822
Буряад Уласай хүдөө ажахын болон эдеэ хоолой яаманай дэмжэлгээр Буряад Уласай Загарай аймагай Усть-Брянь һууринда тамирай талмайн нээлгын баяр ёһолол үнгэргэгдэжэ, хүүгэдэй дунда мүрысөөн эмхидхэгдээ.
Усть-Брянь һууринда тамирай һалбари хүгжөөлгэдэ ехэ анхарал хандуулагдадаг. Ажаһуугшад хоккей, волейбол болон хүл бүмбэгэ дуратай наададаг. Аймагай захиргаанай тэмдэглэһэнэй ёһоор, жэлһээ жэлдэ спортоор һонирходог ажаһуугшадай тоо олошорно. Тиигэжэ ганса аймагай түбтэ бэшэ, харин һомонуудташье тамирай эмхинүүд баригдана.
Буряад Уласай хүдөө ажахын болон эдеэ хоолой яаман «Хүдөө нютагуудай тогтууритай хүгжэлтэ» гэһэн подпрограммын хэмжээндэ 480 дүрбэлжэн метр талмайтай тамирай талмай бариһан байна. Тиихэдэ Буряад Уласай спортын болон залуушуулай бодолгын талаар яаман болон Загарай аймагай захиргаан барилгада хабаадалсаа. Усть-Брянь нютагта тамирай эмхи барилгада 3,1 сая түхэриг һомологдоо, федеральна бюжетһээ 2,8 сая түхэриг гаргашалагдаа. Хоккей болон бага футбол нааданай ворота, баскетбол наадаха тоног хэрэгсэл болон һандалинууд абтаа.
- Шэнэ баригдаһан эмхинүүд хүдөө нютагуудые мүнөө үеын түхэлтэй болгоно, үхибүүдэй бэеэ һорихо талаар зохид оршон байгууулагдана – бидэ энээндэ ехэ баяртай байнабди, - гэжэ Буряад Уласай хүдөө ажахын яаманай хүдөө дэбисхэр болон бага ажахынуудые хүгжөөхэ талаар зүбшэлэгшэ Евгений Цыбиков тэмдэглэбэ.
Жэлэй дүүрэтэр улас дотор Кабанск аймагай Кабанск һууринда тамирай талмай, Баргажан аймагай Хилгана нютагта ФАП баригдаха. Тэрэнһээ гадуур, Кабанск аймагай Кабанск, Шергино нютагуудта болон Захаамин аймагай Шара-Азарга нютагта ажаһуугшадай үүсхэһэн түсэлөөр тамирай болон хүүгэдэй наадаха гурбан талмай баригдаха юм. Энэ хэрэгтэ 16 саяһаа дээшэ түхэриг һомологдонхой.
2015-2018 онуудта энэ программын хэмжээндэ Байгал шадарай аймагай Татаурово, Сэлэнгэ аймагай Темник, Новоселенгинск, Хурамхаан аймагай Барагхан, Тарбагатай аймагай Тарбагатай, Хойто-Байгалай аймагай Холодная нютагуудта тамирай 6 талмай нээгдэһэн байна. Тэдэнэй барилгада 54,6 сая түхэриг һомологдоо: федеральна бюджетһээ – 25 сая түхэриг, уласай бюджетһээ – 19,8 сая түхэриг, аймагуудай бюджедүүдһээ 9,8 сая түхэриг гаргашалагдаа.
Буряад Уласай Хүдөө ажахын болон эдеэ хоолой яаманай мэдээсэлэй албанай гэрэл зураг
