Анна Огороднигой гэрэл зураг
Табин жэлэй, ехэдээл һаа, далан жэлэй үнгэрхэдэ, түрэл буряад хэлэмнай мартагдажа, хэтын хэтэдэ үгы болон хосорхо гэһэн һанамжа хэдэн жэлэй саана түрүүшынхиеэ тунхаглагдаад, ехэ гэгшын шаг шууяан болоо бэлэй.
Алиншье һанамжа амидарха эрхэтэй
Тэрэ гэһээр энээхэн асуудалда тэхэрин бусаха ушарнууд нэгэнтэ бэшэ дайралдаа. Тиигээшьегүйдөө аргагүй. Ушарынь гэхэдэ, үндэһэн хэлэнэймнай ерээдүй олоной һанаа зобооно ха юм. Хурдан энэ сагаймнай шэнын элдэб сүлжээнүүдэй бүлгэмүүдтэ, али олон суглаа, хуралнуудташье һанагдаад, зүбшэн хэлсэлгэ болодог. Заримашуул нээрээшье хэлэмнай һалахань, үгы болохонь гэжэ бодоно. Нүгөөдэ зариманиинь яагаад тиимэ түргөөр мартагдаха юм гэжэ сухалаа хүрэдэг.
Яагаашье һаа, һажаһан мэтэ ходо байдаг буряад юртэмсыемнай, олониитымнай эдэбхитэй олохон лэ түлөөлэгшэдые энэ һанамжа ехэтэ хүлгөөгөө. Үүлэгүй сэлмэг огторгойн гэб гэнтэ наяран, сахилгаалан аадарлаһан мэтэ оройдоошье һанаагаа зободоггүй олон зониие энэ бодол гансата хахаагаа, бахардуулаа бшуу. Нэгэ талаараа һайн. Бүглэршөөд, бүрхэхыень хүлеэжэ һуугаагүй хадамнайл болоо.
Нэрэтэнүүдые илгаруулха шухала
Энэ асуудалаар һонирхоод эхилхэдэ, энеэдэтэйшье, ханяадатайшье ушар болоо һэн гэжэ ойлгохоор. Юуб гэхэдэ, Алдар Бадмаев гэжэ аб адли нэрэтэй хоёр эрдэмтэнэй алиниинь иимэ шэнжэлгэ хээб гэжэ илгаруулхын аргагүй байгаа бшуу. Буряад хэлэнэй шиидхэгдээгүй асуудалнуудаар эмхидхэгдэһэн суглаануудташье нэгыень нүгөөдэтэйнь һамарха ушарнууд болоо. Харин мүнөө хэниинь хэм бэ гэжэ, хүндэтэ уншагшаднай, ойлгохот. Нэгэниинь Алдар Гальчиевич, нүгөөдэнь Алдар Геннадьевич. Хоюулаа Бадмаевууд. Хоюуланайнь һанамжа дурадханабди.
Хосорхо харгыда гаранхай
Өөрынгөө шэнжэлгэнүүд дээрэ үндэһэлэн, хэлэмнай мартагдан хосорхо гэһэн бодолоо олондо мэдүүлһэн эрдэмтэн – Россиин эрдэмэй академиин Сибириин таһагай Байгаали ашаглалгын Байгалай институдай эрдэмтэ хүдэлмэрилэгшэ, газар нютаг, тэрэнэй хубаари баялиг шэнжэлдэг (геогрaфиин) эрдэмэй дид- доктор Алдар Геннадьевич Бадмаевай тобшололтой танилсагты.
Алдар Геннадьевич Бадмаев
Хубиин архивһаа абтаһан гэрэл зураг
Хахадынь мартагдаха
– ЮНЕСКО эмхиин хэһэн шэнжэлгэнүүдэй ёһоор, дэлхэй дээрэхи хоёрдохи хэлэн бүхэн үгы болохо аюултай. Бүмбэрсэгэй арадуудай хамтаралгын хойшолонгууд тиимэ байхаар. Олон зоной харилсадаг, хүсэтэй хэлэнүүдынь һулашагуудаа хажуу тээшэнь түрижэ гаргана бшуу. XXI зуун жэлэй эсэс багаар дэлхэйн хахад хэлэнүүд үгы болохо.
Буряад хэлэмнайшье бусадһаа ондоо гэхын аргагүй. XX зуун жэлэй эхин болотор тэрэнэй үгы болохо тухай асуудал табигдадаггүй һэн. Теэд орон нютаг руумнай ород зоной олоороо зөөжэ ерэхэдэ, үйлэдбэри болон хамтын ажахынуудай хүгжэхэ бүри буряадууд ород хэлэнэй юртэмсэ руу шэлжэн орохо баатай болоо.
Хаанаһаа эхитэй хохидол бэлэй?
