Арьяа-Баала бурханай айхабтар ехэ хүрэг бүтээгдэжэ, заха холын Захааминай хоймортохи суугаараа үндэр, домогоороо баян Санага нютагта заларха сагынь дүтэлжэ байна.
Ородой Холбоото Уласай Буддын шажантанай заншалта Сангхын толгойлогшо XXIV Бандида Хамба лама Дамба Аюшеев энэ ехэ дэмбэрэлтэ үүсхэл гаргажа, Санагада бодхооё гэжэ айладаад, өөрөө мүнгэ алта һомолжо эхилһэн юм. Арьяа-Баала бурхан бүтээгдэжэ, юундэ аяар Санага нютагта заларха болоо юм гэбэл, түрүүшын Бандида Хамба лама Дамба-Даржаа Заяаев Санагые шэнжэжэ үзэхэдөө, энэ нютаг гээшэ одоо Саада газар - Диваажанай орон мүн байна гэжэ айладаhан юм. Энэнь ехэ зүйтэй: мүнөөшье Аха, Түнхэнэй зон хүнэй наһа барахада, Санагадаа хонидоо харюулхаяа ябаа гэжэ дэмы хэлэдэггүй.
Арьяа-Баала бодисадын хүрэг бүтээгдэжэ дүүрэхэнь үшөөл үды, гэбэшье эгээл шухала шатадаа хүрэбэ. Энэ ехэ бүтээл бүтээхэ эрхэ Дамба Аюшеев уг гарбалаараа Санагын, Захаамин хотодо түрэhэн мэдээжэ уран зурааша, уран барималша Юрий Ёндонович Мандагановта даалгаhан юм. Тэрэ Буряад Уласай арадай уран зурааша, Ородой Холбоото Уласай габьяата уран зурааша, Ородой Холбоото Уласай Уран зураашадай холбооной алтан медаляар шагнагдаhан.
Санагын дасанай хойто Генин-Чимбо уулын сээжэ энгэртэ тодхогдохо тон томо (41 метр үндэртэй, 30 метр үргэнтэй; зүүдхэл гоёолтотоёо үшөөшье ехэ байха) бурханай хүрэг бүтээхэ хэрэг тон ехэ харюусалгатай, гаргаша ехэтэй гэжэ ойлгосотой. Тиимэhээ энэ буянта хэрэгые зүрхэндөө дүтэ абаhан Санага нютагайхид, бүхы захааминайхид Буряад оронойнгоо арад зоной туһаламжаар, Бандида Хамба ламын, аймагайнгаа засаг дарга Сергей Гонжитовай дэмжэлгээр, Арадай Хуралай һунгамал байһан Молон ламбагайн ударидалгаар арга шадалаараа хүдэлжэ, һуурииень бүтээгээ. Хадын ташаланда һуури татаха гээшэ бэлэн хэрэг бэшэ. Хабартаа хада уулын саһан хайлажа урдаха. Захаамин хангай хабарай эхинһээ, зундаа, намарай үнгэртэр ехэ бороотой байдаг гээшэ. Тиимэһээ һуурииень ехэл бүхэлхэ хэрэгтэй гэжэ ойлгосотой. Хэды гээшын шулуу шохой, цемент хэрэглэгдээб! Зоной хүсөөр бүтэһэниинь болоо гэжэл мүргэе.
Санага нютагай бүгэдэ зон энэ хэмжээ ябуулгые үндэрөөр сэгнэжэ, үнэн сэдьхэлһээ дэмжэжэ байһанииень Санагын һургуулиин багшын ажалай ветеран Зинаида Дамдиновна Бабуева-Мархаева иигэжэ элирхэйлнэ:
- Санагын үндэр наhатай төөбии таабайнар, нютагай зон айл аймагаараа, холын нютагуудта жаргалаа олоhон наһатайшуул, хүдэлжэ байгаа хүбүүд басагаднай - баран бултадаа Санага нютагтамнай, орой дээрэмнай айхабтар ехэ баяр баясхалан буухань гэжэ арга шадалаараа оролдоно. Хүн түрэлтэнэй мүргэхэ, hүгэдэхэ, холо ойроhоо яларан толорхо Арьяа-Баала бурханай алтаар шарагдаһан бодо бэеынь бүтээлсэбэл, амидын жаргалай адиста хүртэхэбди, хойто наһанай убдиста харгы нээхэбди гэжэ булта ойлгоно.
Хальмаг арадшье хамтарна
Улаан-Үдэ хотын дэргэдэхи Доодо-Ивалга сомоной харьяата Нуур-Сэлеэн тосхоной Даширабдан Батожабайн гудамжаар 7-дохи гэрэй хажуудахи үргэн ехэ талмайда бодо бэень бүтээгдэнэ. Зунай тэнгэй ааяма халуундашье, адхарһан аадар бороондошье һаатангүй, хэдэн урашуул ажалаа хэһэг хэһэгээрнь урагшань ябуулна.
