​​Буряадай мэдээжэ дуушан Ольга Жигмитова “Бал-маскарад” оперодо Ульрикын дүрэ гүйсэдхэхэнь

Гадна дууриин мэдээжэ дуушан Лхасаран Линховоиной нэрэмжэтэ Оперын фестивалиин гала-тоглолтодо хабаадалсаха.

Ольга Жигмитова сентябриин 19-дэ Джузеппе Вердиин “Бал-маскарад” оперодо Ульрикын парти дуулахаһаа гадна, сентябриин 22-то гала-тоглолтодо хабаадаха.

Харин тус фестиваль Буряадай гүрэнэй Оперо болон баледэй театрай тайзан дээрэ сентябриин 15-һаа 22 болотор үнгэрхэнь. Тэрээндэ бүхы дэлхэйдэ мэдээжэ дууриин дуушад болон гурбан дирижёр хабаадаха гэжэ тэмдэглэлтэй.

2019 оной хабар табигдаһан Джузеппе Вердиин “Риголетто” опероор тус фестиваль эхилхэ. Тэрээнһээ гадна Жорж Бизегэй “Кармен”, Джузеппе Вердиин “Бал-маскарад” ба Джакомо Пуччиниин “Тоска” харуулагдаха. Фестивалиин түгэсхэлдэ Буряадай гүрэнэй Оперо болон баледэй театрай гол дуушадай, хоорой ба оркестрэй хабаадалгатай гала-тоглолто табигдаха.

Фестивалиин үдэрнүүдтэ Виталий Шевелев, Чия Амос (Сингапур) болон Георгий Албегов (Санкт-Петербург) дирижёрой ендэр дээрэ гараха.   

Буряад Уласай соёлой яаманай мэдээсэлэй албанай гэрэл зураг