Морин-эрдэниин ордон
Үнгэрһэн зун нүхэр хүбүүнтэеэ Монголой Ехэ Нааданда ошохоёо түсэблэһэн байгаад, тэрэмнай элдэб шалтагаар бэелээгүй. Халагламаар юумэн гэхэдэ, шэнэ абаргые түрүүлһэн ехэ һайхан наадан боложо үнгэрөө.
Нээлтын жагсаал
Бидэ буряадууд үсөөн тоотой ушарһаа өөрынгөө яһанай хүнүүдые бэдэрхэ дуратай ха юмбибди даа. Тиигэжэ тэрэ хорхойемнай хүсэд хангажа, шэнэ абаргамнай нагасата талаараа буряад байшоо. Мүн тиихэдэ Дорнод аймагһаа уласай шэнэ харсага солотон түрөө - Доржын Анар. Анарай ээлжээтэ солодо хүртэхэ тушаа апрель һарада Буряадта мэдээжэ Согзолдорж нашан уридшалан найдажа байгаа агша һэн.
Харалгын талбай
Иимэ һайхан нааданһаа үлэһэн зон халаглаа гэхэдэ, халаглаад, шаналааш гэхэдэ, шаналаад байгдаа. Хилэгүй Интернет сүлжээн хүгжэһэнэйнь ашаар олон юумэн тэрэ дороо анхарагдажа, балайш удаан гашуудалда абтаагүйбди.
Үндэр гэрнүүдэй дундуур моринойнгоо шадал мэдүүлэн
Монгол моридой түбэрөөн
Адуун соёлоо анхарна
Удангүй тэрэл нүхэрэйм зууршалгаар Үбэр Монголдо үнгэрхэ эмниг мори эмээллэгшэдэй наада үзэхэ талаан буугаа. Юун наадан гээшэб гэжэ һонирхоһыемни иимэ ушартай байба. Хитад Уласнай Үбэр Монгол орондоо хүлэг мориной һүлдэдэ зорюулһан “Хитадай морин соёл ба бүхэдэлхэйн адуунай юртэмсэ” гэһэн сэдэбтэй ехэнүүд хэмжээ ябуулгануудые үнгэргэжэ захалаа. Июнь һараһаа сентябрь хүрэтэр адуунай соёлдо зорюулһан хоёрдугаар Бүхэдэлхэйн харалган болон анха түрүүшынхиеэ адуунай соёлой үзэсхэлэн дэлгэнэ. Гол үйлэнүүд Хүхэ-Хото ба Шэлын-Голдо үнгэрхөөр хараалагдаа.
Манай түлөөлэгшэд Батсүх хүтэлэгшэтэеэ
Эндэһээ гадуур үшөө хэдэн нютагуудаар адуун аяншалгада хабаатай хэмжээнүүд үргэн дэлисэтэйгээр үнгэрнэ. Дүрбэн һара соо үргэлжэлхэ харалганда 56 хэмжээ ябуулга түсэблэгдэн үнгэржэ байна. Харалган бүхэдэлхэйн мориной соёл тушаа мэдээсэһэн дэлгэрэнгы зураглал боложо үгэхэһөө гадна, Хитад Улас дотор морин соёлой яажа хүгжэжэ байһые тобшолжо, хаа-хаанагүй ажаһуугаа арадуудаар соносхол тарааха гүнзэгы зорилготой.
Морид ба 35 дабхар байшангууд
Эртын нэгэ наһандаа нүүдэлшэн морито соёлтой тэмсэһэн хүршэнэрнай мүнөө оройлжо, энэ илалтаараа бахархан, морин эрдэниие хүгжэлтын дээдэ шатада гаргажа байна.
Хазаар мориндо хам һуугшад
Харалганай үеэр 32 янзын моридой урилдаанууд Хүхэ-Хото ба Шэлын-Голдо, мүн үшөө 11 ондоо хотонуудай хабаадалгатайгаар тэдэнэй дэбисхэр дээгүүр үнгэржэ байна. Тэдэ олоной тоодо монгол үүлтэрэй адуунай урилдаан ба монгол дүримөөр утада урилдаан, эмниг моридые уналга ба үшөөшье ондоо янзын тэмсээнүүд, һорилгонууд боложо байна. Эндэ үүлтэртэ ба холимог шуһатай олон янзын хүлэгүүд оролсоно.
