807
Мүнөөдэр, августын 19-дэ, Буряад Уласай Толгойлогшо Алексей Цыденовэй хүтэлбэри доро үнгэргэгдэһэн түсэблэлгын суглаанда Болбосоролой болон эрдэм ухаанай сайдай нэгэдэхи орлогшо Галина Фомицкая улас дотор һургуулинууд һуралсалай шэнэ жэлдэ хэр зэргэ бэлэн бэ гэжэ тоособо.
Мүнөдэрэй тоо баримтаар, уласай 459 һургуулиин 425-иинь һуралсалай жэлдэ бэлэн. Һургуулинуудай хэр зэргэ бэлэн байһаниие түсэблэгдэһэн гуримаар шалгагдана. Байгша ондо һургуулинуудай заһабарилгада федеральна, уласай болон аймагуудай бюджедүүдһээ бүхыдөө 724,5 сая түхэриг дамжуулагдаа.
Галина Фомицкаягай тэмдэглэһэнэй ёһоор, Алас Дурнын тойрогой тэдхэмжын хэмжээндэ 348 сая түхэриг һомологдожо, 22 һургуулида ехэ заһабари хэгдэһэн байна. Мүнөө Аха аймагай Хара-Хужарай һургуули заһабарилагдаа. Августын 30 болотор үшөө 13 һургуулида заһабарилга дүүрэхэ юм. Жэлэй дүүрэтэр долоон һургуулида заһабарилгын ажалнууд түгэсэхэ. Тиихэдэ Бабанта аймагай Маловска һургуулида 2020 ондо ехэ заһабари хэгдэхэ юм.
19 һургуули заһабарилгада уласай бюджетһээ үшөө 105,7 сая түхэриг һомологдоо. Тэдэнэй 14-иинь һуралсалай шэнэ жэлдэ бэлэн, үшөө нэгэ һургуулида шалгалта үнгэргэгдэнэ. Бэшүүр аймагай Малокуналейн болон Хойто Байгалай аймагай Нижне-Ангарска һургуулинуудта һуралсалай жэлэй эхилтэр заһабари хэгдэхэ. Баргажан аймагай Улан болон Зэдэ аймагай Желтурагай һургуулинуудта сентябриин 1-һээ хойшо заһабари хэгдэһээр байха. Эдэ һургуулинууд ондоо байшануудта һуралсал үнгэргэхэ, тэдэниинь бэлэн.
- Буряад Уластахи Роспотребназор болон Госпожнадзор эмхинүүдтэй, түрэлхидтэй хэлсэгдэжэ, эдэ байшануудта хэшээлнүүд үнгэргэгдэхэ, - гэжэ Галина Фомицкая тэмдэглэбэ.
Сентябриин 1 болотор уласай һургуулинуудай тамирай 12 танхим заһабарилагдажа, шалгалта гараха юм. Тэрэнэй заһабарилгда «Болбосорол» гэһэн үндэһэтэнэй түсэлэй хэмжээндэ мүнгэ һомологдоо. Октябрь һарада һургуулиин үхибүүдые шэрэхэ тусхай 13 автобусууд уласай арбан гурбан һургуулинуудта дамжуулагдаха юм.
Анна Огороднигой гэрэл зураг
