757
Сентябриин 3-да Русский арал дээрэ “Алас Дурнын гудамжын” нээлгын баяр ёһолол үнгэргэгдэбэ. Алас Дурнын федеральна тойрогой 11 можо нютагууд, тэрэ тоодо Буряад Улас болон Үбэр Байгалай хизаар хүгжэлтын туйлалтанууд болон арга боломжонуудаа харуулһан павильонуудые дэлгээ.
Зүүн зүгэй эдэй засагай V хуралдаанай хэмжээндэ тус үзэсхэлэн сентябриин 8 болотор ажалаа ябуулха. Дэлхэйн 60 гаран гүрэнүүдэй түлөөлэгшэд можо нютагуудтай танилсаха аргатай.
Хуралдаанай гол тайзан дээрэ хэмжээ ябуулгада хабаадагшад болон айлшадые хүндэлэн угтаа.
- Табадахияа “Алас Дурнын гудамжа” эмхидхэнэбэди. Алас Дурнын газар дайдада юундэ этигэнэбди гэжэ харуулхын хэмжээ ябуулга байгуулагдаа, - гэжэ Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутнев хэлэбэ.
Буряад Улас тус хуралдаанда өөһэдын эдэй засагай ба хүрэнгэ оруулалтын арга боломжотой танилсуулаа. Хуралдаанда хабаадагшад, айлшад Ка-226Т болон олон үүргэтэ Ми-171А2 вертоледуудые хараха аргатай. Буряадай мэдээжэ зохёохы бүлгэмүүд тоглолто харуулна. Буряад Уласай Үндэһэн музейн болон хубиин суглуулбариһаа уран зурагууд, буряад уран гартанай хүрэл уран барималнууд павильондо олоной һонорто дэлгэгдэнхэй. Тиихэдэ Буряад орон “Атлас тибетской медицины” гэһэн номтой танилсуулжа, инсульт үбшэ эхин дээрэнь элирүүлхэ мүнөөнэй анагааха ухаанай аргануудтай танилсуулна.
Буряад улас байгша ондо Алас Дурнын федеральна тойрогой бүридэлдэ анха түрүүшынхиеэ зүүн зүгэй эдэй засагай хуралдаанда хабаадана. Буряад Уласай Засагай газарай түрүүлэгшын эдэй засагай хүгжэлтын талаар орлогшо Алексей Мишенинэй хэлэһээр, уласай түлөөлэгшэд хуралдаанай бүхы хэмжээ ябуулгануудта хабаадаха.
Зүүн зүгэй эдэй засагай хуралдаанай үедэ “Алас Дурнын гудамжын” үзэсхэлэнһөө гадна “Алас Дурнын одон” гэһэн соёл уралигай наадан үнгэргэгдэнэ. Тиихэдэ можо нютагуудай спартакиада болон ГТО тушаалга түсэблэгдэнэ. Владивосток хотодо эдэ үдэрнүүдтэ Алас Дурнын нютаг можонуудай агрофестиваль, “Алас Дурнын дангина” ба бусад нааданууд эмхидхэгдэхэ.
Зүүн зүгэй эдэй засагай V хуралдаан 2019 оной сентябриин 4-һөө 6 болотор үнгэргэгдэхэ. Урид жэлэй хуралдаанай дүнгүүдээр, 3 триллион түхэригэй 220 хэлсээн, протоколнууд абтаһан байна. Хуралдаанай ажалда 60 гүрэнэй 6002 делегат ба олондо мэдэээсл тараадаг хэрэгсэлнүүдэй 1357 түлөөлэгшэд хабаадаа һэн. Жэл бүри хуралдаанай хэмжээндэ “Алас Дурнын гудамжа” гэһэн үзүсхэлэн дэлгээгдэнэ, тэндэнь Алас Дурнын можо нютагуудай танилсуулганууд үнгэргэгдэдэг.
Буряад Уласай Засагай газарай мэдээсэлэй албанай гэрэл зураг