Ипподромой гоё моринтой
Морин-эрдэниин ордон
Буряадые түлөөлжэ, Хориин Баян-Голой мэдээжэ адуу һоригшо Виктор Жигжитов, Хэжэнгын Үлзытын Мэргэн Балданов, Ивалгын Хурамша һууринһаа гарбалтай Гомбо Бадмаев, Бимба Бальжиев гэжэ хүбүүд Үбэр Монгол зорёо. Бусад бэрхэ һоригшод, адуушад хэниинь зунайнгаа ажалда һаатаа, хэниинь гадаада гараха паспортгүй байгаа, мүн ондоошье шалтагаар аянда гараха азагүйдөө. Тус хэмжээндэ маниие үбэр монголшуудай талаһаа барга-монгол яһанай Батсүх, Синцзяниин монгол Хүхэ Луу гэжэ хүбүүд аятайханаар дахуулжа гараа.
Буряадай түлөөлэгшэд
Хүхэ-Хотын тэг дунда гушан табан дабхар шулуун гэрнүүдээр хүбөөлөөтэй морин эрдэниин Ордон-ипподром байна. Тэрээн шадар томонууд ашаанай машинанууд сугларанхай, Үбэр Монголой уужам талаар зоргоороо бэлшэжэ ябаһан эмниг моридые буулгана. Зариманиинь аяар 600-700 модоной зайһаа хүрэжэ ерэнэ, замдаа эдихэ сомоотой хагдарһан үбһэн тэжээлтэй. Нариихан түмэр соргонуудаар дархалһан ябаган хаалтанууд руу туулгажа оронод. Һүнинь ялагар шагаабаринуудтай үндэр шулуун байшангуудые гайханхай, һүр даруулһан янзатай морин һүрэгүүд мануулжа хононо. Илангаяа ипподромдо амидаржа байгаа ялагар-тологор моридой хажууда үргэн талаар зоргоороо һалхинтай урилдажа ябаһанаа туулгажа асаруулһан набтар, үрзэгэрхэнүүдшье һаа, 800 жэлэй саана Дундадын далай хүрэтэр хатарһан моридые харахада, һүрөөтэйшье, хайратайшье.
Синьцзяниин уйгар
Хүндэмүүшэ һайхан Хүхэ-Хото
Һүүлэй жэлнүүдтэ бүхы дэлхэйгээр аяншалдаг нютагаархидһаа болон ниитэ сүлжээнүүдэй ашаар Хүхэ-Хотын ба Үбэр Монголой үзэсхэлэнгүүдтэй яһала танил бологдоо гээшэ. Гурбан сая ажаһуугшадтай хото дотор нэгэшье авто-унаагай түгжэрэл ба хүн зоной исалжа байхые обёороогүйдөө, ехэ гайхагдаа. Ямар мэргэн, шадамараар тааруулжа зохёогдонхой хотын гудамжанууд, харгынууд ба хүүргэнүүд гээшэб? Хэдэн янзын уужам һалаатай автомашинын замууд дээрэ дээрэһээ, нэгэниинь нэгэндээ огтошье һаадгүйгөөр найруулагданхай. Урданай шэнжэтэй түүхэтэ гэр ба бүтээлнүүд шэнын маягай шэл ба шулуугаар шудхагданхай, тэнгэри тулама байшангууд аятайханаар хүршэлжэ һууна. Иимэ хүгжэнги хотын түбэй тэгэндэ арбаад гектар шахуу газарай зайда морин-эрдэниин юртэмсэ оршоно.
Адуунда мээхэй хүүхэн
Хэмнай шадамар бэ?
Түрүүшын үдэрэй оролто хуралдаанай дүнгүүдээр үбэр ба халха монголшууд, Синцзяниин уйгарнууд ба манай буряадууд гээд хабаяа туршаха һанаатай эндэ суглараа. Дээрэ дурсагдаһан олон тоото мори һорихо мэргэжэлнүүдэй эхинэй эхин болохо эмниг номгоруулха бэлэн бэшэ дүй дүршэлөө туршалсаа. Дүн хамта 26 бүлгэм эндэ ороо.