XX зуун жэлэй тэнгээр манай угсаатан хото газар руу сугларжа эхилээ. Томо үйлэдбэринүүдтэ, хангамжын эмхи зургаануудта, мүн тиихэдэ Улаан-Үдын болбосоролой, эрдэм һуралсалай гуламтануудта манай яһатан элбэгээр хүдэлдэг болоһон. Жэл ошохо тума хотодо түбхинэгшэд олошоржо, тэдэнэй булюу хубинь буряадаар бэшэ, ород хэлээр хэлсэдэг болоһониинь тэрэ гэлэй. Эгээл иимэ байдал Эрхүү можодо үзэгдэдэг һэн. Харин Буряадаймнай болон Үбэр Байгалай хүдөөлиг байдалтай угсаатамнай ород хэлэндэ гансата ороод орхёогүй.
2002 он болотор эмхидхэгдэһэн хүн зоной бүридхэлэй бүхы дүнгүүдые харахада, түрэл хэлэеэ мэдэдэг зоной тоо үсөөрһөөр үсөөржэ байгаа гээд элирнэ. 1989 ондо РСФСР-тэ ажаһуудаг 417425 хүнэй (СССР-тэ - 421380 хүн байгаа) буряадаараа 363620 хүниинь харилсадаг байгаа. Энэнь зуунай 87,11 хуби болоно гээшэ. 2002 ондо 445175 хүнэй 368807-иинь – 82,85 %. Арбан гурбан жэлэй туршада 5 хубяар бага болоһон байна гээд элирнэ. Харин 2010 ондо 461389 хүнэй оройдоол 218557- иинь буряад хэлэтэйбди гэжэ тэмдэглээ. Энэнь зуунай оройдоол 47,37 хуби болоно. Ямар шалтагаанаар иимэ олон зомнай хэлэеэ мэдэхэеэ болёоб гэһэн асуудалда харюу олдоногүй.
Россида буряад хэлэ мэдэдэг зоной тоо, хүнөөр тоолоходо (багсаамжалга).
Хитадта ажаһуудаг 40980 буряадуудай 18000-иинь (43,92%) түрэлхи хэлэеэ мэдэнэ. Монголой 45087 буряадууд түрэл хэлэеэ бултадаа мэдэнэ гэжэ тоологдодогшье һаа, буряад халха хэлэнүүдээ холижо дуугардаг. Эдэ хоёр гүрэндэмнай буряад хэлэн амяараа бэшэ, монгол хэлэнэй нютаг аялга гэжэ тоологдодог гээд бү мартая.
Үдэр бүри үсөөрнэ
1989 онһоо 2010 он болотор, 21 жэлэй туршада, Росси гүрэндэмнай буряад хэлэ мэдэдэг зоной тоо 145063 хүнөөр үсөөрһэн байна бшуу. Жэлэй туршада – 6908 хүнөөр, үдэр соо – 19 хүнөөр үсөөн болоно. Аюултай түргөөр үсөөржэ байна.
Иимэ тоо баримтануудые хэрэглэн, буряад хэлэмнай үшөө хэды соо мартагдангүй байхаб гэжэ тоолохоор:
218557:6908= 31,64 жэл.
Оройдоол 2042 он болотор болзор.
Һайн тээшэнь бодожо багсаамжалха болоо һаа, 2070 он хүрэтэр буряад хэлэмнай амидарха аргатай. Тоо баримтануудые хараадаа абажа, багсаамжалга хэбэл, XXI зуун жэлэй тэн болон эсэсыень буряад хэлэнэймнай үхэхэ хаһа гээд тоолоходо болоно.
Буряад хэлэн түрэл хэлэмни гэжэ зуунай 51,24 хуби зон тоолоно гээд ниигэмэй нэгэ сүлжээндэ хэгдэһэн асуулта харуулаа. Нүгөө 31,65 хубинь ойлгодогшье һаа, муугаар хэлэдэг (үгы һаа, хэлэдэгшьегүй). Үлөөшэ 17,11 хубинь оройдоошье ойлгодоггүй байшоо. 2014 оной март һарада 18-һаа 35 хүрэтэр наһанай 2689 буряадуудай хоорондо энэ асуулта үнгэргэгдөө. Олонхинь – Буряад Уласай ажаһуугшад.
Юрэ бэшэ юһэн шалгуур
Хэлэнэй “элүүр энхые” мэдэхээр 9 шалгуур Бүхэдэлхэйн ЮНЕСКО эмхиин экспертнүүд дурадхаһан юм.
