Буряадай Толгойлогшо Алексей Цыденов эдеэ хоол үйлэдбэрилдэг һалбариин уласай “Бурятхлебпром”бүлгэм болон мяханай “Сэлэнгэ” фабрика хүрэһэн байна. Уласай хүтэлбэрилэгшын хэлэһээр, нютагай үйлэдбэрилэгшэдые дэмжэлгэ хадаа уласай Засагай газарай зорилгонуудай нэгэн юм.
Алексей Цыденовтэй хамта эдэ үйлэдбэринүүдтэ Буряад Уласай Засагай газарай Түрүүлэгшын орлогшо – хүдөө ажахын сайд Даба-Жалсан Чирипов ба үйлэдбэриин болон худалдаанай сайд Сергей Желтиков хоёр ябалсаа. Бурятхлебпром бүлгэмдэ Алексей Цыденов талханай эдеэ хоол, амтан шэхэртэй зүйлнүүдые үйлэдбэрилдэг цехүүдтэ хүрэһэн байна. Уласай Толгойлогшо амтан эдеэнһээ ама хүрэжэ, торт шэмэглэхэ мастер-класста хабаадаа.
Хилээмэнэй зүйлнүүдые болгохо талаар тус үйлэдбэри улас дотор түрүү һуури эзэлнэ, наймаанай дэлгүүрэй 20% эзэлдэг. Эндэ 700 гаран хүн хүдэлдэг.
- Энэ һалбарида үрдилдэн тэмсэлгэ хүгжэнэ, аймагууд болон хотонуудта хубиин пекарнинууд олоор нээгдэнэ. Тус бүлгэмэй тогтууритай хүдэлхын тула хүршэ нютаг можонуудта ба гүрэнүүдтэ наймаанда гараха хэрэгтэй. Нютагай предприятинууд тогтууритай хүдэлжэ, үйлэдбэриеэ улам эршэдүүлжэ байхаар бидэ ажалаа ябуулха болонобди, - - гэжэ Алексей Цыденов хэлээ.
Мүнөө «Бурятхлебпром» Монголдо сухари ба сушка эльгээнэ, мүн баһа шэхэртэй печени абаашажа худалдаха һанаатай.
Тиихэдэ уласай Толгойлогшо үйлэдбэриин ба худалдаанай яаманда болбосоролой яамантай хамта юрэнхы болбосоролой эмхи зургаануудта “Бурятхлебпромой” үйлэдбэрилһэн эдеэ хоол абахыень дурадхал бэлдэхэ гэжэ даалгаа. Жэшээнь, эдэньболбол ганса йодтой бэшэ харин селентэй, түмэртэй болон бусад хүнэй бэетэй хэрэгтэй нэмэлтэнүүдтэй бүтээлнүүдые гаргаха бэлэн.
«Бурятхлебпром» бүлгэмэй юрэнхы захирал Марина Александровагай хэлэһээр, 15 сая түхэригтэ шэнэ тоног түхеэрэмжэ абажа, үйлэдбэри хүгжөөхэ талаар түсэбүүд бии. 2014 ондо тус бүлгэм 30 сая түхэригэй тоног түхеэрэмжэ абаа, тэрэнэй 25% уласай Засагай газарай тэдхэмжэдэ хүртөө һэн. 6 минутын туршада халуун хилээмэ хүргөөд, орёогоод үгэхэ вакуум хүргэгшэ худалдан абаха, талха гаргаха ледогенератор ба подово сортын хилээмэ бариха шэнэ пеэшэн абахаар хараалагдана.
Тиихэдэ уласай хүтэлбэрилэгшэ мяханай“Сэлэнгэ” фабрикын ажалтай танилсаһан байна. 2009 ондо байгуулагдаһан үйлэдбэридэ 170 гаран хүн хүдэлнэ. Фабрика жэлдэ 5 мянга гаран тонно бэлэн эдеэ хоол, янза бүриин мяха, бэлэн хоол, колбаса гаргана. «Титан» бүлгэмэй юрэнхы захирал Вадим Бреднийн үгөөр, “Сэлэнгэ” фабрика тэрэ тоодо ородог, үйлэдбэри засагай газарһаа 15 сая гаран түхэригэй дэмжэлгээр тоног түхеэрэмжэ абана.
- Эндэ ганса манай ажаһуугшадта үйлэдбэри бэшэ байһандань һайшаалтай байна. Тус фабрика уласай хүдөө ажахын үйлэдбэрилэгшэдһөө мяха худалдан абана. Хониной ба адуунай мяханула дотороо абтана. Хүдөө ажахы үйлэдбэрилэгшэдэй дурадхажа шадаха үхэрэй мяхан худалдан абана. Өөһэдын мяхаар үйлэдбэри гүйсэд хангажа мүнөө шадахагүй байнабди, зарим хубииень талаһаа абаха бологдоно. Тиимэһээ манай фермернүүдтэ үхэрэй мяха үйлэдбэрилхэ боломжо байна, - гэжэ Алексей Цыденов хэлэнэ.
“Сэлэнгэ” фабрикада нютагай үйлэдбэрилэгшэдһээ тахяагай мяха абаха һанаатай. Кабанскын аймагта хүрэнгэ оруулалтын хэлсээнэй хэмжээндэ жэлэй 30 мянган тонно тахяагай мяха гаргаха тахяагай бройлерно фабрика барилга түсэблэгдэнэ.