Гүрэн түрын ажалда түрүү зэргэдэ ябахаһаа гадна, түүхэ бэшэжэ алдаршаһан Түгэлдэр Тобоевой даллагын хүнэг Буряад Уласай Үндэһэн музейн жасада хадагалаатай. “Буряадай хронограф” үзэсхэлэндэ тэрээниие хаража болоно.
Түгэлдэр Тобоев Сагаан-Уула нютагһаа гарбалтай байһан. 1820-ёод онуудһаа нютагайнгаа засагай газарта алба хэжэ эхилээ. 1858-1878 онуудта Агын найман эсэгын тайшаа ябаа. Тиигэхэл үе сагтаа, тодорхойлбол, 1863 ондо, хори буряадай түүхэ бэшэг барлаһан гэжэ эрдэмтэд мүнөө тэмдэглэнэ. Вандан Юмсуновай түүхэ бэшэгтэй хамта тэрэ зохёолынь ород хэлэн дээрэ 1935 ондо нара хараһан юм.
Урда үе сагай буряадууд үхэр малаа яажа үсхэбэрилдэг, газар дээрэ ажалладаг, дарха хэдэг тухайнь, ном бэшэгтэ ороһон сагыень, газар дорохи нөөсэ баялиг ашаглажа эхилһыень гэжэ байгаад, түүхэдэ ороһон тон һонин баримтануудые Түгэлдэр тайшаа бэшэһэн байдаг. Хуушан монголоор дамжуулһан түүхэ бэшэгынь оршуулгатаяа хамта мүнөө интернет сахим соо оруулаатай, бэдэржэ оломоор лэ.
1858-59 онуудта Түгэлдэр Тобоев Үбэр Байгалай хизаарай болон Баруун Сибириин амбан захирагша генерал Акшан Кыринтэй нүүрһэ олоһон тухайгаа бэшэлсэһэн юм. Тиихэдээ тон нүүрһэн гү гэжэ шалгуулхаяа шулуунуудые Шэтэ, Эрхүү, Петербург хотонууд руу ябуулһан байна.
XIX-дэхи зуун жэлэй тэн багаар Түгэлдэр Тобоевой модоор хэгдэһэн даллагын хүнэг Буряад Уласай Үндэһэн музейн үзэсхэлэндэ дэлгээгдэнэ. Энэ болбол Агын тайшаагай хубиин хэрэгсэлнүүдһээ үлэһэн ори ганса баримта юм. Тиибэшье иимэ хүнэг ехэл хоморой гэжэ баһал тоологдодог байна. Юундэб гэхэдэ, хүнэгэй хажуу талада буддын шажанай тэмдэгүүд, тэрэ тоодо бурхадай дүрсэнүүд һиилэгдэнхэй.
Баярма РАДНАЕВАГАЙ гэрэл зураг