Анна Огороднигой гэрэл зураг
Буряадаймнай драмын театр сагай эрилтээр улам һунаһан ээлжээтэ хаһаяа “Тугшан” гэһэн шэнэ зүжэгөөр түгэсхөө. Мэдээжэ Саян Жамбаловай зохёолоор табигдаһан зүжэг тушаа һанамжаяа дурадхахаһаа урид, хоёр-нэгэн юумэ дурсаха дуран хүрэнэ.
Үе дамжан баталагдаһан үнэхөөр ехэ бэлигтэн
1990-ээд оной тэн багаар буряад соёлдо хабаатай зүйлнүүдэй эршэтэйгээр хүгжэн һалбарха хаһада Улаан-Үдын дээдэ һургуулинуудай хамтын байрын сонхо бүхэнһөө зунай үдэшэнүүдтэ магтаал түүрээн, янза бүриин магнитофонһоо: “Хүхын дуунай һүни” ба “Дуһал, дуһал, дуһалхан” гэһэн дуунууд зэдэлжэ байгша һэн. Илангаяа манай үеын оюутад, хүбүүд басагадгүй, саг үргэлжэ филармониин тооһотойхон һандалинууд дээрэ альгаа нэерсэ ташажа, шэнэ тоглолто бүхэниие хүлеэжэ ядажа байгша бэлэй.
Тэрэнэй удаа Жамбаловтанай найруулгатай ээлжээтэ уулзалга 2000-аад онуудай эхеэр, дунда һургуулида багшалжа байхадамни ушараа. Гуша гаран жэл соо Буряадай, Агын, Усть-Ордагай хото хүдөөгэй тайзанууд дээрэһээ эршэтэйгээр наярдаг, олоной хүлеэдэг “Гэсэр” (мүнөө “Баатар, Дангина”) уран һайханай харалган байха. Жэлһээ жэлдэ хото хүдөөгөөр янза бүриин шэб шэнэхэн гоёлой дэгэлнүүд эсхэгдэхэ, хатарай ба дуунай багшанар хүлһэлэгдэхэ, зарим бэлиг талаантай ба олзын шүлһэтэй нютагаархид торго, арһа, тобшо наймаалжа, хубсаһа хунар оёжо ба бэлэн дэгэл уриһаар үгэжэ, бата баршагаа оложо гараха. Һүүлэй жэлнүүдтэ олон шэнэ дуунууд тусхай “минусовкотоёо” гарадаг боложо, хүдөөгэй хабаадагшад амаршоо ёһотой. Нютаг бүхэндэ тусхай “конвейер” байгуулагданхай, халуун тэмсээнүүд ангинуудай, һургуулинуудай ба улам саашаа аймагууд, можонууд дундуур хүгжэхэ. Зарим тээгүүр борохон ухаанда багтагдашагүй юумэнүүд дайралдаха, илагшад ба азагүйшүүлэй дунда атаа мэеэн, уг унги хүрэтэр зүрилдэхэ ушарнууд тохёолдохо.
Багшалха хаһадаа хэды жэл “Гэсэр-Дангинада” шабинараараа оролсоо һэмди. Нэгэтэ шэнэ дуу, хатар бэдэржэ байгаад, түбэй дэлгүүрэй углууда улаахан гадартай “Урагшаа” гэһэн дуунуудай согсолбори оложо, һонирхон шагнагдаа. Тэрэ үеэр зэдэлдэг заншалта дуунуудһаа нэгэл өөрсэ маягтай аянганууд эндэһээ соностоо. “Найрай бүхын соло” гэжэ дуун доронь (эндэ шагнажа болохо https://mu.fm/track/ najraj-buhyn-solo-vzdapax) хоёр хабаадагшадта монгол барилдаашадай зодог, шуудаг оюулан, бүхэ барилдаа дууряаһан хатар найруулжа, олоной дура буляажа, харагшадай һайшаалда хүртөө һэмди.
Һүүлэй хэдэн жэлдэ энэ бэлигтэй айлтай дахин золгохо талаантайб. Шууяа хүүеэн соогуур үлүү үгэ, хүүр тэсэмгэйгээр дамжан, Буряадай нюур театрнуудые хүтэлбэрилхэ тушаалнуудта томилогдоо. Абьяас бэлиг ба хоб жэб хоёр наран, һүүдэр мэтэ зэргэлээд амидардаг юртэмсэ ха юм даа. Хэр зэргэ бэлигынь баталагдахаб, хүнэй зүрхэндэ сараа орхин мүнхэрхэ найруулганууд бэелхэб - энэмнайл гол сэгнэлтэ ба шэгнүүр боложо үгэхэ. Саг - засаг.
