882
Үнгэрэгшэ зун Буряадай Үндэһэнэй музей бэлэг дурасхаалаай зүйлнүүдые үйлэдбэрилжэ, хотын ажаһуугшадай болон айлшадай анхарал татаа бэлэй.
Буряад уран зурагта дуратай, мүн түүхэ һонирхон шудалагшад музейн жасада хадагалагдажа байһан уран һайханай бүтээлнүүдэй хуулбари зурагуудтай пулаад, сүүмхэ, оодон хамсытай самсануудые тэрэ доронь худалдажа абаа һэн.
Хубсаһа хунар болон гоёлой зүйлнүүд Солбон Ринчиновэй, Александра Сахаровскаягай, Лубсан Доржиевай болон ород уран зураашан Федор Моллерой зурагуудаар, мүн Түбэд эмнэлгын атласай хуудаһануудааршье шэмэглэгдээ һэн.
Харин энэ удаа Бальжи-Нима ба Зорикто Доржиевуудай уран бүтээлнүүдтэй Твидди пулаадууд үйлэдбэрилэгдэбэ.
Анхаралаа онсо хандуулалтай юумэн гэхэдэ, хүннүүгэй үеын үнэтэ эрдэниин зурагтай сүүмхэ. Үни холын сагай зүйлнүүдые музей сентябриин 16-да нээгдэхэ “Хүннүү. Талын гүрэн” (Гунны. Имерия степей) гэһэн үзэсхэлэн дээрэ дэлгэгдэхэ гээд тэмдэглэлтэй
Эдэ сувенирнүүд Ц. Сампиловай нэрэмжэтэ Уран һайханай музейдэ болон Буряадай Түүхын музейдэ худалдагдана.
Буряад Уласай соёлой яаманай мэдээсэлэй албанай гэрэл зураг
