854
Болбосоролой ба эрдэм ухаанай талаар хиналгын федеральна албан, Болбосоролой шанар сэгнэлгын федеральна дээдэ һургуули болон Москва хотын Болбосоролой ба эрдэм ухаанай департамент “21-дэхи зуун жэлэй һургуулиин болбосорол: дадал шадабаринуудые олголго ба сэгнэлгэ” гэһэн уласхоорондын V хуралдаа эмхидхэбэ. Тиин хэмжээ ябуулгада хабаадагшадай олонхиин һанамжаар, һурагшадай зохёохы шадабари, харилсаха ба ажаһууха дадал, мүн шэнжэлхы бодомжолго хадаа сагай ошохо тума нүлөө ехэтэй боложол байха.
Саг түргэдэнхэй, хамаг юумэн мэтэр түргэн хубилна. Уларилшье һаа танихаар бэшэ болоно. Иимэ эрхэ байдалда дүрбэн тэгшэ хүнүүдые хүмүүжүүлхэ шухала. “Болбосоролой байгуулга эдэ бүгэдэ хубилалтануудта һурагшадые бэлдэхэ ёһотой”, - гэжэ Болбосоролой ба эрдэм ухаанай талаар хиналгын федеральна албанай хүтэлбэрилэгшэ Сергей Кравцов тэмдэглээ.
Һургуулиин болбосорой заншалта гурим нилээд хубилха. Тиигэжэ эрдэм мэдэсэ олгуулха, хүмүүжүүлхэ, хүгжөөхэ гэһэн үндэһэн болбосоролой зорилгонуудай хажуугаар һурагшадай зохёохы шадабари, харилсаха ба ажаһууха дадал, мүн шэнжэлхы бодомжолго мэтын тусхай дадал шадабаринуудта онсо анхарал хандуулагдаха. ЕГЭ, ОГЭ ба бүхэроссиин шалгалтын ажалнууд соо иимэ даабаринууд заа-зуу оруулагдажа эхилэнхэйшье һаа, саашадаа бүри хүгжөөгдэхэ ёһотой.
Болбосоролой туйлалтануудые сэгнэлгын талаар уласхоорондын эблэлэй гүйсэдхэхы захирал Дирк Хастед гэгшын тэмдэглэһээр, эдэ тусхай дадал шадабаринууд олон янзаар тодорхойлогдодог, даб дээрээ ниитэ нэгэн эрилтэнүүд үгы юм. Гэхэтэй хамта, энэ ойлгосодо хүн зонтой хүдэлхэ шадабари, хүн зоной дунда ажаһууха ба харилсаха дадал, шэнэ юумэ зохёохо ба нэбтэрүүлхэ шадабари, харюусалга өөр дээрээ абахаяа айдаггүй болон үнэн сэхэ зан абари гэхэ мэтэ сохом хабаатай.
Имагтал эдэ дадал шадабаринууд үхибүүдтэ һургуулиданьшье, саашанхи ажабайдалданьшье тон хэрэгтэй байха гэжэ Эдэй засагай харилсаанай ба хүгжэлтын эмхиин департаментын хүтэлбэрилэгшэ Андреас Шляйхер онсолоо. Хэрбээ эрдэм мэдэсэ шалгаха ба сэгнэхэ арганууд мүнөө хүгжэнги һаа, тусхай дадал шадабаринуудые сэгнэхэнь орёо. Зүгөөр сэгнэжэ һурабал, болбосоролой ашаг үрэ горитойгоор дээшэлхэ бшуу.
Буряад Уласай Болбосоролой болон эрдэм ухаанай яаманай гэрэл зураг
