүгэйхидтэй уулзаа, хэдэн суглаа хурал ноёд һайдтай үнгэргөө. Юрын зондо туһаламжа үзүүлхэ тухай олон тоото шиидхэбэринүүдые шууд түргэн абаһан байха юм. Гүрэнэй толгойлогшын тусхай зарлиг энэ һарын эхиндэ нара хараа. Уһанай аюулда хохидоһон хүнүүдтэ мүнгэн туһаламжа тарааха, гэр байрануудыень үтэр заһабарилха, шэнээр бариха ажал эхилэнхэй.