1001
Сентябриин 7-до үдэрэй 16.00. сагта театрайнгаа урдахи талмай дээрэ тоглолто харуулхань.
Театрай дуушад, хатаршад 30 минутын туршада мэдээжэ оперын болон баледэй зүжэгүүдһээ үзэгдэлнүүдые дурадхаха. Валерий Волчанецкиин хүтэлбэри доро хоорой дуушад болон баледэй хатаршад домог суута “О, Фортуна” гэһэн композици болон Карл Орффын хүгжэм дээрэ бэшэгдэһэн “Кармина Бурана” баледэй түгэсхэл хуби харагшадай һонорто дурадхаха.
Гадна хотын ажаһуугшад Оперо болон баледэй театрай зүжэгүүдтэ биледүүдые хүнгэлэлтэтэйгөөр худалдажа абаха аргатай.
Буряадай гүрэнэй Оперо болон баледэй театр 80-дахи ойн баярта хаһаяа эхилхэеэ бэлдэжэ байна гээд һануулая. Тэрэнь сентябриин 15-да Лхасаран Линховоиной нэрэмжэтэ Оперын фестиваляар эхилхэ. Харин баледэй хаһа сентябриин 29-дэ болон октябриин 3-4-эй үдэрнүүдтэ болохо “Буряад онтохонууд болон домогууд” (Бурятские сказки и легенды), “Һахюуһан” (Талисман) гэһэн зүжэгүүдээр эхиеэ абаха гээд театрай хэблэлэй албан мэдээсэнэ.
Буряад Уласай соёлой яаманай мэдээсэлэй албанай гэрэл зураг
