828
Буряад Уласай Засагай газарта үнгэргэгдэһэн суглаанда Алас Дурнын нютаг можонуудай эдэй засагай хүгжэлтын түбүүдэй түсэбтэ заһабари оруулха, хангалгын байгууламжын дэмжэлгэ үзүүлхэ, Алас Дурна зүгэй хүгжэлтын жасада һомолхо гэһэн шухала асуудалнуудаар хэлсээ.
«Алас Дурна зүгтэ гүрэнэй дэмжэлгын хэмжээндэ 1814 түсэлнүүд бэелүүлэгдэнэ. Эдэ түсэлнүүдээр хүрэнгэ зөөри оруулха хэмжээн 3,9 триллион түхэригтэ хүрэнэ. Бүхыдөө 612 миллиард түхэригэй хүрэнгэ оруулагдажа, 242 шэнэ үйлэдбэринүүд ашаглалтада тушаагдаа», - гээд Юрий Трутнев зүблөө нээгээ.
Тэрэнэй хэлэһэнэй ёһоор, предприятинуудай эдэй засагай ургалтын 58 түбүүд зохихо һуури бүтэсээр хангагдаһан байха ёһотой.
“Бидэ энэ ажалые Ородой Холбоото Уласай Юрэнхылэгшэ Владимир Владимирович Путинай даабаряар эрхилнэбди. Алас Дурнын тойрогой ажаһуугшадай бүхы тооһоо 80% дээшэ ажаһуудаг дэбисхэрнүүдтэ объектнүүд баригдана. Федеральна бюджедһээ эдэ зорилгонуудта 2021 он болотор 95,3 миллиард түхэриг үгтэхэ. Зарим ушарта заһабаринууд оруулагдажал байха. Минии һанахада, мүнгэ алмаха ба тэрэниие шэнээр хубаарилха - зүб шэглэл”, - гэжэ Юрий Трутнев тодорхойлоо.
Алас Дурна зүг болон Арктика хүгжөөхэ талаар Ородой Холбоото Уласай сайд Александр Козловой тэмдэглэһэнэй ёһоор, түсэл бэелүүлхэ жэлнүүдтэ мүнгэн дахин-дахин хубаарилагдаха ушарһаа заһабари оруулагдана. Тодорхойлбол, Буряад Уласта алмагдаһан 88 сая түхэриг тамирай 4-дэхи һургуулида шэнэ байшан, 8-дахи һургуулида сталион барилгада дамжуулагдаха. Болбосоролой зарим эмхинүүд ба спортын объектнүүдтэ ехэ заһабари хэгдэхэ. Табхар һууринда фельдшерэй-акушерэй пунктын байра худалдан абтаха.
Яхадта мүнгэ шэнээр хубаарилагдаһанай хэмжээндэ энэ жэлдэ Нерюнгри хотодо хүүгэдэй поликлиникада ехэ заһабарилга дүүргэгдэхэ.
Үбэр Байгаалиин хизаарта 28 хэмжээ ябуулгануудые үнгэргэһэнэй дүнгөөр 86,3 сая түхэриг алмагдаа. Тэрэнэй ашаар урид абтаһан түргэн туһаламжын 54 машинануудта 4 автомашина нэмэгдэжэ абтаха. Хоёр шэнэ тренажернууд тодхогдоо, Шэтэ хотодо “Пионернүүдэй паркда” амаралтын газарнууд тоногжуулагдаа. Бооржо хотодо 43-дахи һургуулиин ехэ заһабарилгада мүнгэн нэмээгдэхэ. Алмагдаһан мүнгэн Краснокаменскда хизаарай больницын ехэ заһабарилгада, Шэтэ аймагай Шишкино һууринда номой сангай тоног түхеэрэмжэдэ шэглүүлэгдэхэ.
Примориин хизаарта мүнгэнэй шэнээр хубаагдахада, Владивостогой эмнэлгын ехэ заһабарилгада мүнгэн нэмэгдэжэ һомололдохо. Хасаан аймагай түб эмнэлгын ехэ заһабарилгада, Ехэ Камнада канализаци шэнэдхэлгэдэ мүнгэн үгтэхэ. Хүрэнгэ оруулалгын түсэлнүүдтэ хангалгын байгууламжа бүтээлгэдэ тэдхэмжэ үзүүлхэ асуудал зүбшэн хэлсэгдээ. “Хүрэнгэ оруулалгын 10 түсэл бэелүүлгэдэ тэдхэмжэ үгтөөд байна. Тус түсэлнүүдээр хубиин зөөри хүрэнгэ оруулалта 226,4 миллиард түхэригтэ хүрөө, 9,7 мянган ажалай һуури байгуулагдаа”, - гэжэ Юрий Трутнев тодорхойлжо хэлээ.
Буряад Уласай Засагай газарай мэдээсэлэй албанай гэрэл зураг