Өөрынгөө нюдөөр лэ харахадаа, ямар туйлай ехэ ажал хэгдэнэ гээшэб гэжэ шада-яда ойлгонош. Талаһаа харахада, хаана, юун бүтээгдэжэ байгаа юм гэжэ ойлгохын аргагүй. Элеэ шубуундал элидэг мүнөө сагай квадрокоптерор лэ дээрэһээнь, дүрбэн зүг, найман хизаарһаань буулгуулһанииел хаража, энэнь, тэрэнь юун болохо юм гэжэ халта ойлгохоор. Харин урашуул хаанань юу хэхэеэ Юрий Ёндоновичой хэб зурагуудаар ойлгоод лэ, жэншэдгүйгөөр ажалаа ябуулна.
Мүнөө үбһэ, таряа талхаа хуряалга түлэг дундаа ябажа байна ха юм даа. Тиимэһээ манай ошоходо, аха дүүнэрһээнь үүсэеэ бэлдэдэг, хартаабха хапуустаяа асардаг зон нютаг нугануудаараа ябашаһан байба. Үсөөхэншье һаа, хамсыгаа шамажа, хормойгоо шууһан хэды зон хүлһэ хатаама халуунда һахы-һалаг хүдэлжэ байба. Тэдэнэй үдын хоол бариха үедэнь нэгэ хэды үгэ андалдажа үрдибэбди.
Холын холоһоо гэхэһээ, нээрээл нарата Хальмагай аха дүү арадай хүбүүд байшаба. Каспиин далайн уудамһаа, Эжэл мүрэнэй (Волго) эрьеһээ юугээ бэдэржэ ерэһэн хүбүүд бэ гэжэ һонирхобобди. Манай хүбүүд ута мүнгэ намнажа, холын хойто хүйтэн нютагуудаар ажаллана ха юм. Эдэнэр баһа шадалаараа олзотой ябахаяа оролдоо бэзэ гэжэ һанахашье хүнүүд байгаа. Харин мантай хөөрэлдэхэдөө, аятайханаар зорилгоёо ойлгуулба. Адьяа ( санваарайнь нэрэ) өөрөө Будаадын гүн ухаанда һураһан, саадахи-наадахиие гүнзэгыгөөр ойлгохо дээрэһээ бүхы дэлхэйдэ мэдээжэ болохо нангин шүтөөниие бодхоолсожо, буян хэшэгтэ, үлзы хутагта хүртэхэб гэһэн үнэн һанаатай хүн гэжэ ойлгобобди.
Уран барималшан Виктор Петрович Баранов энэ ехэ буянта ажалда хубитаяа оруулхадаа, ашата багша Юрий Ёндоновичтой эб хамта буян үйлэдөө һэмди гэжэ наһан соогоо һанажа, үри бэедээ дамжуулжа ябахаяа мэдүүлээ:
- Уран нарин ажалда дүршэлтэй болохо гээшэмнай юунһэйшье сэнтэй ха юм даа. Минии ууган хүбүүн Чечендэ алба хээд бусахадаа, хальмаг нүхэдөөрөө тоонтодонь айлшалжа ерэхэдээ, Түбэд, Монголһоо хойшо хизаар дайдада эгээл ехэ томо Бурхан багшын хүрэг манай Элистэдэ юм гэжэ хөөрөө гээ һэн.
Нигүүлэсхы сэдьхэлэй уряагаар
Эдэ урашуулаар эб хамта хүдэлжэ байһан манай мэдээжэ урлагша Татьяна Валерьевна Жигжитоватай хөөрэлдэхэдэмнай, олон үгэгүйгөөр ажалаа хэжэ байнабди - туһалагты гэжэ мэдүүлбэ. Тэрэньшье зүб, һонирхоһон зон олон, харин туһалха гэхэдээ, саанаа бирагүйшэгүүд аад, юрэл һонирхогшод бүри олоороо ерэнэ! Тиигээд энэ ехэ ажалай заха үзүүрыньшье ойлгохогүй аад лэ, нэгэл асуудалтай - хэзээ бүтэхэ юм? Шэгшы хурганайнгаа үзүүршье хүдэлгөөгүй аад, иигэжэ асуухадань, ямаршье хүнэй уур хүдэлэнгүй яахаб гэжэ эндэ туһалжа байһан Ирина Васильевна Мархаева дэмжэнэ.
