Июлиин 26-да Бэшүүрэй дэбисхэр дээрэ Фермерэй үдэрые Буряад Уласай Хүдөө ажахын болон эдеэ хоолой яаман эмхидхээ. Гол хэмжээнүүд Шэбэртэдэ үнгэрөө. Тэндэ хэһэн тэмдэглэлнүүдээ “Буряад үнэнэй” штатна бэшэ сурбалжалагша Цырендондок Зандраев эльгээбэ.
Угтамжа
Бэшүүрэй аймагай хойто хилые барижа байһан Шэбэртэ һууринай “Хүтэл” гэһэн угтамжын газарта нютагай захиргааниие ударидагша сомон дарга Цырен-Дондок Цыдыпович Шоймполов түрүүтэй соёлой байшанай хүдэлмэрилэгшэд, Бэшүүрэй хүдөө ажахын үйлэдбэринүүдэй хамжаанай дарга Альбина Васильевна Кондакова, аймагай засаг даргын орлогшо Артём Андреевич Митапов болон хубиин ажахынуудые хүтэлэгшэд Буряад Уласай Хүдөө ажахын болон эдеэ хоолой сайдай уялга дүүргэгшэ Юлия Григорьевна Дагдановае, яаманай мэргэжэлтэдые, мал эмнэлгын хэлтэсэй, В.Р. Филипповэй нэрэмжэтэ Буряадай хүдөө ажахын академиин болон аймагуудай түлөөлэгшэдые угтаба.
Арадайнгаа ёһо заншалаар ерэһэн айлшадта хадагуудые барюулжа, сагаан эдеэнһээ ама хүртөөбэ. Удаань үдэрэй түсэбөөр хаана юун болохоб гэжэ танилсуулаа.
Урда үдэрнүүдтэ бороо хура орожо, бүхы байгаалимнай һэргэжэ, тала дайдамнай ногоорһон байгаа.
Хүтэлһөө зүүлжээ зүг барин
Хүтэлһөө зүүн зүг тээшэ 10 модоной газарта оршодог Амгаланта гэжэ һайхан нютагта аха дүү Алдар ба Юрий Цырендоржиевуудай ажахы харахаяа ошобод. Удаань үшөө зүүлжээ 3-4 модоной газарта байрлаһан залуу фермер Амгалан Ринчиновэйдэ хүрэбэ.
Һаянай ороһон бороо хураһаа боложо, Цыдендоржиевуудай сабшалан һайнаар ургаа, үбһэ ногоониинь бүшмэг, үндэр. Алдар Цыдендоржиевай сабшалан дээрэ үбһэ сабшалгын урилдаанда бэрхэ хажууршан Хонхолын Валерий Сукнёв түрүү һуури эзэлээ.
Эхилжэ байһан Амгалан Ринчиновэй гэр байрань, сабшаланиинь наринаар хорёолоотой гээд адаглахаар.
Үмсын ажахы үүсхэгшэд тухай
Шэбэртэдэ фермернүүдэй семинар эмхидхэгдэһэниинь ушар удхатай. Нютагтамнай үмсын хүдөө ажахы, үйлэдбэри олошоржо, адуу мал олон болонхой. Һүүлшын 3-4 жэл соо бэрхэ фермернүүд грантда оролсоо. Үмсын ажал нээгшэдые хараалая. Жэшээнь, Золто Цыбикжапов Нарин-Заган нютагаа һэргээхэ дуратай, тэндэхи аршааниие саашадаа олондо хэрэглүүлхэ түсэбтэй. Александр ба Елена Аюшеевүүд малайнгаа байра, харша хорёогоо, посхоодоо шэнээр бодхоогоо. Баяр Бадмаев баһа бэрхэ, ажалша, хүндэ хүдэлмэриһөө сухаридаггүй, олондо жэшээ харуулхал байха.
