Самандын Жавхлантай уулзаха үедөө
Мэргэн Батуевич Балдановай эсэгэ, Батадоржо Гомбоевич, намһаа нэгэл жэлээр аха байһан юм. Тиимэһээ тэрээнтэй дүтын нүхэд байгаабди. Багадаа наададаг, табан модоной зайда урдадаг Худандаа ошожо, хүхылдэштэрөө уһанда ородог һэмди. 10-дахи анги түгэсхэһэнэйнгээ һүүлдэ бинь ходо холуур ябажа, харилсаамнай үсөөн уулзалгануудаар хизаарлагдадаг болоо бэлэй. Тиимэһээ тэрэниие хүдөө ажахын дээдэ һургуули түгэсхөөд, холуур ябангүй, түрэл совхоздоо ажаллана гэжэ дууладаг байгааб. Бүхы орондоол тон адляар туйлай ехэ уналгада ороһон Үлзытэ руугаа булай ехэ хэрэгээр лэ ошодог болоод байһанаа, эндэхи муниципальна байгуулалтын захиргааниие Мэргэн Батуевичай толгойлһон хойно нютаг руугаа ошолгомни гансата заншалта болоһон юм. Эндэ минии дүтын түрэл болохо Дагба Балданович Жанчиковай «дайшалхы» орлогшонь байһан ушарынь баһал ехээр нүлөөлөө юм бэзэ.
Залан шууд зантай
Мэргэн Батуевич угаа залан шууд, түсэблэһэнөө дүүргэжэл һаладаг хүн гэжэ би гансата ойлгооб. Гадна айхабтар эрилтэ ехэтэй, тойроод байһан зониинь өөртэнь тон адляар баһал залан шууд байха ёһотой гэжэ тоолодог. Эдэ бүгэдынгөө хажуугаар, зондо ямар бэ даа угаа болгоомжотойгоор, юушьеб хүлеэнгеэр хандадаг байһанһаань боложо юм гү, тэрэ үеын байдалаар бэелүүлэгдэсэнь хайшаа юм ааб гэжэ тоолоод, тэрэнэй ябууд хэлэһэн ехэ түсэбүүдэйнь хэр бүтэсэтэй байха байһаниие һэжэглэһэн мэтэ хүлеэн татажа ябадаг байгааб.
Теэд минии үзэмжэдэ табиһан бүхы түсэбүүдээ тэрэ удаа дараа- лан, бүхы дайралдаһан бэрхэ- шээлнүүдые үнөөхил залан шуудаар дабан бэелүүлээ һэн. Аймагай зүгһөө багаханшье дүнгэсэгүйгөөр Үлзытэдэ хэдынэйшье сагта огто байгаагүй стадион бии болгожо амжаа. Совет үедэ ехэ һандаралгада ороһон соёлойнгоо байшан шэнэлээ. Хуушан котельниин байшангые тамиршадай заал болгожо, тэндэ бүхы һайндэрнүүдээ үнгэргэхэ, үндэр айлшадые багахан Үлзытынгөө бүгэдэ зоной хабаадалгатайгаар угтаха газартай болоо. Дунда һургуулияа лаб байлгахаһаа гадна, һурагшадаа хооллуулха столовотой болгожо шадаа, һургуулитайнь хамта мандан байһан сэсэрлигэйнгээ хүүгэдэй болон шабинарай эдихэ юумэ бэлдэлгые эгээл зохид соонь эмхидхээ гээшэ. 1990-ээд онуудта һандаралгада ороһон Хуурайнгаа эм домто аршааниие байһан соонь шахуу һэргээгээ.
Мэргэн Батуевичай ударидалга доро түрэл Үлзытэдэмни хэгдэһэн ганса эдээхэншье юумые һайнаар һанан, тооложо гарахадаа, ямар нэгэ урагшатай бэрхэ хүнэй ударидалга доро үдэрһөө үдэртэ хэгдэһэн юумэн үнэн дээрээ бултанай анхарал хандуулма байхаараал байна гэжэ бахархан бодоо һэм.
Хүн шэнжэнь, гүн сэдьхэлынь
Һүүлдэнь, 2009 оной ноябрь соо, минии 60 наһаяа гүйсэхэдэмни, нютаг дээрэмни бүхы Хэжэнгын аймагай һурагшадай, багшанарай болон бусад зоной хабаадалгатайгаар, һүр жабхалантайгаар ойн баярыемни тэмдэглээ һэн. Энэ үйлэдэ Мэргэн Батуевичай аша габьяа ехэ гэжэ һайниие хүргэн байхаһаа гадна, тэрэнэй хүн шанарай үшөөшье оёоргүй гүнзэгы байһаниие бахархан ойлгоо бэлэйб.