Харалганда хабаадагшад
Хараха янзада талын һалхинда һааритаһан хасартай, хурса харасатай, дошхон эмнигүүдые номгоруулха шадалтай хүдэр адхасатай эрэшүүл суглараад байгаа. Түрүүшын үдэр дүримүүдтэй танилсаһанай һүүлдэ үглөөдэрэй харалганда орохо моридоо бэлдэжэ орообди. Нэн түрүүн арбаад хашаа дотор хаалтатай эмнигүүд сооһоо хоёр-хоёр хүлэгэй хүзүүндэ хадагуудые уялган болоо, тэдэниие намнахадаа унаха моридой хубаари хэгдээ. Адуушадай моринтоёо носолдожо байха һамбаанда зэргэлээд байһан гол тайзан дээрэ ба харагшадай анхарха һууринууд тушаа горитой ажал ябана. Мантан томо экран болон бусад оньһото түхеэрэлгэнүүд шадамараар найруулагдана. Ехэхэн һайндэр болохоёо байһанай тэмдэг эли үзэгдэнэ. Журам гээшэ Хитадта амидардаг зоной шуһан соонь гэжэ мэдэрэгдэнэ. Үглөөдэрынь гараг нэгэншье һаань, үглөөнэй 10 сагта дүүрэн харагшад сугларанхай, харин үдын 13 сагта юумэн хуу дүүрэнхэй - хон-жэн. Зон таранхай, оньһото хэрэгсэлнүүд абяа аниргүй ажалшадаар задалагдажа байна.
Асфальтын дуран
Гол тэмсээн, бидэнэй тааһаар, үбэр ба халха монголшуудай дунда үнгэрөө. Манай эндэ хазаар морин дээрэһээ эмнигые ургалхань үсөө дайралдадаг болоһон дээрэһээ зэргэ тэмсэлдэхэмнай хэсүүшэг байшоо. Яруу- нын Үльдэргэдэ үнгэрдэг болоһон Мянган мориной баяр тус хэмжээндэ удхаараа дүтэшэг байна гэжэ адаглаабди. Ябан-ошон, Буряад Уласаймнай ипподромшье һэргэхэ байха гэжэ найдагдана.
Бэеэ зэһэнэ
Харагшад
Урга – эрхим эрын шэмэг
Жэлэй дүрбэн сагай һалхи шуурганһаа ёһоор халхабша-дэгэлээ хэдэрһэн, эмээл дээрээ няалдаһан янзатай батаар һуунхай, ута ургаяа адхаад соёргожо ябаа моришодые харахада урматай. Зэрлиг байгаали номгоруулдаг урга хэдышье хүлэгэй юртэмсэдэ харша зэмсэгшье һаань, аргагүй хэрэгтэйень, туһатайень хэншье арсахагүйл даа. Ургынгаа нугархайе бөөмэйлжэ, моришод тоһо үнжэгэ түрхижэ, һүүдэрлиг газар хадагалдаг заншалтай байна. Замдаа Манжуур дээрэ буряад хоолой газарта ороходомнай, ажалшан эхэнэрынь багадаа ургаараа хурьгадаа, эшэгэдээ намнадаг байгаабди гэжэ хөөрэнэ. Теэд гайхалтай юумэниинь - энэ ехэ харалганда Шэнэхээн нютагай адуушаднай юундэб даа оролсоогүй. Хабар Үльдэргэдэ адуунда дуратай олониие бэлиг шадабаряараа гайхуулаа бэлэй.
Ургашан
Адуушадай орёо асуудалнууд
Буряад орон соогоо моришод хуби хубяараа, үмсэ үмсөөрөө хүгжэнэ гэжэ манайхин шанална. Хамтаруулан дахуулха хүсэн хомор болоод байна. Нэгэн гээ һаа, Монгол руугаа һүгэдэһөөр, үгы гэбэл, гадаада соёлдо дохиһоор. Асатаһан энэ замай тэгэндэ Буряадай жэнхэни байдал алдагдаха туйлдаа хүрэнэ. Урданай юумэн ула болоо гээд ябаһаар, олон юумэн гээгдэхэнь. Һүүлэй жэлнүүдтэ заал һаа, буряад үүлтэрэй мори үдхэе гэжэ уряалһаар, заншалта болошоһон хамаг морин үүлтэрээ алдажа болохоёо байнагүй гүбди? Хамаг юумэеэ тэгшээр абаад ябаха мүр бэдэрхэ шухала гэжэ хүгшэн залуугүй адуушаднай һанаата болоно.
Тус аяншалгынгаа дүнгөөр Буряадаа түлөөлжэ ябаа бүлэг адуушад сентябриин 21-дэ Хэжэнгын дасанда Джарун Хашорай субаргын 100 жэлэй ойн баярта зорюулһан нааданда монгол моришодые урижа, Хүхэ-Хотодо үнгэрһэн эмниг номгоруулгын зарим тэды хубинуудые харуулаад үзэхэ түсэбтэйгөө мэдүүлээ.
Авторай гэрэл зурагууд болон видеобуулгабари
Улаан-Үдэ-Манжуур-Хүхэ-Хото-Улаан-Үдэ