1490
«Соёл» гэһэн үндэһэн түсэл бэелүүлгын ашаар Шэнэ Бэрээн, Хэжэнгэ, Хяагтын Адаг һуурингуудай, мүн Северобайкальск хотын болон Улаан-Үдын Восточный микрорайоной номой сангууд һэльбэн шэнэлэгдэжэ, мүнөө үеын эрилтэ хангама болгогдохонь. Ородой Холбоото Уласай 38 можо нютагай тоодо Буряад оромнай гүрэнэй дэмжэлгэдэ хүртэжэ, номой сангуудай байшангуудые заһабарилха, шэнэ номуудые, комьютернуудые, бараа абаха, мүн мэргэжэлтэдэй болбосорол дээшэлүүлхэ аргатай болобо. Эдэ хэрэгүүдые бэелүүлгэдэ дүн хамтадаа 35 сая түхэриг һомологдохо юм ха.
Гэхэ зуура, нютагай засагай байгууламжануудшье туһаламжа үзүүлнэ. Байшангуудые заһабарилгада хабаадалсахаһаа гадна дэргэдэхи талмайнуудыень болбосон түхэлтэй болгохо, мүн Интернет оруулха, харуул-түймэрэй хамгаалгын, видео-адаглалгын түхеэрэлгэнүүдые тодхохо талаар ажалнуудые даажа гараха юм.
Мүнөө дээрэ номой сангуудые заһабарилгын ажал түлэг дундаа ябажа байна. Нэн түрүүн дулаасуулха, уһа болон зайн гал дамжуулха түхеэрэлгэнүүд һэльбэн шэнэлэгдэнэ.
Номой сангуудай байшангууд гол түлэб 1970-80-яад онуудта баригдаһан гэжэ тэмдэглэхэ хэрэгтэй. Гэхэ зуура, эгээл хуушаниинь – Хяагтын Адагай хүдөөгэй номой сан – аяар 1957 ондо баригдаһан байна.
Буряад Уласай соёлой яаманай мэдээсэлэй албанай гэрэл зураг