Тэрэ намда онсо дуулааханаар хандажа, адуун бэлэг барюулхаһаа гадна, бүгэдэ улад зонойнгоо урда ехэ талархалаа мэдүүлээ бэлэй. Тиигэжэ минии зүрхэ, сэдьхэлэй, оюун бодолой, оюун һэшхэлэй тэрэ үедэ ямар хэмжээтэй байһаниие ойлгохо үндэр сэнэгтэй хүн гэжэ һанаа һэм. Энэ һанаашымни бодото байһаниие булай зохидоор даа гэршэлэн, уян гоёор, үндэр шадабаритайгаар монгол дуушан С.Жавхланай «Эжын шанаһан сай» гэжэ дууе ёстой дуушан байһанаа харуулан гүйсэдхөө бэлэй.
Тиихэдэнь саб гэмэ хуурайшаг, түбһэн хүниие өөрынгөө гүн сэдьхэлэй оршон руу бэлээр табидаггүй гэжэ бодоһон Мэргэн Батуевични үнэн дээрээ онсо нугархай, саагуураа ехэ зөөлэн, налархай, зоноор харилсахадаа, олонхи ушарта тон бодомжо ехэтэй хүн гэжэ ойлгоһомни тон зүйтэй байшоо.
Түрэл һайхан Үлзытынгөө бү- гэдэ улад зоной аша туһада гэжэ 10 һайса гаран жэл соо эсэн, сусангүй бэелүүлһэн хэрэгүүдынь һайн ноён байһанаа харуулхын тулада хэгдээ бэшэ, харин Мэргэн Батуевичай халуун зүрхэнэй эрмэлзэлээр, өөр соогоо нюун ябаһан сэдьхэлэйнь уряагаар бодото дээрээ мүндэлөө гэжэ лаб һайн ойлгохо болоо һэм.
Минии зүб байһаниие ялас гэмээр гэршэлһэн Үлзытын захиргаанай гулваа бэшэ болоһон хойноо бэелүүлһэн үшөө нэгэ һайн хэрэгынь тодоор харуулна. Хэжэнгынгээ амжалтатай олзын хэрэг эрхилэгшэ Радна Рампиловтай хамта Мэргэн Балданов Россиин Федерациин гурба дахин абарга, дэлхэйн түрүү һуури эзэлхын түлөө нааданда хүрэл, Европодо мүнгэн шанда хүртэһэн манай Хэжэнгын үрүүд хүбүүдэй нэгэн болохо Тамир Галановые өөрынь гэртэй болгохын тулада, мүнгэ суглуулгые нютагтаа эмхидхэжэ, тон амжалтатай байгаа ха юм.
Хёрхо харасатай, холын бодолтой
Энээнтэй дашарамдуулан, Мэргэн Батуевичнай өөрөө эрхим тамиршан байгаа юм гэжэ онсо тэмдэглэһүүб. Тэрэ кикбоксингоор Россиин Федерациин абарга, Европын түрүү һуури эзэлхын тулада болоһон мүрысөөндэ эрхим дүрбэнэй тоодо ороһон байха юм. Тэрэ үедэ Буряадыемнай сурхуулһан бүхэли бүлэг кикбоксёрнуудай дунда Мэргэмнай түрүүшүүлэй нэгэн байгаа гэжэ эндэ тэмдэглэхэ хэрэгтэй.
Захиргаанайнгаа толгойлогшын тушаалһаа буухадаа, Мэргэн Батуевич хэхэ ажалтай үни болонхой байгаа. Дээдэ Хэжэнгын Хөөрхэ нютагта үшөө совет үедэ олдоһон шулуун нүүрһэнэй горитой хэбтэшые олзоборилхо хэрэг тэрэ эмхидхээ бшуу. Тиимэһээ Мэргэн Балдановые уйгаргүй холын хараа бодолтой хүн хаш гэжэ зан абариинь үшөө нэгэ тодорхойлхы шэнжэнүүдэй онсые тон лабаар мэдэхэ болоо һэм.
Ерээдүйдэшье иимэрхүү нээл- тэнүүд үшөөл олон удаа минии урда нээгдэхэ аабза гэжэ багсаамжалнаб. Юуб гэхэдэ, Мэргэн Батуевич Балдановай зосоо тиимэрхүү нээлтэнүүдые эрхэ бэшэ нээмээр нюусанууд угаа олон ёһотой даа гэжэ бодохо үндэһэ олые намда үгөө ха юм даа! Энэ бодолыемни дээрэ дурдагдаһан хэдыхэн лэ жэшээнүүдэй ашаар лаб ойлгохоор байна хаяа гэжэ бодоноб.
Өөртэнь наһанай улам ехэ амжалтануудые, гэр бүлэдэнь жаргалтай, элүүр энхэ, урагшатай, амжалтатай, хэшэгтэй, олзотой, дэмбэрэлтэй, буянтай ажабайдал үнэнхэ зүрхэнһөө аха хүн хадаа үреэнэб!
Цыдып ЦЫРЕНДОРЖИЕВ
Мэргэн БАЛДАНОВАЙ дурадхаһан гэрэл зурагууд