Арьяа-Баала бурхан бүтээхэ нангин хэрэгтэ мүнгэ алта суглуулжа байха «Нэгэдэл» гэжэ энэрхы сэдьхэлэй буян үйлэдэлгын жаса байгуулагданхай. Жасын ажалые Сөөхэр-Боолдой угай Мэнгэтэн аймагай Солбон Будаев урагшатайгаар ударидана. Хүн зомнай бэеэ заhаад, сэдьхэлээ сэбэрлээд, хамсыгаа шуун орожо, мүнгэ алтаар, эдеэ хоолооршье туhална. Зоной хүсые элсүүлхэ зорилготойгоор Улаан-Үдэдэ, Захаамин хотодо нигүүлэсхы туһаламжын марафонууд олон зоной хабаадалгатайгаар үнгэргэгдөө. Бүхы бүтээгдэhэн юумые, зоной туhаламжа, хандалга «Тоосооной данса» гэжэ алтаар барлагдаһан томо зузаан дэбтэртэ бэшэгдэн бүрид- хэгдэнэ.
- Түүхэтэ дэбтэртэ бэшэгдэжэ, энэшье, хойтыншье түгэд hайхан жаргал эдлэхээ оролдогты. Һанаhан hанамжаяа, үреэлээ, шүлэгөө бэшэгты. Буряад-FM болон Буряадай радиодо хөөрэгты, сонинуудта бэшэгты. Шэнэ сагай сууряан соогуур, шэнээр алхамаа харуулагты, - гэжэ Зинаида Дамдиновна уряална: - Зоной түлөө зобожо, бэеэ үгэжэ ябаhан эршэ ехэтэй, эрмэлзэхэ бэетэй, орьёл дабаха, оройдонь гараха заяа хубитай хүбүүд басагад олон боложо байна, - гэжэ хуушанай багша урматайгаар тэмдэглэнэ.
Заяа Хамбын шэнжэжэ үзөөд, Диваажанай орон гэжэ айладаhан Санага нютагай бултанаймнай этигэл найдалые харюулан, hайн хэрэг, hайхан заяа үйлэдэжэ байдаг бүхы Буддын шажантанай мүнхэрхэ орон гэжэ шэлэгдээд байхада, баярлажа, бахархажа байhанаа мэдүүлнэбди.
Буряад Уласаймнай дэбисхэр дээрэ ажаhуудаг бү- хы арад зоной ашада бүтээг- дэжэ байhан бурханаа заларха газартань залаха айхабтар ехэ хүдэлмэриин гаргашануудта хандиблан орожо, хайра туhаяа үзүүлжэ, хойтын жаргалай буян үйлэдэхэ үшөө нэгэ арга боломжо бии болобо гэжэ үнэн hанаагаараа сэдьхэжэ хабаадалсаха бэзэт.
БАРИМТА
Арьяа-Баала (Авалокитешвара) – «Дэлхэйн зоболондо харадаг», мүн баhа Жанрайсиг (монголнууд иигэжэ шүтэдэг) – Буддын шажантанай шүтэдэг хамаг Будданарай нигүүлэсхы сэдьхэлэй бурхан гээшэ. Энэ бурханиие ондоогоор Түгшэн-Чэнбөө, Хоншом бодисада гэжэ нэрлэдэг. Энэ бодисада наhа бараhанайнгаа hүүлээр нирваан болоогүй, харин шэнэ түрэлдөө богдо болоод, хүнүүдэй юртэмсэдэ үлэжэ, нирваан тээшэ ошохо замдань туhалдаг. Арьяа-Баала бурханай зургаан үетэй (мааниин зургаан үзэг) “Ум маа нии бад мэ хум” тарни бүгэдэндэ зорюулагдаhан юм. Тиимэhээ энэ бодисада заримдаа Шадакшари («Зургаан үеын Бурхан») гэжэ нэрэтэй. Үшөө Хитад, Жибэн (Наран Улас), Солонгос оронуудта олониитэдэ зорюулhан «Маха Каруна Тарни Судар» гээд байха. Энэ сударта 84 үетэй Агууехэ нигүүлэсхы сэдьхэлэй тарни байдаг.
Арьяа-Баала бурхан энэ тарниие Будда бодисаданарhаа уншажа абаhан гэдэг. Бодисада – Буддын шажанда арюун ябадалаараа алдаршаhан дээдэ түрэлтэн. Үндэр боди сэдьхэл олохын тулада галабай эрьехые анжарангүй, эхэ зургаан зүйл хамаг амитанай аша туhада оршолонто юртэмсэдэ эрьеэд лэ түрэжэ байдаг. Оршолонто юртэмсын хамаг амитанай түгэс Нирваанда хүрэхэдэнь лэ, Бурхан болохо тангаригтай. Тиихэдээ нигүүлэсхы сэдьхэлээр эхэ зургаан зүйл хамаг амитанда хандажа, хайрлажа, туhалжа ябахаб гэжэ тангариглаһан байна.
Сэнгэ РИНЧИНОВЭЙ гэрэл зураг