1563
Буряад Уласта “Сэбэр уһан” гэһэн федеральна программа бэелүүлэгдэнэ. Августын 22-то уласай барилгын болон гэр байрын ажахы шэнэдхэлгын сайд Николай Рузавин Улаан-Үдэ хотын захиргаантай хамта хотын объектнүүдтэ ажалай ябаса хинан шалгаба.
Уласай ниислэлдэ энэ жэлдэ Улаан-Үдын зүүн бэеын уһаар хангаха талаар ажал ябуулагдана. Клеверная, Ковалевскаягай, Шишкинай, Крамскойн, Расковойн, Ольховаягай гудамжануудаар, Герценэй гудамжа болон Улаан-Үдын Забайкальский микрорайондо насосой станци ба уһаар хангалгын 6 километр тухай утатай сорго баригдажа эхилээ. Энэ ажалда мүнгэн 2019 ондо 153 сая гаран түхэриг һомологдохо. Николай Рузавинай хэлэһэнэй ёһоор, жэлэй үнгэртэр бүхы ажалнууд хэгдэжэ, долоон мянган хүн шанартай сэбэр уһаар хангагдаха.
- Уһанай сорго татаха, водоколонконуудые табиха гэһэн зорилго бидэндэ табигдаа. Хэрбээ ажаһуугшад гэртээ уһа оруулха гэбэл, тэдэнэр «Водоканал» МУП-та хандаха болоно, - гэжэ Николай Рузавин хэлээ.
“Сэбэр уһан” федеральна түсэл дүтын 6 жэлэй туршада уласай ажаһуугшадай 66% шанартай сэбэр уһатай болохо гэжэ хараална. Мүнөө энэ тоо 44,1% хүрэнэ. “Сэбэр уһан” түсэл 2024 он болотор бэелүүлэгдэхэ. Тэрэ сагта уһа абалгын түхеэрэмжэнүүд, уһа бэлдэхэ объектнүүд ба уһаар хангалгын түб сүлжээнүүд бүхы уласта баригдахаар түсэблэгдэнэ.
- Уласай ажаһуугшадай 66% түб худагуудһаа шанартай сэбэр уһаар хангагдахын тула 9,5 гаран миллиард түхэриг хэрэгтэй. Мүнөөдэрэй байдалаар, 1 миллиард 250 сая түхэриг 2019-2021 онуудта Ородой Холбоото Уласай бюджедтэ хууляар баталагданхай, - гэжэ Буряад Уласай барилгын болон гэр байрын ажахы шэнэдхэлгын сайд хэлэнэ.