Анна Огороднигой гэрэл зураг
Һүр һүлдэеэ алдаһан арадай зураглал
Зүжэгэй наһанай ута, богонинь - зохёолшын олгоһон табисуурһаа. Найруулагшын хараа бодолһоо уламжалан гү, али гол рольдо наадагшынгаа хуби заяа дахажа мүнхэрхэнь урдаа байдаг. Юрэ харагшын сэдьхэлдээ “Будамшуу”, “Хойто наһандаа уулзахабди”, “Чингисхан”, “Төөригдэһэн хуби заяан” мэтэ найруулгануудые саг үргэлжэ афишада бэдэрдэгби.
Харин “Тугшан” хэр зэргэ ерээдүйтэй бүтээл болобо гээшэб - саг харуулха. Зүжэгэй анха түрүүшынхиеэ харуулагдаһанай удаа олон бодол толгойдо үлэнэ (һанаа зобоогоо хадаа, зорилгоёо хүсөө гэжэ бодоё). Гол герой - хуби заяагаа бэдэрһэн залуу хүбүүн Дугар – хуушан, шэные холбоһон тэсэмгэй зантай бөө, залуудаа инаг дураяа аршалжа шадаагүй үбгэн хүгшэн хоёр, эрдэмэй зам шэглэжэ ябаһан, болбосорол, һургааляар түгэд залуу басаган ба сабаагүйхэн, зориһондоо убайгүйгөөр дамжадаг, тугаархи басаганда тад эсэргүү, харша үхин болон бусад: ямаршье сагта нютагта, арадта дайралдадаг бэлигтэй - бэлигээр хомор, соёлтой - соёлоор дунда, урагшатай - урагшагүй улад. Һүр һүлдэеэ алдаһан арадай зураглал, этигэл, найдабарияа гээһэн хүгшэн, залуугүй зонууд г.м. олон үнэншэмэ дүрэнүүд тайзан дээгүүр үнгэрнэ.
Олон геройнуудай, илангаяа залуушуулай, модохир яряанай хэлэн ба соо хараһан, шобто хэлэһэн бөөгэй үгүүлэлнүүд хоёрой харша илгаа, найруулгын яһалахан олзо боложо үгөө гэжэ һананам: “Зоригтой шанга басаган, ёhотой хатан, урдамни дэмы ерээгүйш, дээдын хуби заяагаар, дэмы бэшэ хара бөө ами наhыеш абаха гээ. Дунгар hайхан умайhааш Дугарай (гол геройн - авт.) яhан тараха, шоно угай үри hадаhан шинии умайhаа унаха. Олон- олон жэлнүүдтэ омог дорюун hуухат даа, тугшан сэрэгшэнэй уг гарбал саашань hайнаар дамжуулхат даа”. “Тэнгэри” эблэлэй ударидагша тус найруулгын зүбшэлэгшэ болоо гэжэ һануулалтай. Эндэ-тэндээ фэнтезиинш маягтай һаа, энэ зүжэгнай жанрайнгаа орёо эрилтэнүүдые хүсэд дүүрэн хангаһан бүтээл боложо шадаа.
Зүжэг шэнжэлэгшэд ба шүүмжэлэгшэд тустаа өөрынгөө һанамжаар хубаалдаха байха. Энэ бэеэрээ хүрэжэ ерэхэ намарай ээлжээтэ хаһада үргэн олон сэгнэгшэдтээ шэнээр дурадхахаһаа урид, зарим тэды һулашагаар татаатай гэжэ һанаһан хүбшэргэйнүүдээ шангадхаад, Буряад театрнай төөрин алдаһан Тугшанайнгаа (Буряадайнгаа) жолоо бата бэхеэр гартань адхуулха байха гэжэ найдагдана.
Саян Жамбаловай найруулһан ээлжээтэ бүтээлэй урда малгайгаа тайлаха үшөө нэгэ ушар гэхэдэ, үри хүүгэдэйнь шэлэһэн соёл уралигай зам болбол энэ бэлигтэй гэр бүлын хэжэ байһан наһанайнь хэрэгэй дүн ба юунһээшье сэнтэй сэгнэлтэ боложо үгэнэ гэжэ һанагдана. Уг дамжаһан мэргэжэл тогтомол түүхэтэй ба хүгжэлтэтэй ниигэмэй гэршэ боложо үгэ- дэгынь дамжаггүй.