Шэтэ хотодо жэл бүри үнгэрдэг нютаг можонууд хоорондын үзэсхэлэндэ, түрүү хонишодой урилдаанда нютагаймнай дүршэл ехэтэй Константин Цыренович Бадмаев, Аюр Доржиевич Гомбоев, Жаргал Цыденжапович Цыренов гурбан олон медальнуудта хүртэһэн. Энэ үзэсхэлэн мүнөө жэл Улаан-Үдэдэ үнгэрөө. “Шэбэртэ” гэһэн үйлэдбэриин олохон хонид үндэрөөр сэгнэгдээд, медальнуудта хүртөө. Энэ үйлэдбэри “бүүбэй” гэһэн буряад үүлтэрэй хонинойнгоо тоо бүри олон болгохо түсэбтэй.
Ажахы ударидагшадта ашагтай һуралсал
Шэбэртын захиргаан, ажаһуугшадынь эдэбхитэй, урагшаа һанаатай, ямаршье үйлэ хэрэгүүдтэ харюусалгатайгаар хандадаг байхадань, энэ семинарые Шэбэртэдэ үнгэргэхэ гэжэ шиидэһэн байна.
Соёлой байшанай фойе соо һү тараг, мяхан, гурилай продукци, огородой ба саадай эдеэнүүд ута шэрээдэ дэлгээгдэнхэй.
Танхим соо шэхэмэл олон зон, һандалинууд дээрэ саарһан туулмаг соо фермернүүдэй хэрэглэхэ методическа заабаринууд, блокнот, ручка хэгдэнхэй.
Буряад Уласай Хүдөө ажахын сайдай уялга дүүргэгшэ Юлия Дагданова семинар нээжэ, сугларһан зониие, фермернүүдые, талмайн эзэдые амаршалжа, амжалтануудые хүсөө. Аймагай дарганар Мария Савельева, Артём Митапов баһал һайниие хүсэжэ, дааһан харюусалгаяа хөөрөө.
Хүдөө ажахын газарнуудые хүгжөөхын талаар зүблэгшэ Евгений Цыбиков, Буряадай хүдөө ажахын академиин проректор Бэликто Цыбиков гэгшэд сабшалангай ба бэлшээриин газар яагаад үрэжэлтэй болгохоб гэжэ тодорхойгоор ойлгуулаа.
Томо эбэртэ малнуудай үүлтэр һайжаруулхын тулада юу хэхэ хэрэгтэйб гэжэ яаманай таһагые даагша Баяр Минжуров үгэ хэлээ.
Хэдыхэн жэлэй урдахана уласай хүгжэжэ байһан түрүү 100 һууринуудые элирүүлхын талаар ехэ ажал хэгдэһэн гээшэ. Энэ хэрэгтэ хубитаяа оруулсаһан Елена Ширибон тайзан дээрэ Шэбэртые, Аха ба Хяагта аймагай тосхонуудые тэмдэглэбэ.
Нютагаймнай ба бэшэ аймагай залуу фермернүүдтэ һайн хэшээл болоо, саашадаа дүй дүршэлтэй боложо, ажалаа һайнаар ябуулха гэжэ найданабди.
Сугларһан зондо Нарин-Заганай фермер Золто Цыбикжапов аршаан тухай хөөрэхэдөө, үе мүсын, хото гэдэһэнэй үбшэнһөө эмшэлдэг, нюдэнэй харасые һайжаруулдаг тухайнь мэдүүлээ. Аршаанда хүртэхэеэ ерэһэн зон модон ба һэеы гэр соо бэлэн унтари дэбисхэр, үдэрэй 4 дахин хоол, ванна соо аршаан абаха аргатай. Тиигэжэ тэнхээтэй болоод, бусадаг юм байна.
Сэлэнгэ аймагай Мария Черных адуу мал тэжээхэһээ гадна, хажуудаа байһан нуурта загаһа үсхэбэрилхэ түсэбтэй байһанаа мэдүүлээ. Бэшүүр нютагай дүй дүршэлтэй Сергей Афанасьев баһал өөрынгөө ажал хэрэг тухай хөөрөө.
Семинарай түгэсхэлдэ Марина Очирова, Сергей Афанасьев, Алдар Цыдендоржиев, Мария Черных, нютагай захиргаанай мэргэжэлтэн Марина Цыдендоржиева болон бусад хабаадагшадта Юлия Дагданова Баярай бэшэгүүдые барюулаа.
Гутайн Ольга Тубановагай хониной арһаар, нооһоор бүтээһэн хубсаһа хунарые 7 эхэнэр тайзан дээрэһээ харуулаа.
