Зэдэдэ болоһон үерэй хойшолонгууд зүбшэгдэнэ
Буряад Уласай Толгойлогшо Алексей Цыденов үертэ абтаһан нютагуудые шалгаба. Мүнөө дээрээ Загарайн Эрхирэг һууринда уһанай соргонууд табигдаа, Зэдэдэ хохидоһон зондо мүнгэн тэдхэмжэ түлэгдэжэ эхилээ.
Июлиин 21-дэ ехэ хура бороогой ороһон шалтагһаа Эрхирэг тосхондо олон гэрнүүд уһанда абтаа бэлэй. Тэрэнэй хойшолон усадхалгада 2 сая 600 мянган түхэриг һомологдоо. Мүн Зэдэ аймагай һууринууд болон харгынууд һандарһан байна. Эдэ хоёр аймагта хамта дээрээ 122 гэр бууса, 289 гэр дорохи подполи уһанда абтаа, 955 хүн хохидолдо ороо. Тэндэхи зондо бүхыдөө 5 сая 600 мянган түхэригэй мүнгэн тэдхэмжэ түлэгдөөд байна.
- Хохидолдо ороһон зондо мүнгэн тэдхэмжэ хэр үгтэжэ байнаб гэжэ шалгаабди. Прокуратуратай суг эдэ гэрнүүдэй эзэдэй эрхэ үнэмшэлгэшьегүй һаань, бултандань туһаламжа үгэхэ тухай хэлсэжэ байнабди. Энэ долоон хоног соо сүүдэй нүүдэл зүблөөн үнгэрхэ, тус асуудал байра дээрээ шиидхэгдэхэ, - гэжэ Алексей Цыденов мэдээсэбэ.
Дэрэстэй, Петропавловка тосхонуудай даамба барилгын түсэл зохёогдожо, мүнөө жэлдээ хамгаалагдаад, барилга эхилхэ ёһотой.
Буряад Уласай Толгойлогшо мүн лэ үер, уһанда абтаһан хүдөөгэй харгынуудые шалгаба. «Гусиноозёрск-Петропавловка- Закаменск-Белоозёрск-Ёнхор, Оёор-Тохой-Доодо Тори-Дээдэ Тори-Улзар» гэһэн харгынууд һандаранхай.
Зэдэдэ бүхыдөө 21 сая 600 мянган түхэригэй гарза тоологдоо. Үерэй хойшолонгуудые усадхалгада Буряад Уласай жасаһаа Зэдын аймагта мүнгэн тэдхэмжэ олгуулха талаар дансануудые бэлдэхыень Алексей Цыденов даабари үгэбэ.
Буряад Уласай Засагай газарай мэдээсэлэй албанай гэрэл зураг