950
Монгол Уласта Халхын голдо япон-манжа булимтарагшадые совет болон ба монголой сэрэгүүдэй илаһанай 80 жэлэй ойн баярта дашарамдуулһан хэмжээ ябуулганууд үргэлжэлһөөр. Ородой Холбоото Уласай Юрэнхылэгшэ Владимир Путин ба Буряад Уласай Толгойлогшо Алексей Цыденов тус хэмжээндэ хабаадалсаа.
Сентябриин 3-да хотын түб талмай дээрэ Ородой Холбоото Улас болон Монгол Уласай Юрэнхылэгшэнэрэй албан хэрэгээр уулзажа хөөрэлдэһэн байна. Гүрэнүүдэй хүтэлбэрилэгшэд оршон үеын байдал болон ородой-монголой холбоо харилсаанай саашанхи хүгжэлтэ, нютаг можонуудай шухала асуудалнуудые зүбшэн хэлсээ. Тиигэжэ хэлсээнүүд баталагдаһан байна. Энэ уулзалгада Алексей Цыденов хабаадалсаа.
- Халхын голой байлдаан хоёр арадуудые нэгэдүүлээ. СССР гүрэн тэрэ сагта гадаадын булимтарагшадһаа Монгол уласые аршалха талаар дэмжэжэ, Монгол Уласашье Эсэгэ ороноо хамгаалгын Агууехэ дайнай үедэ манай гүрэндэ шадаха зэргээрээ туһа хүргөө. Дайнай һүүлээрхи жэлнүүдтэ манай харилсаан улам үргэдхэгдөө. Һүүлэй арбаад жэлнүүдтэ манай гүрэндэ, ба Монголдошье байдал үндэһөөрөө хубилжа, элдэб үйлэ хэрэгүүд болоо, зүгөөр урид жэлнүүдтэ табигдаһан һуури, эб найрамдалай, хамтын ажалай, холбоо харилсаагай үндэһэн – эдэ бүгэдэ байһаараа. Монголдо ерээд байхадаа, ехэ баяртай байнаб, мүнөөдэрэй энэ уулзалга хоёр талын холбоо хүгжөөлгэдэ туһа болохо гэжэ этигэнэб, - гэжэ Владимир Путин тэмдэглээ гэжэ Ородой Холбоото Уласай Юрэнхылэгшын мэдээсэлэй албан дуулгана.
Ородой Холбоото Уласай Юрэнхылэгшэ Владимир Путин сентябриин 2-то баяр ёһололой хэмжээ ябуулгада хабаадаха гэжэ Монгол Уласай Юрэнхылэгшэ Халтмагийн Баттулгын урилгаар албан ёһоной хэрэгүүдээр хүршэ гүрэн ерэһэн байна гээд һануулнабди. Тэрэл үдэр Владимир Путин Советскэ Союзай маршал Георгий Жуковай хүшөөдэ баглаа сэсэг үргөө.
- Халхын голой Илалтын 80 жэлэй ойдо зорюулагдаһан хэмжээ ябуулганууд үнгэргэгдэбэ. Владимир Владимирович Путин ба Халтмагийн Баттулга дүнгүүдээ согсолоо. Буряад Уласһаа Монгол хүрэтэр авто урилдаанда зүжэгшэд, волонтернууд, ниитын эмхинүүд хабаадаа. Тэдэнэр харгы замдаа тоглолто табижа, нютагай хүнүүдэй дэмжэлгэдэ хүртөө. Халхын голдо байлдаанай болоһон газарта Буряад Уласһаа хүшөө табигдаа. Тэрэ байлдаанда уласаймнай 16 мянга тухай ажаһуугшаднай хабаадалсаа. Хүшөө бодхоожо, үнгэрһэн үйлэ хэрэгүүд тухай дурасхаал мүнхэлэгдэбэ. Ород гүрэн ба Монгол Улас хододоо нягта харилсаатайгаар хүдэлөө, илангаяа бидэндэ хабаатай. Урагшаа хамта дабшахабди!” - гэжэ Алексей Цыденов хэлээ.
Буряад Уласай Засагай газарай мэдээсэлэй албанай гэрэл зураг