Шэбэртэ, Дабаатын соёлой байшангуудые даажа байһан Эржэна Гатыпова, Оюна Дубданова гэгшэд сугларһан зондо һайхан тоглолто харуулхын тулада оролдожо хүдэлөө. Бэлдэһэн тоглолтонь үндэр хэмжээндэ үнгэрөө.
Бодото хэшээлнүүд
Мүргэлтэй Улаан хадын зүүн хормойдо, нютагай хойто захада, Шэбэр шугыгаар бүрхөөгдэһэн Сурхарбаан гэһэн тамирай талмайда бодото хэшээлнүүд үнгэрөө. Хажуугаарнь хүхюутэй мүрысөөнүүд эмхидхэгдээ.
Ехэ талмай дээрэ хониной арһа хайшан гээд элдэхэ ёһотойб гэжэ харуулаа. Тамирай талмай дээрэ аймаг бүхэнэй түлөөлэгшэд 8 хүнһөө бүридэһэн команда байгуулаад, хүхюун мүрысөөнүүдтэ хабаадаба. Нэн түрүүн томо рулон үбһэ мухарюулжа урилдаа. Тэрэшэлэн түлеэ түргөөр бута хахалжа, хоёр мөөртэй ябаган тэргэ дээрэ ашажа мүрысэбэ. Нүхэдынь хартаабхануудые мэргэнээр шэдэжэ, хүнэг руу оруулха ёһотой байба. Эндэ сэдьхэлээ хүдэлгэжэ, һайнаар дууһан тудаагүй байна. Тиимэһээ һүүлдэнь мэшээг соо хүлнүүдээ хэн алдан, унан, дуһан мүрысэбэ.
Жээрэб татажа, аймагай түлөөлэгшэд тайзан дээрэ тоглолтонуудые харуулаа. Сурхарбаанай талмайн хорёо харшань, дугы, бэеэ заһаха газар, тоглолтын тайзан заһабарилагдан шэнэлэгдээ. Энэ ехэ ажал хэһэн нютагай үмсын үйлэдбэриие даагша Баир Цыреновые тэмдэглэхэ хэрэгтэй.
Дүнгүүд
Бүхы дүнгүүдээр 3-дахи һуурида гарагшад Яруунын, Загарайн, Зэдын, Хэжэнгын, Хориин хубиин ажахы толгойлогшод болоно.
2-дохи һуурида Сэлэнгын, Ивалгын фермернүүд гараа. Энэл һуурида гараһан уласаймнай Хүдөө ажахын болон эдеэ хоолой яаманай түлөөлэгшэд Сэлэнгэ аймагтай энэ һуурияа хубаалдаа.
1-дэхи һуури абаһан эбтэй эетэй талмайн эзэд - Бэшүүр аймагай фермернүүд болоно.
Тиихэдэ Амгалан Ринчинов, Сергей Афанасьев, Альбина Кондакова ба бэшэ шалгарһан зон баһал Баярай бэшэгүүдтэ хүртөө.
Баярай үгэ
Энэ ехэ хэрэгэй түлөө харюусалга дааһан Альбина Васильевна Кондаковада, Артём Андреевич Митаповта, Шэбэртын сомон дарга Цырен- Дондок Цыдыпович Шоймполовто, нютагай фермернүүдтэ, эдэбхитэдтэ баяраа мэдүүлнэбди.
Хамтын ажалда урагшаа һанаатай Алексей ба Жанна Цыбеновтэндэ, халуун эдеэгээр хангаһан Жаргал ба Жаргалма Чимитовтэндэ, Марина Гатыповада һайниие хүргэнэбди.
Августын 3-да Сурхарбаанай талмай дээрэ Шэбэртэ, Шанага, Хонхоло нютагуудай тамиршад, артистнар хамтаржа, “Хёлгын хойто бэеын буряадуудай һайндэрые” үнгэргэхэнь. Энэ хадаа ехэ һайн эхин. Түрүүшын энэ нааданда нютагаархинаа хүлеэнэбди.
Буряад Уласай Хүдөө ажахын яаманай хэблэлэй албанай гэрэл зураг
Цырендондок ЗАНДРАЕВ, багшын ажалай ветеран, Буряад Уласай габьяата багша