Харин эгээл шухалань – үеһөө үедэ хэлэеэ дамжуулгын хэмжүүр болоно. 5 оноогой (баллай) шкалагаар тэрэ хэмжүүр табигдадаг. Тиихэдээ 5-иинь – түрэл хэлээрээ бүхы үеын түлөөлэгшэд хөөрэлдэнэ, 4 – залуушуулай зарим хубинь түрэл бэшэ хэлээр харилсана. 3 – хэлэеэ мэдэхэ эгээл залуу зониинь дунда наһандаа хүрэжэ ябана, 2 – гансал аха үенүүдэй зон хэлэн дээрээ хөөрэлдэнэ, 1 – үндэр наһатай оройдоол хэдыхэн хүн хэлэнэ, 0 – нэгэшье хүнэй хөөрэлдэхэеэ болиһон, үхэһэн хэлэн.
Хэлэеэ мэдэхэ хүнүүдээр үсөөн боложо байһан буряад арадта хабаатай оноонуудые (баллнуудые) тооложо, жэлнүүдээрнь элирүүлжэ гаргахаар: 1930 он болотор – 5 оноо, 1930- 1990 онуудта – 4 оноо, 1990-2030 онуудта – 3 оноо, 2030-2050 онуудта – 2 оноо, 2050-2070 онуудта – 1 оноо. 2070 оной һүүлдэ – тэг (0) оноо.
Буряад хэлэмнай иигээд лэ үгы болохо үйлэтэй гү? Али хосорхо туйлдаа үшөө хүрөөгүй гү?
ЭСЭРГҮҮ ҺАНАМЖА
Шэргэшэгүй булаг
Табин жэлэй ходорон ошоходо, буряадаар хөөрэлдэхэ хүн үлэхэгүй гээд хэлээ һэн гүт гэжэ асуухадамнай, Буряад Уласай Толгойлогшын зүблэгшэ, эдэй засагай эрдэмэй дид-доктор Алдар Гальчиевич Бадмаев таһа арсахаһаа саана, тад ондоо һанамжатайгаа мэдүүлээ. Тэрэнь уншагшадаймнай анхаралда.
Алдар Гальчиевич Бадмаев
Фейсбук сүлжээндэхи хуудаһанһаа гэрэл зураг
Хэлбэриин нюусануудые мартахын аргагүй
Тэды, эды жэлэй үнгэрхэдэ, түрэлхи хэлэмнай хосорхо гэжэ хэлэхэһээ байха, бодомжолоошьегүйб. Барбагайн шэнээн багахан байхадамнай, баабай эжымнай аялгата хэлэндэмнай һургаа һэн. Хэлэ аманда ороходоо, хэлбэриинь нугархай нюусануудтай танилсаһан хүн бүхэн хожомынь хэдышье хэлэнүүдтэ һураа һаа, эхэ хэлэеэ мартахагүйл даа.
Буряад хэлэмнай бэрхэшээлнүүдтэй ушараад байна гээд бултанда мэдээжэ. Теэд арадыемнай арад болгодог агууехэ зэбсэг – угсаата зоноймнай ууган хэлэнэй түүдэг унтаран залирха гэжэ хэлэхэнь тон буруу.
Харин тэрэнээ сахин хүгжөөхын тула гансал һангай мүнгэ хүлеэгээд һууха бэшэ, гэр гэртээ үхибүүдтэеэ үндэһэн хэлээрээ харилсадаг болоо һаа, һураггүй ехэ ашаг үрэтэй байха һэмди.
Болбосоролой эмхи зургаанууднай хэлэнэй талаар яһала ехэ ажал ябуулна. Аймаг болон хотонуудаймнай засаг баригшад зорилгонуудые урдаа табинхай. Һургуулиин номууд шэнэлэгдэхэнь. Түрэлхи хэлэеэ һонирхолтой онол аргаар зааха сагтаа таараһан шэнэ программанууд зохёогдоно.
Тоо бүридхэлдэ тон наринаар хандаха
Нэгэдэхеэр, эрдэмэй талаар ажал нэгэтэй залуу нүхэрэйнгөө шэнжэлгэ уншаад, тоо бүридхэлэй ажалай онол аргануудтай танил хадаа, зарим тэды тобшолол хэбэб. Түрэл хэлэеэ мэдэдэггүй буряадуудай тоо 2002 он болотор тогтууритайгаар үсөөржэ байгаа гээд абаһаар адаглахаар. 1997 ондо 100 хуби зон хэлэеэ мэдэдэг һаа, 2002 ондо тэдэнэй тоо 82,7 хуби болотороо доошолһон байна. Харин саашаа, 2010 ондо, 47,4 % хүрэтэр эгсэ доошолоо гэжэ харагдана. Энээниие мэдэхэдээ, юундэ гэнтэ эгээл энэ хугасаа соо доройтолго болооб, хэр зүб тоо, баримта гээшэб гэһэн асуудал ямаршье мэргэжэлтэн табиха ёһотой бшуу. Иимэ шэнжэлгэнүүдтэ заримдаа алдуунууд гаргагдаһан байдаг. Тиимэ ушарһаа тоо бүридхэлэй талаар хэгдэдэг шэнжэлгэнүүд сооһоо эгсэ хэмжээнүүдынь (эгээ багануудыньшье, эгээ ехынүүдыньшье) гаргагдадаг юм.
