​​«Болбосорол» гэһэн Үндэһэн түсэл: Улаан-Үдэ хотодо Эрдэмэй харилсаа холбооной байшан бии болохонь

«Эрдэмэй харилсаа холбооной (коллаборациин) байшан» гэһэн Хүүгэдэй нэмэлтэ һуралсалай түбтэ жэл бүри 400 гаран үхибүүд техническэ болон байгаали шудалалгын һалбаринуудаар дүршэл шадабарияа түлөөһэгүйгөөр хүгжөөн мүлирүүлхэ аргатай болохонь.

«Болбосорол» гэһэн Үндэһэн түсэлэй программануудые бэелүүлхэ талаар ажал ябуулга Буряад Уласта үргэлжэлһөөр. 2019 ондо «Үхибүүн бүхэнэй амжалта» гэһэн можо нютагай хэмжээнэй түсэлэй үндэһөөр хүүгэдэй нэмэлтэ һуралсалай түбүүдые байгуулха мүрысөөндэ манай улас илалта туйлаа.

- Эрдэмэй харилсаа холбооной байшан Доржи Банзаровай нэрэмжэтэ Буряадай гүрэнэй ехэ һургуулиин бүридэлдэ байха юм. Технологиин, биологиин болон бусад һуралсалай таһалгануудые тусхай тоног түхеэрэмжэнүүдээр хангаха хэрэгтэ 8,3 сая түхэриг һомологдохо, - гэжэ Буряад Уласай болбосоролой болон эрдэм ухаанай сайд Баир Жалсанов хөөрэнэ.

Энэ түб БГУ-гай гол байшанда (Смолиной гудамжа, 24а) байрлаха. Буряадай гүрэнэй ехэ һургуулиин эрдэмтэ багшанар хүүгэдэй проектнэ бүлгэмүүдые өөһэдөө харгалзалан ударидажа байха юм. Тус программын ашаар үхибүүд хамтын ажалай дүршэл оложо, гүрэн түрын, эдэй засагай, эрдэм шэнжэлгын талаар бодомжолхо, шэнэ юумэ зохёохо шадабаритай болохо ёһотой.

Эрдэмэй харилсаа холбооной байшанай бүридэлдэ «Хүүгэдэй ехэ һургуули», «Бага академи», «Технологиин хэшээл», «Биологиин хэшээл», «Багша К-21» гэһэн табан һуралсалай һалбаринууд байгуулагдаха. 2019 оной октябриин 1-дэ нээгдэхэ тус байшанда 5-дахиһаа 11-дэхи болотор ангиин һурагшад болон багшанар түлөөһэгүйгөөр һуралсал гараха аргатай байха гэжэ тэмдэглэлтэй.

«Болбосорол» гэһэн Үндэһэн түсэлэй шугамаар 2024 он болотор Буряад Уласта 5,5 миллиард түхэриг һомологдохо гэжэ һануулая. Тиигэжэ 300 һургуулинуудай материально-техническэ бааза шэнэлэгдэхэ, мүн 2021 он болотор гурбадахи ээлжээн усадхагдаха ёһотой. Гадна үхибүүдтэ нэмэлтэ һуралсал үзүүлхэ талаар ажалаа эршэдүүлхэ зорилготойгоор манай уласта «Үхибүүн бүхэнэй амжалта» гэһэн түсэл бэелүүлэгдэнэ. Тэрээндэ 60 сая түхэриг һомологдонхой.

Буряад уласай Болбосоролой болон эрдэм ухаанай мэдээсэлэй албанай гэрэл зураг