​​Түрэлхидэй дэмжэлтээр түрүүшын алхам хэгдээ

Номина Бадлуева, Арюна Ламаева, Саран Ёндонова, Нарана Айсуева

«Мүнгэн хонхонууд» гэһэн студида ябадаг үхибүүдэй түрэлхид хүүгэднай буряад хэлэндээ бэрхэ болоо, бэеэ даагаад ябажа һуранал даа гэжэ онсолон тэмдэглэнэ.

Элбэг-Доржын эжы - Наталья Владимировна Доржиева:

- Хүбүүмнай ойндоо хүрөөд, хэ­лэндэ ороо. Тииһэн лэ сагһаа маши­нада зэдэлүүлһэн буряад дуунуудые дууряажал ябадаг һэн. Машина соо дуулаһанаа гэртээ ороод наадаха­даа, аман соогоо дуулаха. Тиихэдэнь «Мүнгэн хонхонууд» студида үгэе гэжэ нүхэртэеэ зүбшэлсөөд, Саран­туяа багшада шалгуулаад, үнгэрһэн жэлэй февраль һарада ерээбди. Хо­ёрдохи жэлээ дуунай студида ябажа байнабди.

- Студиин нүлөө ямар бэ? Хуби­лалтанууд харагдана гү?

Буряад дуунуудаа дуула-дуулаһаар, гэртээ буряадаараа дуугардаг болоо. Сагаалганай үедэ сэсэрлигтээ “Гэсэр” боложо, 1-дэхи һуури эзэлээ. Олон конкурсдо хабаадаа. Дискдэ 3 дуум­най оронхой. Клиптэ буулгуулаабди. Репетицидээ ехэ дуратайгаар ябадаг. Бэлдээд, намайе хүлеэгээд байдаг.

Хэшэгтын эжы – Сэсэгма Балда­новна Балданова:

- Сэсэрлигтэ ябахадань, буряад дуу һургадаг байгаа. Өөрөөшье дуу­лаха ехэ дуратай. Элдэб тоглолтону­удта 2-3-тайһаань дахуулаад ябадаг байгааб. Ехэ һайхашаажа харадаг бэлэй. Өөрөө шүлэг хэлүүлхэш, дуу­луулхаш. Һүүлдэнь хүршэмнай диск үгэһэн байгаа. Тэрэнээ өөрөө таби­жа шагнаад, дууһыень хуу сээжэл­дээ. Ивалгын дасанда үнгэрдэг “Эхэ хэлэн – манай баялиг” гэжэ урил­даанда ошодог һэн. Забһарлалтын үедэ дуу дуулахамни гээд, 3 дуу дуулажархиһан байгаа. “Мүнгэн хонхонуудай” бэрхэ администратор Оюна Чимитовна Хэшэгтые хараад, студида ябахыемнай дуудаһан бай­на. Гурбадахи жэлээ ехэ дуратай яба­набди. Олон дуу мэдэхэ болообди. Урда жэл Монголдо үнгэрһэн “Гэгээн аласай ододто” ошоод ерээ. Һүүлдэнь Эрхүү Алтарганада оролсоо. Харида бэеэ даагаад ябажа һуранал даа.

Баиртын эжы – Оксана Батоев­на Бухаева:

- 2017 оной октябрь һарада студи­да дуулажа эхилээ. Багаһаа дуулаха дуратай. Сэхыень хэлэбэл, “Мүнгэн хонхонууд” тухай мэдэхэшьегүй байгаабди. “Эхэ хэлэн – манай бая­лиг” урилдаанда оролсоһон байгаа. Забһар болоходо, Хамба лама дура­тайгаа хэгты гэбэ. Баиртын дуу ду­улахыень хараад, “Мүнгэн хонхону­удай” гэшүүн болохыень уряа. Шэнэ дуунуудые дуулаабди. Алтаргана­да хабаадалсаа, Монгол, Шэнэхээн ошоо. Ехэ баяртайбди. Багшанарнай бэрхэнүүд. Ехэ юумэ абанабди. Олон нүхэдтэй болообди. Дуулаха шадаба­ринь саашадаа хэрэгтэй болохол даа.

Долсоной эжы - Дарима Зориг­туевна Гомбоева:

- Сарантуяа багша нүхэрни бо­лодог. Тэрэ жэл ерэхэдээ, басагаяа намда юундэ асарнагүйбши гээ. Ти­игэжэ түрэлэй басаган Адисатай суг ябажа эхилээл даа. Жэл тухай ябана. Томошуулай тооходонь ехэ дуратай. Гэртээ буряадаар хөөрэлдэдэгбди. Хэлэхэ байнаб - буряаднай дээрэ болоо. Олон дуунуудые мэдэдэг бо­лоо. Дүүниинь дахаад, дуу дуулажа эхилээ. Саашадаа ябахабди. Бүхы наһандань хэрэгтэй. Харидашье бу­ряадби