​​Буряадай Хори аймагта 108 субаргын найр үнгэрөө

Анаа дасанда 108 субаргын заншалта найр үнгэрбэ. Айма­гай олониитын, Буддын шажанай, соёлой, тамирай энэ ехэ на­адан долоодохиёо үнгэрбэ. Һэрюухэн үдэр боложо, бороошье аалиханаар сүршэжэ, хабаадагшадшье, харагшадшье ехэл ба­яртайнууд байгаа.

Үглөөнэй 10 сагһаа эхэ зур­гаан зүйл хамаг амитанай, ай­магай, бүгэдэ Буряадай арад зоной амгалан байдалай түлөө хурал хурагдаа. Уншалгын түгэсэхэдэ, булта зон Будда бур­ханай “Алтан субаргаһаа” адис хүртөө.

Тиигээд Отошо дуган бо­лон Отошо бурханай юһэн ехэ хүрэгүүд рамнайлагдаа.

Энэ найр нээлгэнэй баяр ёһололдо сугларһан зониие Анаа дасанай шэрээтэ Ешэ-Лэгсэг, “Даша-Чойнхорлин” ехэ һургуулиин захирал Дымбрыл лама, Хори, Хэжэнгэ, Ярууна аймагуудай засаг дарганар, Буряадай соёлой сайд Соёл­ма Дагаева, Арадай Хуралай Түрүүлэгшын орлогшо Баир Жамбалов, арадай һунгамал Ва­лерий Доржиев, Чисаанын, Шу­луутайн дасанай шэрээтэнүүд амаршалаа. Хии мори ехэ гоёор агаарай бүмбэгэнүүдээр огтор­гойн гүн руу хиидхүүлээ. Тай­зан дээрэ “бүмбэ” дамжуулгын ёһолол үнгэргэгдөө. Удаадахи наадануудые Яруунын Эгэ­тын-Адагай Жанчиповтанай болон Доомнын Бадмаевтанай бүлэнүүд гаргашануудыень да­ажа үнгэргэхэ юм.