853
Үнгэрһэн долоондо Буряад Уласай Засагай газарай суглаанда гурбан аймагай хүтэлбэрилэгшэд нютагай засагай байгууламжануудай ниигэмэй-эдэй засагай хүгжэлтын гол һалбаринуудай талаар тоосоһон байна.
Зэдэ аймагай хүтэлбэрилэгшэ Валерий Цыренов, Захаамин аймагай Сергей Гонжитов, Хяагта аймагай Бимба Нимаев гэгшэд 2018 оной ниигэмэй-эдэй засагай хүгжэлтын дүнгүүд, налог татабарииин болон налог татабариин бэшэ олзо, бэелүүлэгдэжэ болон түсэблэгдэжэ байһан мүнгэ хүрэнгэ оруулалгын түсэлнүүд, үндэһэн түсэлнүүдэй бэелүүлгын талаар болон аймагуудта шиидхэгдэхэ асуудалнууд тухай хэлэбэ.
Тоосоһоной дүнгүүдээр Алексей Цыденов үндэһэн түсэлнүүд аймаг дотор яажа бэелүүлэгдэнэб, ажалнууд ямар шатада хэгдэнхэйб гэжэ тодоор тоосохыень даалгаба.
- Танай тоосоһоор, үндэһэн түсэлнүүдэй талаар ямар ажал хэгдээб гэжэ ойлгогдоногүй. «Спорт – норма жизни» гэһэн федеральна түсэлөөр наһанай хубаряаар хэды хүн бэеэ һориноб? 2024 он болотор энэ тоо яажа хубилхаб? «Болбосорол» гэһэн үндэһэн түсэлөөр хүүгэдэй хэды сэсэрлигүүд, һургуулинууд бииб? Бага болон дунда олзын хэрэг эрхилэлгын талаар ямар дэмжэлгэ үзүүлэгдэнэб? Гэр байра бариха талаар ямар туйлалтануудтайбта? Эдэ танай шухала асуудалнууд, - гэжэ Зэдэ аймагай хүтэлбэрилэгшэ Валерий Цыреновэй тоосоһоной удаа Алексей Цыденов тэмдэглэбэ.
Уласай хүтэлбэрилэгшын хэлэһэнэй ёһоор, аймагуудай засаг дарганар нютагай засагай байгууламжануудай дэбисхэртэ бэелүүлэгдэжэ байһан мүнгэ хүрэнгэ оруулалгын түсэл бүхэниие һайн мэдэжэ, бэелүүлхэ ёһотой.
- Томо түсэл бэелүүлхэдээ, таанар, тэрээн тухайгаа һайн мэдэхэ ёһотойт. Томо түсэлнүүд танай аймагуудта олон бэшэ. Би уласай түсэлнүүд тухай һайн мэдэхэб, тэдэниие бэелүүлхэ талаар ажал ябуулнаб, - гэжэ Алексей Цыденов аймагай засаг дарганарта хандаба.
Зэдэ аймагай хүтэлбэрилэгшын тоосоһоной удаа, түсэлнүүдээ хүсэд мэдэнэгүйт, харюусалгатайгаар ажалдаа хандахыень Алексей Цыденов зааба.
Ородой Холбоото Уласай Юрэнхылэгшэ Владимир Путинай «майн» тогтоолнуудые 2024 он болотор бэелүүлхэ зорилготой үндэһэн түсэлнүүд байгуулагдаа гээд тэмдэглэлтэй. «Элүүрые хамгаалга», «Болбосорол», «Демографи», «Соёл», «Аюулгүй, һайншанартай автомобилиин харгынууд», «Гэр байра болон хотын оршон», «Эрдэм», «Малое и среднее предпринимательство и поддержка индивидуальной предпринимательской инициативы», «Цифровая экономика», «Производительность труда и поддержка занятости», «Международная кооперация и экспорт», «Экологи» гэһэн 12 һалбаряар түсэлнүүд байгуулагданхай.
Анна Огороднигой гэрэл зураг
