Түгнын эхинэй хонишоной аша басаганби. Шэбхэ шабааһаар анхилһан хонидой байра дотор хонгор бага наһамни үнгэрөө. Хусада мүргүүлээд, голой шангаар бархирхадам, үбгэн абамни абарагша һэн. Хүгшэн эжынгээ хормойдонь няалдан, хониной һүүл хүхэжэ ябагдаал даа. Тэрэ саг бусалтагүйгөөр ошоо. Өөрөө эжы болооб!
Хэлэнэй асуудал.
Хэн зэмэтэйб?
Хээр мориёо унаад, Байсын үбэрөөр хонидоо харюулһан үбгэн абаһаа, хэзээдэшье хүлеэн байдаг хүгшэн эжыһээ, эхэ эсэгэһээ дамжуулагдаһан түрэлхи хэлэеэ хүбүүдтээ хүргэжэ шаданагүйб. Тиигэжэ бодоходоо, зосоомни хүндүүлхэй болоодхидог. Бэлэн мүрыень шэлэнэб гэжэ бэеэ шүүмжэлээдшье туршанаб. Нэгэ мэдэхэдээ, тэдээнтэеэ адли ородоор дуугаржа байнаб. Буруу гэжэ бэеэ шэмхээд, буряадаараа харилсажа эхилһэн аад, дахинаа тал-мүл ородтоо орошоноб. Түрэлхи хэлэеэ дамжуулжа шадаагүйдөө өөрөөл зэмэтэй болоноб!
Түгнын эхин - Хүсөөтэ нютаг
Хүниие шүүмжэлхынгээ урда тээ өөрыгөө хараха хэрэгтэй гэһэн удхатай хандалга ород хэлэн дээрэ Юлия Раднаева социальна холбоон соо тунхаглаһан байна. Тиигэн гэһээнь, “хусалдаан” эхилээ даа. Аяар 180 гаран һанамжанууд бэшэгдээ. Буряад хэлэ, бэшэгэй түлөө һанаагаа зобобол, коммент үндэһэн хэлээрээ бэшэхэ байгаат гэхэһээ эхилээд, хараалшье, үреэлшье уншахаар. Энэ хандалга олониие хүлгөөгөө хадаа “хадхууртайл” байба гээшэ. Бишье дайруулаад байһанаа бэшэбэб.
Дэлхэйдэ нэрэеэ мэдүүлээд...
Суута уран барималша Даша Намдаковой түрэһэн Үхэриг нютагта зорюулһан дуунай клип Елена Борохитова һаяхана ниитэлүүлбэ. Бүмбэрсэг дэлхэйн булан бүхэндэ буряад нэрэеэ мэдүүлһэн Даша Бальжановичай “Буряад үнэн” хүрэһэниинь һанагдаадхиба. “Эндэтнай танил буряад оршон”, - гэжэ ехэ зохидшоон зогсоо бэлэй. Ехэ һайхан абаритай, холын гүн бодолтой, буряад голтой хүн байна гэжэ бахархан баярлаа бэлэйбди.
Үхэриг тоонтоёо мартаһан Елена Борохитова
«Тугаар ерэһэн Сарюунанууд»
«Буряад үнэнэй» хүхюун дорюун ветеранууд һаяхана ойн баярай үдэшэдэ уулзаа. Тэдэнтэеэ золгоод, иигэжэ “фейсбук” холбоондо бэшэбэб:
- Һаяхана мэтэ һанагдана: «Туяа татаһан Туяананууд, тугаар ерэһэн Сарюунанууд...» - гүүлэжэ ябагдаа бэлэй. Элитэ ехэ ирагуу найрагша Лопсон Тапхаев иигэжэ зохёогоод, баһа нэгэ сайлалгын үедэ уншажа байгша һэн. Сэдьхэлэйнгээ дулаахан ульһа дамжуулһан, сэнтэйхэн һургаал заабаринуудаараа харгыемнай гэрэлтүүлһэн, һайхан абаритай багшанарнай, баяраа мэдүүлнэб!
"Буряад үнэнэй" хүхюун, дорюун ветеранууд