​​Хальмаг үхэр Буряадта үсхэбэрилнэ

Ажахы амжалтатайгаар ударидагша Галина Дабаева шан абаха үедөө

Һутайн ажахы 17 жэлэй саана хальмаг үхэр үсхэбэрилжэ эхилһэн юм. Түгнын уудам талада хагдатай ногоо зулгаан үдэжэ байһан хальмаг үхэрэйнь тоо толгой мүнөө дээрээ 3 мянгадаа хүрэжэ бай­на. Ушар тиимэһээ Хальмаг Уласһаа бууһан үүлтэр сахигша мэргэжэл­тэд хамагай түрүүн тиишээ зориһон байна.

2018 оной дүнгүүдээр, Һутайн ажахы Буряадтаа хүгжэлтэ ехэтэй эгээл эрхим хүдөө эмхи гэжэ элирээ бэлэй. Тус ажахые амжалта түгэс эды олон жэлдэ ударидажа ябаһан Гали­на Дабаевагай дуулгаһаар, Хальмаг Уласһаа эбэртэ бодо мал сэхэ абадаг болоһоорнь 13 жэл гүйсэбэ.

- Тон һайн шанартай уг шуһатай үнеэдые бидэндэ дамжуулна. Тии- мэһээ һайхан тэжээл дээрэ арьбажаһан малыемнай зон ехэ дура­тайгаар худалдан абана. Хэрбэеэ үнгэрһэн жэл 320 толгой үхэр Казах­стан руу ябуулаа һаа, байгша ондо – 337 ябуулаабди, - гэжэ Галина Даба­ева хөөрэнэ.

Холын Хальмаг Уласһаа бууһан мэргэжэлтэд Түгнын талада үсхэ- бэрилэгдэжэ байһан үнеэдые тон үндэрөөр сэгнээд, сэбэр уг шуһатайень тэмдэглээ. Гадна хальмаг үхэрэй үүлтэр улам һайжаруулха, улад олондо тарааха, дэлгэрүүлхэ та­лаар эб нэгэн хүдэлэе гэжэ дурадхаа.

- Танай уласта хальмаг үхэр хэр үсхэбэрилэгдэнэб, үдэнэб гэжэ ха- жууһаа ходо ажаглажа байдагбди. Буряадай талада бэлшэжэ ябаһан хальмаг үхэрнүүд тобир тарган тула ехэ мяха үгэнэ. Тиигэхын тулада ехэ гуримтай һайн ажал ябуулагдана, - гэжэ айлшад тэмдэглээ. Үүлтэртэ үхэрэй уг шуһа сахигшад саашада­ашье сэбэр хальмаг үхэр эльгээжэ байхаар бэлэн байһанаа мэдүүлээ. Иигэжэ Хальмаг Уласай хүдөө ажа­хын болон эдеэ хоолой сайдай ор­логшо Игорь Церенов мэдүүлбэ.

Социальна холбоонһоо гэрэл зураг