Монголой олзын хэрэг эрхилэгшэд Буряадай зүгын тооһоор һонирхожо, «Мед Бурятии» гэһэн бүлгэмэй захирал Валерий Васильев хүршэ гүрэнтэй хэлсээ баталаа.
- Монгол гүрэнтэй хүдэлхэ һанаатай хэлсээ баталжа, мүнөө асуудалнууд шиидхэгдэнэ. Бидэ хүршэ гүрэнэй наймаанай дэлгүүр сэгнэжэ, саашаа яажа хүгжэхөөр бэ хараха хүсэлтэйбди. Мүнөө Монголдо эршэтэйгээр зүгын ажахы хүгжөөнэ. Бидэ 3-4 тонно зүгын тоһо хүршэ гүрэндэ худалдаха аргатайбди, уласай ажахынуудые нэгэдүүлжэ шадаа һаа, энэ талаар арга боломжомнай үргэдхэхэ. Мүнөө Буряадта 100 тонно хүрэтэр зүгын тоһон үйлэдбэрилэгдэнэ, хамтараа һаа, тэрэнэйнгээ хахадыень хүршэ гүрэндэ худалдахаа р байхабди, - гэжэ Валерий Васильев хэлэбэ.
Валерий Васильев 45 жэлэй туршада зүгынүүдые үдхэнэ. Тэрэ Кабанск аймагта зүгын 140 гэртэй. Март һараһаа октябриин һүүл болотор олзын хэрэг эрхилэгшэ зүгын тоһо бэлдэдэг. Тэрэ гансаараа бүхы ажахыгаа ябуулна, тиимэһээ энэ һжалаар һонирходог хүнүүдые ажахыдаа урижа, һургаха хүсэлтэй.
Урагшаа һанаата Валерий Васильев байгша оной хабар хүршэ гүрэн гаража, үзэсхэлэ-яармагта хабаадаа.
- Минии зүгын тоһо үнэтэйшье һаань, хнүүд дуратайгаар худалдажа абаа. Монголой зүгын тоһо амталааб, амтыень ойлгоогүйб, - гэжэ Буряадай зүгышэн тэмдэглэнэ.
«Мед Бурятии» бүлгэмдэ хоёр янзын зүгын тоһо үйлэдбэрилнэ. Валерий Васильев саашадаашье улас дотор зүгы үдхэлгэ хүгжөөхэ түсэбтэй. Тэрэ зүгышэдые нэгэдүүлжэ, Монгол гүрэндэ наймаалха хүсэлтэй.
- Хүнүүд зүгын тоһо суглуулаад, тэрэнээ худалдажа ядана, - гэж зүгышэн шамарлана.
Буряад Уласай хүдөө ажахын болон эдеэ хоолой яаманай мэдээсэлэй албанай гэрэл зураг