​Буряад уласай Тарбагатай аймагта ​“Таряаланай үдэр” эмхидхэгдэхэ

Мүнөө жэл “Таряаланай үдэр” Тарбагатай аймагта августын 2-до үнгэргэгдэхэ гэжэ үшөө дахин дуулганабди. Энэ ехэ зүб: юундэб гэхэдэ, энэ аймаг үрэжүүлгын, үрэһэ хүрэнгэ бэлэдхэлгын талаар Буряадтаа түрүү зэргэдэ ябана ха юм. Эндэ аяар гурбан ажахынууд үрэжүүлгын ажал үргэнөөр ябуулна. Тэдэ таряа сэбэрлэлгын мүнөө сагай хэрэгсэлнүүдые, минеральна үтэгжүүлгэнүүдые, таряагаа аршалха химикадуудые үргэнөөр хэрэглэдэг юм.

“Таряаланай үдэртэ” хүдөө ажахыда мүнөө хэрэглэгдэдэг эгээл түрүү арганууд, техникэ, хэрэгсэлнүүд гээд лэ гол шухалань үрэһэ хүрэнгэнүүд харуулагдаха. Эгээл бэрхэ түрүү таряашад дүй дүршэлөөрөө хубаалдаха. “Таряаланай үдэрые” эмхидхэгшэд жэшээтэ таряалан харуулхаһаа гадна, агротехническэ түрүү аргануудые яажа хэрэглэхэб, хайшан гэжэ эрхим дүнгүүдые туйлахаб гэжэ һайн һургуули гаргаха.

Хайшан гэжэ мүнөөнэй олон янзын үрэһэ хүрэнгэнүүд болон тэдэниие аршалха аргануудые шэлэхэб гэжэ таряашад Василий Николаевич Аргуновай таряаланда ойлгожо абаха.

Эндэ туйлагдаһан амжалтанууд – “Россельхозцентр” болон “Госсорткомиссия” эмхинүүдтэй ябуулһан хамтын ажал юм. Эдэ эмхинүүд 50 янзын үрэһэ үзэсхэлэндэ дэлгэхэ. Тэрэ тоодо хабар таридаг тритикале, суданска ногоон, рапс, могар, кукуруза (Воронежскэ можын “Золотой початок” ажахы), шэниисэ, ешмээн, обёос.

Суданска ногоон – Африка түбиин юм, тиимэһээ ган гасуурта абтадагггүй. Нэгэ жэлээр ургадаг энэ ногоое сенаж, силос болгон үйлэдбэрилхэдэ ехэ ашагтай һайн. Харин тритикале гээшэмнай шэниисэ хара таряан хоёрой холисо гээшэ. Тэрэ шэниисэдэ ороходоо үшөө ехэ белогтойгоороо илгардаг. Энэ таряа хилээмэ барихадаашье болон малайшье тэжээлдэ үргэнөөр хэрэглэдэг.

Удаань “Куйтунское” ажахын таряаланай газарта сэбэр паарта таригдаһан шэниисэ болон намар хахалагдаһан паарта таригдаһан тритикале таряануудай ургаса хаража сэгнэхэ. Суданска ногоо КСУ-1 косилкаар яажа сабшанаб, тиигээд ПРФ-145 пресс-подборщигоор яажа ябталнаб гэжэ бодотоор хараха. Мүн тиихэдэ культиватор шэрэһэн К-700 гэһэ аһан томо “Кировец” трактор хайшан гэжэ “Куналей-Агро” ажахын таряаланай газар элдүүрилнэб гэжэ хараха аргатай.

“Таряаланай үдэртэ” хабаадагшадта мүнөө сагай бүхы техникэ, таряалангай ажалда хэрэглэхэ хэрэгсэлнүүд, үрэһэ хүрэнгэнүүд, тэдэниие арашалан хамгаалха арганууд, элдэбын минерална болон био-үтэгжүүлгэнүүд, мүнөө сагай наранай элшээр хүдэлдэг батарейнүүд гээд лэ олон ондоо һонирхолтой гэхэдэ, тон аша туһатай зүйлнүүд олоной һонорто табигдаха. 

Буряад уласай хүдөө ажахын болон эдеэ хоолой яаманай мэдээсэлэй албанай гэрэл зураг