​​Буряадай «Үльгэр» театрай зүжэг Томск хотын ажаһуугшадта һайшаагдаба

Августын 21-һээ 25 болотор үнгэрһэн «Cкоморохой шэдитэ балгаан» гэһэн Уласхоорондын театрай III ехэ нааданда «Үльгэр» театр хабаадаба. Томск хотодо Ородой болон холо ойрын гадаада гүрэнүүдэй эрхим театрнууд суглараа. Тэдэнэй дунда «Алтан баг» гэһэн Үндэһэнэй театрай шанда хүртэһэн 5 театр байгаа гэжэ тэмдэглэлтэй.

Найруулагша Влад Костиной болон уран зурааша Светлана Рыбинагай хамтаран бүтээһэн «Хүгжэмэй дэлгүүр» (Музыкальный магазин) гэһэн зүжэг Томск хотын хоёр театрта харуулагдаа.

Буряадай «Үльгэр» гэһэн хүүхэлдэйн театрай харуулһан «Хүгжэмэй дэлгүүр» хүн түрэлтэнэй мүнхын баялигай оршон сагта хуурмаг зүйлнүүдээр, ёһотой абьяас – ойро зуурын эрилтээр, дээдэ гарай мэргэжэл – гүйхэн бодолоор һэлгэгдэхэ тухай бэрхэшээлтэ асуудал хүндөө. XX зуун жэлэй 60-аад онуудаар бэшэгдэһэн онтохон мүнөөшье онсо удхатай байһаар.   

Буряад Уласай Соёлой яаманай мэдээсэлэй албанай гэрэл зураг