Юртэмсын жама ёһоор үбэл зун хоёр уулзаха аргагүй гэжэ һанахаар. Уулзадагшье һаа, тон хомор. Харин манай Буряадта иимэ газарнууд ганса бэшэ.
Шэрүүн уларилтай Аха нютагта жэл бүри шэнэ зун “хуушан” үбэлтэй уулзадаг юм. Ушар юуб гэхэдэ, далайн нюрууһаа 1000-һаа 3000 метр хүрэтэр үндэр газарнуудта үбэлынь ушаргүй ута, харин хабар, зуниинь богонихон байна бшуу. Тиимэһээл ута унжагай, уур сухалтай үбэлдөө гол горходой уһан оёортоо хүрэтэр хүрөөд, ахаархинай хэлэдэгээр, “ондоли” болошодог.
Хэдэн метр зузаан ондолиие богонихон зунай халуун нараншье, хадаһаа яаран урдажа бууһан уһаншье хайлуулжа үрдидэггүй. Угайдхадаа, хада газарай уларил хатуу. Үдэрынь 20-30 градус халуун болоһон аад, улаан наранай уулын саагуур хоргодоходо, газаа һэрюун боложо, һүниндөө 3-5, заримдаа 10-шье градус хүрэтэр хүйтэрхэнь магадгүй. Хура борооной удаан орожо, буряадуудай гурбадахи найр гэжэ наадалан хэлэгдэһэн ёһотой “хии бараанай” тохёолдоходо, агаар шэрүүн боложо, амилхада, уурал бааяжа байдаг шуу. Тиигээд лэ “үбэлэй” тэмдэг – ондоли -сагаан мүльһөөрөө саһанай орохые угтадаг. Мүнөөшье жэл аглаг үндэр Ахадамнай үбэл нажар хоёрой уулзаһан газарнууд олон. Танай анхаралда дурадхагдаһан зураг дээрэ – эгээл иимэ үзэгдэл.
Баяр БАЛДАНОВАЙ гэрэл зураг