1074
Тарбагатай аймагта «Полиин үдэр» гэһэн уласай хэмжээнэй үзэсхэлэн-яармаг эмхидхэгдэжэ, уласай хүтэлбэрилэгшэ хэмжээ ябуулгада хабаадалсаа.
Буряад Уласай Засагай газарай мэдээсэлэй албанай гэрэл зураг
Тарбагатай аймагай Надеино тосхондо хүдөө ажахын һалбарииин хүдэлмэрилэгшэдтэ зорюулагдаһан «ДТ-54» трактор-хүшөө табигдажа, «Полиин үдэр – 2019» гэһэн хэмжээ ябуулга эхилээ. 1960-1980-яад онуудта энэ трактор Буряадай хүдөө ажахыда үргэнөөр хэрэглэгдэһэн юм. Олон жэлэй туршада талха таряа ургуулагшадай ажал тэмдэглэжэ, хүндын тэмдэг болгон мүнөө энэ трактор-хүшөө табигдаһан байна.
Буряад Уласай Засагай газарай мэдээсэлэй албанай гэрэл зураг
Буряад Уласай Засагай газарай мэдээсэлэй албанай гэрэл зураг
Буряад Уласай Толгойлогшо Алексей Цыденов хэмжээ ябуулгада хабаадагшад, ажаһуугшад болон айлшадта хандажа баярай үгэнүүдые хэлэбэ.- Хүндэтэ хүдэлмэрилэгшэд, «Полиин үдэр» гэһэн һайндэрөөр амаршалнаб! Талха таряа ургуулжа, хилээмэ барижа, хүнүүдые эдеэ хоолоор хангахаһаа шухала юун байхаб? Ажалаараа, хара хүлһөөрөө, зүрхөөрөө таряа ургуулжа байһан таанадта баяр хүргэнэбди. Сагтаа бороо хура орожо, баян ургаса абажа байхыетнай хүсэнэб, - гэжэ уласай хүтэлбэрилэгшэ хандаба.
Тарбагатай аймагай засаг дарга Виктор Максимовай хэлэһээр, мүнөө энэ аймаг улас дотороо талха таряа ургуулха талаар түрүүшүүлэй тоодо.
- Мүнөө хүдөө ажахын һалбарида агротехникэ, мүнөө үеын оньһон хэрэгэслнүүд, һайн шанартай үрэһэн хэрэглэгдэхэ ёһотой. Тиихэдээл ажалнай ашаг үрэтэй байха. Буряад уласай хүдөө ажахы бүхэндэ бидэнэйхидэл адли техникэ, үрэһэн хэрэглэгдэжэ, һайн дүнгүүдые туйлахань болтогой, - гэжэ Виктор Максимов хэлэбэ.
Буряад Уласай Засагай газарай мэдээсэлэй албанай гэрэл зураг
Буряад Уласай Толгойлогшо «Куйтунское», «Куналей-Агро» эмхинүүдэй полиинуудта, Василий Аргуновай фермэдэ хүрэһэн байна. Василий Аргуновай ажахыда «Госсорткомиссия», «Россельхозцентр» эмхинүүдэй туршалгын полидо уласай уларилда таараһан хорёод янзын талха таряа ургуулжа, олондо харуулһан байна.
- Эндэ манай уларилда эгээл таараһан шэниисэ, ешмээнэй янзанууд ургана. Байгша ондо Буряад Уласай Засагай газарта фермернүүдтэ тэдхэмжэ үнгэрһэн жэлдэ орходоо 30 хубяар ехэ һомологдоо, энэнь 100 саяһаа дээшэ. Техникэ шэнэлэлгэдэ 90 саяһаа дээшэ. Хүдөө ажахын һалбари хүгжөөлгэдэ анхаралаа хандуулнабди, - гэжэ Алексей Цыденов тэмдэглэбэ.
Буряад Уласай Засагай газарай мэдээсэлэй албанай гэрэл зураг
Байгша оной «Полиин үдэртэ» аймагуудай болон Улаан-Үдэ хотын хүдөө ажахын 17 эмхинүүдэй түлөөлэгшэд хабаадаа. Хэмжээ ябуулгын үедэ Буряадай Толгойлогшо Алексей Цыденов үүлтэр һайжаруулгын уласай албанай хүдэлмэрилэгшэдтэ албан хэрэгэй автоунаануудые бэлэглээ.
Буряад Уласай Засагай газарай мэдээсэлэй албанай гэрэл зураг
Тиихэдэ хэмжээ ябуулгын гол шухала үйлэ хэрэг трактористнуудай дунда поли дээрэ эмхидхэгдээ. «Эрхим газар хахалагша-2019» гэһэн урилдаанда хүдөө ажахынуудай хүдэлмэрилэгшэд, дунда болон дээдэ һургуулинуудай оюутад хабаадалсаа.
Буряад Уласай Засагай газарай мэдээсэлэй албанай гэрэл зураг
Тэрэшэлэн таряа, ногоо аршалха, үтэгжүүлгэ хэрэглэхэ, газарай шанар шэнжэ элирүүлхэ, наранай элшын батарейнүүдые хэрэглэхэ, уһалууриин тоног хэрэгсэлнүүдые ашаглаха талаар үзэсхэлэн дэлгэгдээ.
Буряад Уласай Засагай газарай мэдээсэлэй албанай гэрэл зураг
Хойто жэлэй «Полиин үдэр» гэһэн уласай үзэсхэлэн-яармаг Бэшүүр аймагта эмхидхэгдэхэ.
Буряад Уласай Засагай газарай мэдээсэлэй албанай гэрэл зураг
