Ноёхоной ногоон талаар бэлшэһэн хонид Захаамин, Түнхэн эльгээгдэбэ
Һая Сэлэнгэ аймагай Ноёхондо Хамба лама Дамба Аюшеевэй “Ниигэмэй отара” түсэлөөр хонид дамжуулагдаа.
Буряад үүлтэрэй хони үдхэхэ энэ түсэл Юрэнхылэгшын дэмжэлтэдэ хүртэжэ, 2012 ондо бэелүүлэгдэжэ эхилээ. Мүнөө Буряадтамнай энэ түсэлөөр үдхэгдэжэ байһан хонидой тоо 27 мянган толгой хүрэнхэй.
Ниигэмэй хонидые Ноёхоной зон нэн түрүүн абаһан юм. Тэдэнэр жэл бүхэндэ хурьгадые хажуудахи нютагуудтаа болон аймагуудта дамжуулна.
Августын 11-дэ эндэһээ 600 хурьгад Захаамин, Түнхэн аймагуудта эльгээгдэбэ. Мүн баһа Сэлэнгэ аймагай хонишодто дамжуулагдаа.
Энэ түсэлөө Хамба лама өөрөө ходо шалгажа байдаг. Жэл бүхэндэ хонишодынь тэды хурьга абаабди, тэдые тэнжээгээбди, тэды толгой тэрээндэ дамжуулаабди гэжэ Хамбын урда тоосодог.
Мэдээжэ барилдаашан Зоригто Цырендондопов мүнөө энэл түсэлөөр буряад үүлтэрэй бүүбэй хони нютагтаа үдхэдэг болонхой. Буряад барилдаагаар илалтануудые туйлажа, түрүүшын зэргэдэ Хамбын гарһаа шангаа хонидоор абаһан байна. Тиигээд “Ниигэмэй отара” түсэлөөр 600 толгой абаа. Мүнөө Зоригто жэлдээ бүүбэй хони үдхэхэ дуратайшуулда 200 хурьга дамжуулна.
- 6 жэлэй хугасаада мянган хурьгадые тараагааб. Тиихэдэмни юм гү, хонидни бүри һайнаар үдэжэл байна, - гэжэ Зоригто Цырендондопов урматайгаар хөөрэнэ.
Эгээл иигэжэ Ноёхоной зургаан хонишод анхандаа 500-гаад хонидые абажа, ажахынуудаа эрхилээ һэн. Мүнөө аймагта 18 отарада 12 мянган хонин үдхэгдэнэ. Энэ түсэлөөр Сэлэнгэ аймагта бүүбэйнүүд дүрбэ дахин олошороо.
- Захааминай 9 нютагуудай хонишод Хамбын түсэлдэ хабаадана. Мүнөө гурбан хонишоднай Хамбын үршөөлөөр хурьгадые абахаяа ерээ, - гэжэ Елена Мунжиханова хөөрэнэ.
Энэ түсэл үүдхэжэ бэелүүлэгшэ Хамба Лама Дамба Аюшеев өөрөө:
- Түлөөһэгүйгөөр хони абажа үдхэхэ арга ажалша хүн бүхэндэ олгогдоно. Гансал хонидоо ажаллагты, үдхэгты! – гэжэ хонидые дамжуулхадаа захина. – Түрэһэн һайхан нютагтаа заншалта малаа үдхэжэ, урагшатай урматай, олзотой омогтой ябагты! – гэжэ үреэнэ. Мүнөө жэл 5050 толгой хонидые тараанабди.
Facebook.com/Селенгинский вестник сайтһаа гэрэл зураг абтаба