853
«Камчаткын эвенүүдэй үдэрнүүд – Буряад орондо» гэһэн түсэлэй хэмжээндэ «Нургэнэк» болон «Легенда» гэһэн зохёохы бүлгэмүүд Бестужевай нэрэмжэтэ Ород драмын театрай урдахи талмай дээрэ дуу-хатарай юһэн найруулга харуулаа. Тус хэмжээ ябуулга Буряад Уласай Эвенк соёлой «Арун» гэһэн түб эмхидхээ.
Камчаткын эвенүүд Буряад ороной эвенкнүүдтэй танилсажа, холбоо, харилсаа тогтоохо хүсэлтэй августын 23-да Улаан-Үдэдэ ерээ һэн. Тиигэжэ Хурамхаан аймагай Алла, Уланхаан һуурингуудта тоглолто табяа. Гадна Байгал далайн эрьедэхи Гремячинск тосхон хүрэһэн байна. Тоглолтонуудһаа гадна, тэдэнэр хэнгэрэг сохижо, хүгжэм гаргаха, бисерээр шэмэг зүүдхэл бүтээхэ, орын нооһоор юумэ нэхэхэ талаар хэшээлнүүдые үнгэргөө. Мүн эвенүүдэй хурим түрын ёһололнуудыешье харуулжа, Буряад ороной эвенкнүүдые һонирхуулаа.
Тус зохёохы бүлгэмүүд тухай хэлэхэдэ, «Нургэнэк» ансамбль 1972 ондо байгуулагдаһан, харин тэрэнэй гэшүүд байһан уран бэлигтэн 2007 ондо дахин сугларжа, «Легенда» гэһэн нэгэдэл эмхидхэһэн байна.
- Дахин заатагүй иишээ ерэхэбди. Арад зониинь хүндэмүүшэ, һайхан сэдьхэлтэй, урин налархай зантай. Манай табиһан тоглолтонуудые аргагүйгөөр һонирхоо, - гээд «Нургэнэк» ансамблиин гэшүүд Буряад орон ерэһэндээ урматай байһанаа мэдүүлнэ.
Буряад Уласай Соёлой яаманай мэдээсэлэй албанай гэрэл зураг