Энэ ушарта 2002 оной һүүлдэ үгтэһэн баримтань гансахан жэлэйхи (2002 лэ оной) байна. Иимэ мэдээсэл дээрэ үндэһэлжэ, тобшолол хэхэнь буруу. Тус баримта хэрэглэжэ, ондоо онол аргаар олдоһон тобшололоо шэнжэлэгшэ батадхахаяа һанаа ёһотой. Энэнь алдуу болоно.
Гансахан гэршэлэл
Хоёрдохёор, хэгдэһэн энэ тобшололдо таарахаар үндэһэн арадай тоо бүридэл болон хубилалтануудыень хараад үзэхэдэ, гансахан гэршэлэл тухай хэлэхээр. Энэ хадаа хубилган шэнэдхэлгын һүүлдэ хүдөөгэй буряад зоной хото газар руу олоороо нүүжэ сугларһан шалтаг гээшэ. Гэн гэһээ, ямар үндэһэ яһатанай нүүһэн, зөөһэн тухай мэдээнүүд үгтэнэгүй. Тиимэһээ ямаршье тобшолол хэхээр бэшэ. Энэнь голхормоор. Юундэб гэхэдэ, тад ондоо хэдэн баримтануудай хоорондохи холбооной бии, үгые хэлэхээр байгаа бшуу.
Гурбадахяар, түрэл хэлэеэ мэдэхэ буряадуудай үсөөн болохо ушар хадаа буряад хэлэнэймнай хэрэглэмжын дэбисхэрэй уйтан болоһонтой сэхэ холбоотой. Түбхын түрүүндэ гэр бүлэнүүдтээ хөөрэлдэхэ болон гүрэнэй хэлэн гэжэ хэрэглэхэ дэбисхэрые гол шухала гээд олон шэнжэлэгшэд тэмдэглэдэг. Гэхэтэй хамта, гүрэнэй хэлэнэйнгээ талаар адлирхуу байдалтай Россиин бусад үндэһэн арадуудай дүй дүршэл хараада абтадаггүй. Мүн баһа хүдөөһөө хото руу зөөжэ ерэгшэднай буряад хэлэтэй зон байна. Тиимэһээ зүб онол аргануудаар тусхай шэнжэлгэ хэнгүй, гэр бүлэнүүд дотор хэлэн хэрэглэгдэнэгүй гэжэ хэлэхэнь яаха аргагүй буруу.
Нэгэ үдэрөөр доройтоо бэшэ
Хүдөө нютагуудта болон хотодо хэлэнэй талаар илгаа айхабтар ехэ юм ааб даа. Гол шухалань гэхэдэ, хотодо ажаһуугшадай дунда хэлэ хэрэглэлгын дэбисхэр үгы шахуу. Теэд иимэ байдал мүнөөдэр, үсэгэлдэр тогтоо бэшэ ха юм! Хэдэн арбаад, бүри зуугаад жэлэй туршада тиимэ байгаа. Энээниие гэб гэнтэ, нэгэ һүрэхэдөө, заһахаар бэшэ. Олон яһатанай ажамидардаг уласай үндэһэтэн хоорондын харилсаанай бүхы талые хараадаа абажа, болгоомжотойгоор, алхам алхамаар энэ байдал хубилгаха хэрэгтэй бшуу.
Буряад Уласай Засагай газарай тогтоолоор эхэ хэлэнэймнай 2030 он болотор хүгжэхэ Гол бодол баталагданхай. Тэрэниие ашаг үрэтэйгөөр бэелүүлхэ ажалай түсэб зохёогдожо байна.
Уласай засагай хэжэ байһан алхамууд дутуу гээд зариман бодомжолно. Нүгөөдэ зариманиинь онсо хэмжээнүүдые абаха хэрэгтэй гэжэ тоолоно. Тиимэ хэмжээнүүдые бэелүүлхын тула орёо гэгшын хэдэн зүйл хараадаа абаха шухала. Минии һанахада, хүүгэдэй сэсэрлигүүдтэ хэлэнэй дэбисхэр байгуулжа, тэрэниие бүримүһэн дэмжэлгэ горитой һайн түлхисын эхин болохо зэргэтэй. Балшар наһандал харилсаанай эхин табигдана ха юм. Үшөө тиихэдэ хэлэ хэрэглэжэ, ажалаа эрхилдэг эхин ангинуудай хүүгэдэй лагерьнууд амжалтатай байха гэжэ һанагдана. Эдэ бүгэдэмнай һайн дуранай хүсэл дээрэ бэелүүлэгдэхэ ёһотой!